Dom bruk main hu peih ngak dalam harei tết 

Dom pakat Mặt trận TTQVN tỉnh Hậu Giang hu peih ngak labaih 60 danak dak, bruk ngak, haong yaom jien abih tih jaik 31 tỷ đồng piah salam uan nyaom roya pakat negar mbang ka XIII di Đảng. Dom danak dak rilo meng lac ngak pasiam tatua, jalan palei, padang ngak sang jum pataom ka sang kan kathaot… tapa nan hu rik daong ngak brei salih bahrau mbaok meta di palei pala, dui katut veik bruk atah gauk di ban sit saong palei pala. Gam haong bruk padang ngak danak dak, bruk ngak, Mặt trận dom pakat dalam tỉnh daok kham merat pathau khan ka nyaom roya pakat negar mbang ka XIII di Đảng piah daong ka bhap bini thau cambaih jang ka bruk hu makna biak praong ni.

Angan ieu di dom bruk ngak dalam bilan 2 thun 2021 di Palei Ilamu - Dulich dom bangsa Viet Nam di Đồng Mô, Sơn Tây, Hà Nội lac “Ban bingu xuân grauk labik dalam Negar”. Dom bruk hu peih ngak lagiah saong bruk pacang caga jit Covid-19. Tui nan, di Palei Ilamu meda hu peih dom kadha main bhap bini tuk Tết piah patagok talei rohim, sap bui klao harei Xuân yau kadha main glam baoh còn, nao gai kheo, taong yến, taong cù, glam pao…Langiu di nan, Palei Ilamu daok peih ngak Danak dak daok tamia bhap bini “Kadha daoh bilan Xuân” hu dom kadha daoh, tamia bhap bini ka bilan Xuân, ndem tal Tây Nguyên tuk bilan xuân mai tal. Tuai damuai hu duah thau ka adat raok Tết di dom bangsa Tây Nguyên, hu pang yaom, iek dom alat ragam bangsa ngak meng kreim la-ar, kong chieng Tây Nguyên.  

Sang iek ruak Nhiệt đới ban raya Hồ Chí Minh brei thau, hu pambuak haong kapul roh duah Lâm sàng Đại học Oxford peih bruk langyah bộ gen SARS-CoV-2 di urang ruak ka 1660 (lac urang likei, umo 28 thun, daok di tỉnh Hải Dương, mai ban raya Hồ Chí Minh angaok sruh kapar haoh VN213 harei 28/1).Tapa langyah mboh lac bộ gen di virus mek meng BN 1660 hu 17 đột biến di biến chủng B.1.1.7. Biến chủng ni hu prein njom pambak samar jang dut saong dom chủng SARS-CoV-2 dahlau daih. Ni lac biến chủng daok ba tal tamuh tabiak khang di jit praong COVID-19 di Anh jang yau dom negar châu Âu. Pambuak haong dịch tễ pagam tal, meda lac sruh jit di Hải Dương kayua biến chủng B.1.1.7 ngak tabiak.

Dom harei jaik Tết, urang blei salih meng grauk labik ba gauk tame dom palei pala bingu di tỉnh Bà Rịa –Vũng Tàu piah pajeng bingu nao pablei. Kayua kan kandah di jit Covid-19 nan ye thun ini yaom dom janih bingu oh tagok, bruk pablei bingu di dom palei pala bingu dalam tỉnh hu lagaih siam.

Dah page ni (2/2), jaik 4.000 sinh viên kan kandah hu daong brei saoh harak vé radaih nao palei mbang Tết dalam danak dak “Sruh radaih bilan mùa xuân – Tết pataom gauk thun 2021”. Ni lac sa bruk ngak kayua Ủy ban Mặt trận negar Việt Nam ban raya HCM, Thành đoàn, kapul Sinh viên Việt Nam TPHCM, báo Thanh niên gam haong pasak daong anek saih, sinh viên TPHCM pambuak gauk peih ngak. Hadei di tuk UBND TP Hồ Chí Minh tabiak harak brei ka sinh viên, anek saih, padeih bac meng harei 2/2 piah pacang caga jit COVID-19, dalam bier harei kabroi saong harei ni, yaok ribau sinh viên nao tal mblang radaih Miền Đông (quận Bình Thạnh, ban raya Hồ Chí Minh) piah nao palei rok Tết saong gauk gar.

Hadei di tuk likau brei adat pandar chip vaccine pacang caga Covid-19 di Phai-dơ-Bai-ô-en-tếch di akok thun ini, Gah Y tế Dunya urak ini daok kham merat jhul pasamar bruk taong yaom siam mekre salamat di dom janih vaccine karei hu yaom ngak tabiak lap jang meda pablei tapa Cô-vac. Tui kuhria, WHO ba tabiak bruk klauk jru di taong abih taneh ia di dunya meng akok bilan 4 saong klauk jru ka dom njaom bhap bini mbaun njom mbak ruak glaong di kreh thun ini.

Cảnh sát Trung Quốc hu peih bruk chap mek dom sruh kol ngak chung hukum di Bắc Kinh jang yau dua tỉnh miền Đông lac Giang Tô saong Sơn Đông,tame dom labik ngak saong pablei salih vaccine caga COVID-19 ja, cap khik labaih 80 urang saong cap mek labaih 3.000 ống klauk caik bak ia sara. Dom kol  ngak chung hukum nan hu brei thau lac ngak hu rilo bilan, mek hu “kein laba praong”  meng bruk pablei dom ống ia sara haong yaom biak chit.

Iran tok abih dom adit piah hu ginup pandap nguyên tử piah ngak tabiak bom hạt nhân. Ini lac panuac brei thau di urang birau tagok ngak Ngoại trưởng Mỹ Antony Blinken dalam tuk Tehran song Washington jeng daok kandah gauk ka bruk iek gah halei brei ien dahlau. Dalam tuk Iran caong khin Mỹ klaak abih abih dom bruk taong phạt ye Mỹ gilac caong khin taneh ia Iran ngak njauk veik dom bruk tui thỏa thuận hạt nhân 2015 “ Jalan ngak haong agauk abih gah”./.

Urang lang: Thu Thảo -Ái Nghiêm -2/2