Rilo labik phau khan ka bruk rik dong jien piah blei vacxin 

Jabat taduan raok dom “Hatai ameh” rik dong pacang caga jit Covid-19 di  UBTWMT negar  Việt Nam dom harei ni  tuk halei jeng hu biak rilo kapul nyaom, menuac urang, dom doanh nghiệp, urang ngak pahla mai ba tangin tame haong rajaei pacang caga jit  Covid-19. Ba pok jien 131 triệu đồng di Hiệp hội urang  Việt Nam daok di  Ma Cao (Trung Quốc) mai negar dong pacang caga jit  Covid-19, amuk  Nguyễn Thị Hương brei thau mik va di negar langui bhian tui iek bruk jit ruak dalam negar , cong khin dom rik dong nao tal dom y, bác sỹ, dom urang daok ngak bruk iek ruak, piah rik dong jhul kandun likuk jit ruak.

“Khol hulin hu pambuak bruk hong  Tổng lãnh sự quán Việt Nam song Hiệp hội urang  Việt Nam daok di  Ma Cao piah peih dom mbang taom gaok mik va song tabiak panuac ieu . Mik va jeng biak pachreih tui, kayua rilaow drah  Lạc Hồng di khol drei, tuk halei jeng pamong mai taneh ia. Kayua yau nan ye, khol dahlak hu panuac ieu song mboh hu siam lagaih ”.

Pachreih tui panuac ieu di Akaok negar Nguyễn Xuân Phúc: “taneh ia biak cong hu bruk rik dong pren di yaok rahra”, dom harei tapa rilo jabat, đơn vị hu peih bruk ieu urang jakar, urang ngak di drei yaok urang sa harei jien bilan dong pacang caga jit .Di mintri  Nội vụ, hadei di tuk peih bruk, pataom hu pok jien labaih 430 triệu đồng, tong abih pok jien ni  hu payua tal kadung jien pacang caga Covid-19. Chánh Văn phòng Mintri  Nội vụ, ong Vũ Đăng Minh brei thau:

 “Tong abih urang jakar urang ngak di mintri  Nội vụ pachreih tui bruk ngak tui , cong khin khol drei hu jalan pacang caga jit siam di abih piah pasang iek jit ruak ,ngak habar pacang cakak  jit ruak samar tani tanat rai duik  piah patagok taneh ia . Bruk prong jang lac, pok jien sit min tapa nan brei mboh bruk sangka tal urang jakar y tế di labik daok pacang jit”.

Dom tuk kan kandah di abih lac tuk piah ka yaok rahra brei mboh bruk jum pataom gauk, ba gauk ngak song hu trách nhiệm haong taneh ia, haong bhap bini, Rilo doanh nghiệp song menuac urang hu paglong hatai sahneng jum pataom gauk dong ba gauk, anit ranam urang karei yau anit ranam rup drei eng, “hala siam pacang hala tahaak”. Lambaok dom doanh nghiệp, gilang pariak song menuac urang ndom lac:

  “Hulin sahneng lac bruk daong nan mai meng hatung hatai. Meng hatung hatai mbang dalam tame akaok sahneng di yaok urang Việt. Langui di bruk halan hatain, dom urang hu trách nhiệm njauk ba tangin tame hong rajaei, hong bhap bini ”.

  "Khol hulin cong khin rik dong pren hong bhap bini piah jit prong samar abih,  kinh tế Việt Nam tani tanat, piah dom doanh nghiệp yau khol hulin hu rik dong rilo jang ka karja song abih rahra”.

Brei thau lac pandar njauk bruk, tantu, cambaih laih pok jien bo  doanh nghiệp, urang ngak pahla rik dong tame kadung jien pacang caga jit Covid-19, Phaok Chu tich UBTWMT negar Việt Nam Trương Thị Ngọc Ánh brei thau: Ni lac pren khang biak prong piah blei vaccine klauk ka bhap bini dalam negar, dong ka dom  y, bác sỹ, dom urang ngak bruk iek ruak di dom labik brei dok karei, saong piah blei pandap panda, vật tư y tế duh ka bruk pacang caga jit Covid-19:

“Meng pok jien jak ba hu meng  Trung ương, khol hulin pambuak bruk song mban tacei jalan pakat negar pacang caga Covid-19 khik kajap bruk khik ramik, pandar kadung jien dong di dom  doanh nghiệp, dom urang ngak pahla, pandar njauk bruk saong hu kein laba kadung jien jak ba hu”.

"Pren khang di jum pataom, pachreih tui, tong abih rahra pacang jit " oh lac panuac ndom saoh, bo tapa nan brei mboh bruk  jum pataom, sa ilamu meng kan biak hu yaom glong di bangsa, hu brei mboh cambaih tapa thaot binguk rilo menuac lambaok ka dom doanh nghiệp, kapul nyaom, menuac urang mai rik dong  di UBTWMT negar Việt Nam. Bruk jum pataom gauk dalam tuk kan kandah , dak brei mboh hatung hatian di urang Việt Nam./.

Urang lang : Hanipha- 4/6