Tết ini, dalam baoh sang di urang pala durian pak Đồng Nai tuk halei jeng bak sap klao. Kayua lac thun blaoh, durian hu rilo baoh, oh daok huac bruk yaom kaom tagok trun tuk durian hu pablei tapa negar langiu tui jalan chính ngạch.

 Dalam langik pandiak akaok thun di gah maraong, saai Nguyễn Bảo Ân daok pak phường Xuân Lập, TP.Long Khánh sami samar peih nding pruh ia piah khik tathah ka bein phun durian dalam tuk raong bingu. Dahlau deih, durian pablei ka urang mai blei, yaom oh tani tanat. Thun 2023, bein durian di saai Ân hu pabak mã số bhum pala di jabat chức năng Trung Quốc. Saai pablei ka doanh nghiệp pablei tabiak negar langiu haong yaom meng 40.000-80.000 đồng/kg. Meng yaom ini, bein durian praong jaik 2ha haong nang suat baoh paik hu 20 tấn/ha di saai mek tame hu labaih 1,4 tỷ đồng, laba hu labaih 1 tỷ đồng. Durian urak ini hu labik pablei tani tanat, nan ye saai tok pataom prein tame sangka piah ka baoh durian mek hu tanut chuan, chat luong pablei tabiak negar langiu. Saai Bảo Ân khan lac: "Drei ngak tui panuac ieu bo rahra hu sanya haong doanh nghiệp, njauk mã bhum pala, baoh durian gheih, takik pandar jru hóa học. Tuk baoh ka oh tathak ye khang hatai oh brei urang blei salih atau doanh nghiệp cakak baoh, drei njauk tui iek jalan paik baoh lac baoh hijao, gheih saong ginup tathak."

Meng pala durian bo urak ini rilo urang ngak nong pak ban Long Khánh sang halei jeng praong, siam, hu radaih ô tô, raidiuk trei sir saong oh daok sang kathaot. Di pak ini hu labaih 2.300 ha durian, thun blaoh urang nong hu laba meng 600 triệu tal 1 tỷ đồng/ha. Min, urak ini tok hu 8 bhum pala pak ini hu pabak mã số bhum pala ngan haong mblang taneh praong labaih 345 ha. Kayua yau nan ye, rilo urang ngak nong biak caong hu mbaok tame saong likau pabak mã ini.

Tal urak ini, durian Đồng Nai hu pabak 44 mã số bhum pala ngan haong mblang taneh praong 1.900ha. Thun 2023, Trung Quốc hu pabak ka Đồng Nai 23 mã số. Bahrau ini, Đồng Nai hu nộp harak gar saong daok cang gah Hải quan Trung Quốc pabak, brei tapa 28 mã bhum pala karei ngan haong mblang taneh praong labaih 735ha.

Ong Nguyễn A Vùng – Yam ndok Công ty Xuất nhập khẩu pablei salih Toàn Thắng brei thau, darak pasa durian pak Trung Quốc hu prein khang saong tani tanat meng ini tal 5 thun anak tal.  Bruk hu makna abih lac urang pala njauk khik tani tanat chất lượng. Mayah urang nong paik baoh durian aval ka oh pabak hu chat luong meda ngak kan kandah biak praong tal hatai jia, angan je. Bruk likau pabak mã số bhum pala lac kan, bruk khik hu dak kan jang, mayah njauk mek veik ye biak kan kandah jang. Bruk praong lac jabat chức năng njauk hu jalan pasang iek saong chế tài langyah dom bruk ngak suan. Amuk Hồ Thị Sự, Phó akaok Kapul urang ngak nong tỉnh Đồng Nai brei thau: "Dom baoh sang pala durian mbang tet biak bui sambai kayua hu jien mek tame biak glaong. Gam haong bruk bui sambai nan, drei jeng pathau khan urang ngak nong khik kajap chất lượng, khik angan je  baoh durian Đồng Nai. Gam haong nan, kol drei pambuak haong dom jabat peih bruk pasram, pato tacei dom  ilamo khik tani tanat chất lượng".

Urak ini, mbaok taneh pala durian pak Đồng Nai daok yam tapa tanut quy hoạch nan ye jabat chức năng oh pachreih patagok veik bo pataom prein tame chất lượng, kein laba saong pamaong tal cak rok patagok khang kajap. Sở Ngak nong saong patagok palei pala tỉnh jeng hu paglaong pasang iek bruk urang ngak nong peih ngak catang dom adat di mã bhum pala piah tani tanat tanut chuan pablei tabiak negar langiu. Ong Trần Lâm Sinh, Pho Yam ndok Sở NN&PTNT tỉnh Đồng Nai brei thau: "Kol dahlak meda peih praong mã số bhum pala, paglaong chất lượng di dom mã số bhum pala hu pabak. Nan lac paglaong chất lượng, rilo meng lac paglaong kein laba di yaok gah, dalam nan ngak njauk, khik ginup dom adat, ngak njauk tui dom panuac ieu kakei di negar blei tame. Yaok vụ ye meda pandar kong nghe pala ngak bahrau jang, salamat jang piah khik kajap bruk thau hu asal di nyu."

Thun barau tal mai! Di dom bein durian jeng bak bui sambai di urang ngak nong bahrau mek jien tame hu rilo. Thun bahrau, caong khin di urang pala durian pak Đồng Nai lac meda hu rilo urang kaya mada di bhum taneh bhong gah timun biak glaih glar min anh dũng ini./.