Meng tuk hu pilih ruah padang ngak labik rahra kiểu mẫu, mbaok mata puk 1, xã Đồng Nơ hu salih bahrau mboh di anak meta. Yaok baoh sang oh lac thau ngak mekre, ngak hijao vil val sang bo daok pakacah gauk ramik ngak pasiam  labik rahra daok, piah padang puk jeng labik hadah ilamo di palei. Gam haong phun jien buh tame meng dom pakat, rahra dalam puk hu rik prein, rik jien tal yaok tỷ đồng piah padang ngak palei pala bahrau paglaong. Pagap yau jalan ĐT756B nao tapa puk hu buh jien tame ngak pasiam, peih praong jalan, yaok piluh baoh sang rahra di dua gah jalan halain hatain yah klaak yaok ratuh met paga, pabah mbang saong rilo phun pala karei bo oh ieu daong hagait.

Ong Ngô Văn Phi, Bí thư Chi bộ, Akaok puk 1 brei thau lac: Tuk peih bruk padang ngak labik rahra kiểu mẫu, yaok urang di puk 1 jeng bui sambai saong pachreih tui dom danak dak, dom bruk ngak; kham marat ngak hacih saat alam môi trường, jumpataom gauk khik caga sron mbon, siam makre. Hadei di tuk hu pok brei angan lac labik rahra kiểu mẫu, rahra biak chreih chrai, bui sambai.

Sang ilamo puk hu buh jien ngak pasiam, dom jalan bê tông hu peih praong,  caik gom điện truac hadah saong pala pabak rilo phun hijao, bingu dom janih. Meng nan, mbaok mata labik rahra di puk 1 dak harei dak hadah hadai, rahra mboh hu siam mekre saong dak iek glaong bruk khik ramik, patagok dom asal kadha di labik rahra kiểu mẫu.

Amuk Hà Thị Thân daok di puk 1, xã Đồng Nơ khan lac: “Kol dahlak biak chreih chrai kayua puk 1 dak harei dak hadah, hijao, hacih, mekre. Sang ilamo praong siam, kol dahlak hu labik taom gaok, ginum biai, hu mblang ma-in pahat rup. Jalan praong siam, rahra dalam puk ba gauk pataom mek nerak, sangka jalan bingu piah yaok harei hu siam mekre jang”.

Peih bruk padang ngak palei pala bahrau paglaong, meng thun 2020 tal urak ini, xã Đồng Nơ jak ba hu labaih 33 tỷ đồng piah buh tame ngak saong pasiam dom asal kadha. Urak ini, 52 jalan atah abih tih jaik 82km hu tuh nhựa saong tuh bê tông. Dom jalan nao mai dom xa hu gom truac hadah saong pala phun hijao ginup abih. Rilo jalan nao mai dalam puk, dalam palei hu peih praong, gam truac hadah hu meng 60-77%. Sang bac, bilai y te hu padang ngak praong, siam, sang ilamo tuk halei jeng dui pachreih hu rilo rahra mai ma-in. Raidiuk di rahra hu salih bahrau saong glaong tagok, jien mek tame yaok tui akaok menuac thun 2022 hu labaih 77 triệu đồng sa urang.

Hadei di 12 thun padang ngak, xã Minh Đức bahrau hu UBND tỉnh pok brei angan chuan palei pala bahrau. Uan tabuan saong mboh hu bruk salih bahrau cambaih laih di abih lac njauk ndom tal urang jakar saong rahra daok di puk Đồng Dầu. Lac puk atah bayah abih di xã Minh Đức min tal urak ini 4 jalan dalam puk hu tuh nhựa saong bê tông, hu gom truac hadah. Sa tangin haong gauk padang ngak palei pala bahrau, rahra dalam puk hu rik tame labaih 1,2 tỷ đồng piah padang ngak sang ilamo, ngak jalan saong dom danak dak ka rahra, duh ka raidiuk di rahra. Ong Nguyễn Văn Minh, Bí thư Chi bộ, akaok puk Đồng Dầu brei thau lac: Mikva mboh hu cambaih bruk salih bahrau mbaok mata di puk palei dut saong dahlau deih meng dom kein lagaih di danak dak palei pala bahrau ba mai. Meng nan, Mban khik ramik puk jeng mbuan jang dalam pathau khan, jak ba padang ngak dom danak dak tui jalan lac Kanja saong rahra ba gauk ngak.

Rik tame bruk ngak ka mbaok mata palei pala Minh Đức hu hadah hadai njauk ndem tal labaih 125km jalan nao mai hu ngak khang kajap; taong abih dom puk palei di xa jeng hu padang ngak sang ilamo praong siam, darak xa jeng hu buh jien tame ngak pasiam, palagaih ka rahra pablei salih. Raidiuk di rahra hu glaong tagok mboh di anak mata, jien mek tame kuhria rah tapa  thun 2022 hu labaih 63,30 triệu đồng sa urang. Minh Đức urak ini oh daok sang kan kathaot. Jak jeng nan brei mboh abih tih phun jiuen jaik 97 tỷ đồng bo Minh Đức jak ba buh tame padang ngak palei pala bahrau patagok  hu siam lagaih./.