Oh daok ngak mbang sit sot yau dahlau deih, tuk peih ngak danak dak padang ngak palei pala bahrau, xã An Hải, huyện Ninh Phước hu quy hoạch 120ha măng tây hijao tui jalan ngak mblang hamu praong. Dalam nan, hu  54 ha pala hữu cơ tui tanut chuan VietGAP saong 10 ha ngak tui jalan kong nghe glaong. Bruk pala mang tay hijao brei jien mek tame tui kuhria rah tapa lac 700 triệu đồng sa ha sa thun, ba bruk ngak ka jaik 100 urang ngak pak ini. Tal urak ini, jien mek tame kuhria tui akaok manuac di xã An Hải hu labaih 54 triệu đồng sa urang sa thun. Ong Hùng Ky – Yam ndok HTX Dịch vụ Tổng hợp Tuấn Tú, xã An Hải, huyện Ninh Phước ndem lac: " Dahlau deih tuk ka oh padang HTX, jien mek tame oh tani tanat, yaok bilan 1 sào tok hu 3-4 triệu min. Tuk padang HTX pala măng tây tui kong nghe bahrau, yaok bilan 1 sào mek tame hu 15 triệu đồng. Thei hu  taneh pala rilo ye jien mek tame dak glaong".

Daok ong Hồ Thanh Phong, Phó akaok UBND xã An Hải, huyện Ninh Phước, Ninh Thuận ye brei thau lac: “Yaom pandap kaya nong di An Hải pataom tame tui jalan pandar kong nghe glaong, paglaong chất lượng. Nan lac jalan ngak ka mikva paglaong jien mek tame, patagok yaom glaong pandap panda angan je di bhum, abih di nyu nan lac phun mang tay hijao.”

Dua thun ini mai, rahra di 2 xã Phước Vinh saong Phước Sơn hu mbaok tame ngak tui jalan pambuak gauk kayua palei pambuak bruk haong gah ngak nong peih ngak, yau pala baoh kandiuk Thái, tangei lai, tangei pajaih, padai pajaih, pala madar pambuak haong raong glang. Tapa jalan ngak ini, daong ka rahra hu thau dom ilamo bahrau, thau ka darak pasa, patagok jien mek tame di mangaok sa mblang taneh ngak.

Tok pala 1ha baoh kandiuk Thái, yaok thun sang ong Nguyễn Ngọc Thiên daok di palei Phước An 1, xã Phước Vinh hu jien mek tame labaih 600 triệu đồng. Ong Thiên brei thau: kayua jalan pala baoh kandiuk hu ngak tui tanut chuan Vietgap saong hu UBND xã pambuak haong dom doanh nghiệp duah jalan pablei tabiak yaom 50 ribau daong sa kg, nan ye sang ong saong rilo sang pala baoh kandiuk di pak ini biak sahanang hatai.

 “Palei ba tame pala pala tui Vietgap mboh biak siam. Tuk camriep dahlak pla 7 sào min. Dahlak mboh gah barak, rahra biak takre nan ye dahlak pala 1 mẫu. Jien mek tame 1 vụ hu 300 triệu, 2 vụ lac 600 triệu. Kaoh abih phun jien lac daok laba 500 triệu.”

Piah peih praong taneh chuyên canh pala madar, ong Nguyễn Thanh Lộc haong 7 baoh sang karei di palei Vạn Phước, xã Phước Thuận, huyện Ninh Phước halain hatain alin taneh ngak jalan, nan ye rilo jalan hu peih praong, daong ka bruk nao mai, pajeng ba pandap hu mbuan lagaih. Di labik ini, dahlau deih tok ngak padai min meng di tuk hu jalan bahrau praong siam, rahra salih tapa pala pala madar. Ong Lê Thanh Lộc ndem lac: “Dahlau daok di akaok jalan, dahlak peih dahlau, hadei di nan hu 7 baoh sang tra, mikva jeng njauk gauk ngak tui. Dahlak ngak hu ye mikva jeng pachreih tui. Meng nan, meng peih ngak. Ngak blaoh jalan ini, thei jeng chreih chrai, bui sambai. Dahlau daih mikva tok ngak padai min, urak ini lac pala madar abih. Ngak hu laba nan ye mikva biak chreih chrai."

Lac palei hu rilo pandap hu angan je, yau: Nho, madar, mang tay hijao, kandiuk, pabe, pabo,… huyện Ninh Phước pataom prein tame pathau khan, jak ba saong daong ka doanh nghiệp, hợp tác xã haong dom labik ngak hu mbaok tame padang chuỗi giá trị pandap panda angan je di palei pambuak haong bhum ngak tabiak tui jalan ngak nong pandar kong nghe glaong, peih praong darak pasa duah jalan pablei tabiak piah paglaong jien mek tame ka rahra. Ong Đàng Năng Tom, Akaok Jabat Ngak nong saong patagok palei pala huyện Ninh Phước ndem lac: cak rok patagok bruk ngak nong pandar kong nghe glaong lac kein lagaih hu makna piah ka bruk ngak nong di Ninh Phước cak rok patagok:  “Di dalam huyện Ninh Phước cak rok rilo  bruk ngak nong hu kein laba lac ngak nong pandar kong nghe glaong. Abih di nyu nan lac bruk pambuak gauk duah jalan pablei pandap panda. Dom pandap panda hu ngak rilo di huyện daok hu khik tani tanat saong peih praong. Ini lac jalan piah cak rok patagok bruk ngak nong pandar kong nghe glaong, rik tame paglaong jien mek tame ka rahra saong peih ngak dom asal kadha di palei pala bahrau dalam huyện."

Meng kham marat dalam padang ngak palei pala bahrau, tal urak ini, jien mek tame kuhria tui akaok manuac di huyện Ninh Phước hu jaik 73 triệu đồng sa urang sa thun. Huyện Ninh Phước daok paglaong bruk daong padang dom bruk ngak, pambuak gauk ngak, pambuak haong Danak dak “Yaok sa xa pandap” saong rami ramik veik gah ngak nong, kham marat tal thun 2025 Ninh Phước hu taong abih 8 xa mek hu tanut chuan palei pala bahrau kieu mau saong ngak salah dom asal kadha di huyen palei pala bahrau paglaong./.