ATM tabiak meng nding raok di nhà thờ Tân Sa Châu

Meng tuk tamuh jit ruak mbang 4, nhà thờ Tân Sa Châu labik 387 Lê Văn Sỹ, quận Tân Bình ba pandap mbang tabiak gah langiu ka mikva urang kan kathaot tapa dua mbaik nding raok praong meng katak piah khik salamat bilan jit.

Muk Trịnh Thị Bảy, pablei vé số, daok di quận Phú Nhuận bhian mai mek pandap mbang pak ini khan lac:“Nhà thờ alin pandap biak rilo, min tuk halei jeng hu menuac kateik angaok gauk, dom urang dang tabiak brei pandap biak glaih glar. Meng harei hu nding raok ini mboh biak lagaih, urang cang khol dahlak dang tapak talei blaoh meng palao pandap tabiak, tui nan urang mai mek pandap thau sahneng jang.”

Jaik mon 4 biar harei, muk Bảy taduan hu paok pandap dalam nan hu mì, baoh manuk blaoh samar yam takai tabiak piah ka urang hadei tame taduan mek. Yau nan min, amuk jeng huac baoh manuk tui nding raok meng angaok trun tal tangin muk meda pacah yau nan ye tuk taduan hu pandap blaoh, muk duah labik atah di nan piah lang pandap tabiak iek. Muk Bảy khan lac: “Dom cha xứ biak tani tanat, yaok sa baoh manuk brei papaok sa tal ba-ar nan ye oh pacah. Harei halei nhà thờ jeng brei pandap mbang, bilan jit ve so pablei takik hu. Harei halei pablei oh ginup jien darak ye dahlak mai labik ini nan ye sang dahlak oh daok huac eik tra”.

Lambaok nhà thờ Tân Sa Châu, phó xứ Nguyễn Hoàng Lê Nguyên brei thau, labaih sa bilan ini mai, yaok harei nhà thờ hu klau mbang alin pandap ka mikva urang kathaot. Page alin ahar bánh mì, jala pandiak lisei pa-op, biar harei hu mì, brah atau bei java, njam patam…yaok mbang 400 -500 paok pandap saong hu salih yaok harei.

Mboh bruk alin brei pandap tal tangin urang tuk halei jeng hu bruk meriak gauk, piah khik salamat ka dom urang halan hatian saong ka bhap bini mai taduan mek, nhà thờ sahaneng tabiak bruk ba pandap meng gah dalam tabiak gah langiu nhà thờ meng dom nding raok katak praong.

Lambaok nhà thờ iew bruk alin pandap nan lac "ATM tabiak meng nding raok". Taong abih dom paok pandap nan jeng lac zero đồng, hu dom urang halan hatian parabha jeng kadung sit, mbuan palao tui nding raok tal tangin mikva kan kathaot. Dom urang halan hatian daok gah dalam tacei pato mikva gah langiu dang tani tanat, blaoh buh kadung pandap tame nding raok tuk hu urang dang cang gah langiu. Hadei di yaok 15 minit, urang halan hatian brei thau lac padeih labaih 2 minit piah pruh jru pametai anek ruak pak di labik ini./.

Urang lang: A.Nghiem 12/7/2021