Mai tal xã Xuân Tâm dalam dom harei ini, kol dahlak biak tatuak drei tuk maong mboh dom baoh sang glaong rilo tal praong siam, jalan palei haci hacih saong hu rilo bingu mekre. Angaok dom jalan praong jeng hu caik dom camera an ninh, dom hala ndok bhong meraik par tui ngin, yau brei mboh prein diukrai bahrau di sa bhum palei daok “salih karei mbaok mata”. Hu yau harei ini nan lac jak jeng hadei di sa tukvak suai lavik palei hu pilih ruah padang ngak labik rahra kieu mau. Rilo danak dak hu peih tabiak yau alin taneh piah peih praong jalan palei; “5 oh, 3 hacih”; padang ngak jalan kieu mau “hadah, hajao, hacih, mekre, salamat”,.. jeng hu rahra abih drei hu mbaok tame. Ong Nguyễn Văn Lai, Bí thư chi bộ - Akaok puk 4, xã Xuân Tâm brei thau:  “Meng di tuk peih ngak sarak ka bruk padang ngak labik rahra kieu mau, menuac sia pak ini thei jeng pachreih tui, rik prein haong kanja palei, patagok hu bruk ngak mbang, ilamo, xã hội. Urak ini labik ilamo kieu mau ngak hu bruk dut saong jalan ba tabiak. Dahlak hulin biak hadah mbaok mata ka labik rahra kieu mau di Ấp 4 lac labik njauk daok”

Thun 2014, Xuân Lộc lac huyen camriep abih di taneh ia mek hu tanut chuan palei pala bahrau. Tui jalan lac “Padang ngak palei pala bahrau oh hu labik padeih”, huyện Xuân Lộc hu pataom abih prien khang piah peih ngak dom asal kadha dalam padang ngak palei pala bahrau paglaong. Piah ka danak dak hu jak jeng, ye bruk praong abih lac anek manuac, nan ye njauk paglaong hatai sahaneng di urang jakar saong bol bhap rahra ka bruk palei pala bahrau. Kayua yau nan ye, bruk pathau khan, pato tacei, pasram ngak hu huyện Xuân Lộc maong ini lac bruk hu makna dang akaok. Amuk Nguyễn Thị Cát Tiên – Akaok UBND huyện Xuân Lộc brei thau lac, padang ngak palei pala bahrau lac pamaong tal bruk jien mek tame di rahra hu glaong tagok: "Dalam dom mban, dom gah, dom kapul nyaom, meng huyện tal puk palei saong pathau khan praong dalam tal rahra, tal dom bol bhap rahra piah thau bruk ngak jang yau jalan ba tabiak dalam padang ngak palei pala bahrau kieu mau di huyện Xuân Lộc, piah meng nan, yaok uảng jakar, uảng ndang saong rahra peih bruk pakacah gauk ngak salah bruk ini. Bruk ngak halei jeng lac bruk praong abih, min bruk puac abih di padang ngak meng hu palei pala bahrau kieu mau ye ngak habar raidiuk, mbang ngui, daok dang di rahra dak harei dak glaong tagok saong kein laba nan lac jien mek tame kuhria tui akaok manuac hu glaong jang". 

Xuân Lộc hu bruk ngak nong cak rok patagok, pambak tame dom prein khang nan, huyen hu jhul khang bruk pandar ilamo kong nghe tame bruk ngak, daong patagok nang suat saong kein lagaih tui yaok pandap panda. Huyện hu padang tabiak 24 bruk ngak nong pandar kong nghe glaong, ngak nong tui jalan hữu cơ; rilo bhum ngak pataom gauk, bhum pala phun chuyên canh, pandap panda hu yaom kinh te glaong hu peih tabiak, lagaih haong langik tasik, taneh riya di yaok bhum palei. Njauk ndem tal di abih lac dom bruk ngak iek di HTX njam patam Trường An, HTX padai tangei Xuân Tiến hu jien mek tame meng 300 triệu tal labaih 700 triệu đồng sa ha sa thun. Ong Đoàn Văn Thiện, Akaok Jabat Ngak nong huyện Xuân Lộc khan lac, meng bruk pambuak gauk di rahra bo hu ngak tabiak dom pandap panda hu chat luong glaong, hu dom gah pambuak tal jia tame: "Tal urak ini, rahra pambuak gauk, sa hatung hatai haong gauk ngak tabiak rilo pandap panda, hu chat luong glaong, pabak hu bruk ba tabiak piah mbaoh tangin tame harak pambuak gauk ngak dalam bruk duah jalan pablei tabiak, phun jien buh tame bier jang di darak pasa kayua peih ngak bhum pala, angan je pandap panda, mã pasang iek cambaih asal di nyu. Meng nan, gah pambuak tal jia tame pataom blei pandap panda di mikva urang ngak nong". 

Daok asal kadha negar ka huyen palei pala bahrau paglaong tukvak 2021 – 2025, tal urak ini Xuân Lộc mek hu 9/9 asal kadha, 38/38 jalan ba tabiak. Dalam nan, abih tih 14 xa jeng hu pok brei angan lac mek hu tanut chuan palei pala bahrau. Dalam thun blaoh, huyen hu padang ngak 8 xa mek hu tanut chuan palei pala bahrau paglaong, lac: Lang Minh, Xuân Hiệp, Suối Cát, Xuân Phú, Xuân Trường, Xuân Thành, Xuân Tâm, Xuân Hoà saong padang xã Xuân Tâm mek hu tanut chuan palei pala bahrau kieu mau. Jeng dalam thun 2023 hu 3 xã Lang Minh, Xuân Hiệp, Xuân Phú ngak salah bruk taong yaom veik paok asal kadha palei pala bahrau kieu mau. Gam haong nan hu abih tih dom sang bac dom pakat mek hu tanut chuan pakat negar. Dom labik ilamo, dom gah khau tin truyền thông, y tế jeng mek hu tanut chuan. Dom rahra hu mbaok tame bảo hiểm y tế mek hu jaik 96%. 

Meda mboh lac, meng hatai kham marat glaong saong jalan nao njauk di dom to chuc ndang, kanja, bruk tari tareng, sahneng duah bahrau di rahra hu daong ka Xuân Lộc salih bahrau yaok harei. Thaot binguk ka gah ngak nong hacih, khang kajap di huyen hu brei mboh biak tantu cambaih laih, ngan haong dom jalan nao biak khang kadang, hu rik daong haong taneh ia peih ngak hu bruk ba tabiak lac: “rahra kaya mada, taneh ia khang kajap, mek rahra ngak pasak, samu gauk, hadah hadai, siam makre jang”. Njauk lac haong ilamo meng kan di huyện Xuân Lộc 2 mbang hu pok brei angan anh hùng lac “Anh hùng tapon nyaom bol pan phao kraong” dalam zaman mesuh metak saong “Anh hùng lao động” dalam zaman salih bahrau./.