Jeng yau rilo doanh nghiep du lịch lữ hành di Bến Tre, thun 2023, công ty TNHH Truyền thông du lịch C2T (di phường Phú Khương, ban Bến Tre) ngak bruk hu siam lagaih. Dalam thun, cty hu rok labaih 200 kapul tuai mai rivang iek, jien mek tame rilo jang labaih 30% dut saong thun 2022.

Bruk karei abih di công ty TNHH Truyền thông du lịch C2T lac ba tuai nao gilai rivang iek rah tui 4 kraong praong di tỉnh Bến Tre lac kraong Tiền-Hàm Luông-Ba Lai- Cổ Chiên, mbang dom pandap mbang di bhum kraong ia saong kaya nong di urang ngak nong pak ini ngak tabiak. Ong Võ Văn Phong, Yam ndok công ty TNHH Truyền thông du lịch C2T khan lac:“Meng jalan ngak karei saong thau hu hatai caong di tuai. Drei thau tuai tuk nao tuor, urang nao tour biak njauk hatai. Tuai hu ayut sahabat saong gauk gar mboh lagaih nan ye tacei nao tuor di drei. Drei salih tui hatai caong di tuai damuai, hadei di jit praong covid-19 urang hu jalan nao ma-in karei njauk hu bruk ngak bahrau.

Tui Sở Ilamo – Thể thao saong Du lịch tỉnh Bến Tre, meng hadei di jit ruak Covid-19 padam trun ye gah du lich pak ini hu pasiam veik khang. Thun 2023, tỉnh rok hu labaih 2,2 triệu tuai atah jaik, mek hu labaih 170% jalan ngak di thun. Bruk njauk mayai nan lac hu jaik 400 ribau mbang tuai dunya, tagok labaih 430% dut saong thun blaoh.

Mai tal Bến Tre, tuai damuai hu daok dalam labik langik tasik la-an bingi di mala halui kayau, hu maong iek dom labik inem krung ilamo sajarah. Saai Lê Hữu Phước, tuai mai meng Tp. Hồ Chí Minh brei thau:“Dahlak caik hatai di abih lac jalan Hồ Chí Minh angaok tasik, dom sruh gilai oh hu laik saong labik danei angan gah kaya tasik, danak dak ndien hangin. Langik biak lahơi bingi, dahlak meda mayaih khan tal ayut saabat, gauk gar di dahlak mai pak ini rivang iek, padeih padai hadei di dom harei bac taa, ngak bruk glaih glar”.

Dalam dom thun jaik di ini, du lịch sinh thái ngak nong di tỉnh  Bến Tre hu caik hatai sangka, cak rok patagok ngan haong rilo janih, pandap du lịch daok hu peih ngak yau ye: Du lịch rivang iek dom bein mbang baoh, bein li-u, bhum ngak tabiak phun pajaih – bingu kiểng, rivang iek dom bruk ngak nong kong nghe glaong; rivang iek, ba drei tame dom palei ngak meng kan.  

Dalam tuk Tết dương lịch 2024 meng blaoh, dom labik, dom doanh nghiệp ngak mbang gah du lịch di tỉnh Bến Tre hu kuhria caga biak tani tanat piah pabak ka tuai damuai. Yaok thun meng ini tal hadei Tết meng kan lac tame tukvak tabung glaong di bilan du lịch; dom paok khuyến mãi, danak dak pabak ka tuai mai rivang hu dom kapul peih ngak piah “bui hatai tuai mai, njauk hatai tuai nao saong pagun sanya harei mai veik”. Ong Châu Hồng Luật, Yam ndok công ty TNHH Du lịch Miền Quê di xã An Khánh, huyện Châu Thành, tỉnh Bến Tre ndem lac: “Công ty du lịch Miền Quê ba tabiak danak dak dui pachreih du lich, hu dom khuyến mãi ka tuai damuai. Pagap yau trun yaom, patagok jit vu jang ka tuai. Dahlau deih nao rivang iek dom kaoh ye urak ini daok hu ba tuai nao paha Liên Hoa tỉnh Tiền Giang min yaom jien oh tagok. Pandap mbang ye drei daok duah dom pandap mbang mbuan ngak tui hatai caong di tuai”.

Dalam tỉnh Bến Tre urak ini hu 32 doanh nghiệp ngak mbang gah dịch vụ lữ hành. Bruk njauk menyai di palei li-u lac hu tal 57 palei ngak dui pachreih hu tuai mai rivang iek.. Taphia di nan, hu 244 pandap OCOP mek hu 3 patuk tagok. Bến Tre daok hu 2 labik inem mek pakat negar biak karei, 16 labik inem mek pakat negar saong 60 labik inem mek pakat tinh lac labik nao tal di tuai atah. Ini lac dom prein khang piah ka Bến Tre cak rok patagok gah du lịch. Saong piah patagok hu dom prein khang ini ye Bến Tre meda paglaong chất lượng dom tour du lịch, gam haong nan, brei buh jien tame cak rok patagok dom cơ sở hạ tầng pabak ka bruk ngak du lịch.

Meng dom kham marat nan, jia lac gah du lịch tỉnh Bến Tre daok cak rok patagok, ngak jeng bruk angan je karei di “Du lịch palei li-u”  hu biak rilo janih, rilo pandap du lịch dui pachreih, gheih mekre piah duh ka hatai caong dak harei dak glaong di tuai mai rivang iek dalam saman mbeik drei yam tame dunya saong cak rok patagok./.