Drei menuk kiến, njam dớn, njam ngót, bắp chuối, meriak  xiêm glai… hu parang pablei di siêu thị Big C Đà Nẵng lac dom pandap kaya nong di urang  H’re, daok di huyện Sơn Hà, tỉnh Quảng Ngãi. Dahlau deih, dom janih đặc sản ni, urang di ban prong khin mbang njauk ieu menuac krein nao tal labik blei bloh payua mai. Urak ni tong abih hu pablei dalam siêu thị.

Muk  Trần Thị Hoa, dok di  quận Hải Châu, ban  Đà Nẵng, biak takre tuk blei dom  đặc sản glai di siêu thị Big C Đà Nẵng: "Njam ni lac njam glai, hulin takre blei njam glai mbang bingi. Njam di langiu pasa biak rilo, min hulin jia tame  Big C hu palih ruah dom janih njam bo urang takik pandar jru halak, nan ye hulin jia hatai blei ".

Dom janih kaya nong yau njam glai,  bắp chuối, meriak xiêm,... hu nyaom urang nong paik di angaok glai, hadei di nan palih ruah, tame kadung ba nao pablei. Ong Đinh Quốc Khánh, daok di xã Sơn Hạ, huyện Sơn Hà, brei thau: drei menuk  kiến di urang  H’re hu rong palao dalam glai, pandap mbang hu tangei, haleik, mì song  trùn quế. Bruk rong hu ngak tui tanut rong glang an toàn sinh học." Meng di tuk pandap di khol hulin hu ba tame siêu thị, pablei drei menuk  hu kein jang 2, 3 pluh ribau đồng. Hulin mboh bui sambai " - ong Khánh lac.

Di  huyện Sơn Hà urak ni hu  20 boh sang dok di dom  xã Sơn Hạ, Sơn Thành song Sơn Trung pabha tabiak jeng 3 nyaom rong glang menuk kiến, pala njam glai song njam hacih. Ong Phùng Tô Long, Phó Chủ tịch UBND huyện Sơn Hà, brei thau, tong abih pandap kaya nong dahlau di tuk ba tame siêu thị hu pasang iek chất lượng, oh kandong labaih dom janih jru mek song khik hacih saat pandap mbang.

Bruk ba dom janih pandap kaya nong di urang H’re tame pablei di dom  siêu thị prong di bhum kreih negar lac bruk kham merat biak prong di mban khik ramik  danak dak patrun kathaot  Tây Nguyên huyện Sơn Hà song Dự án Jalan ngak mbang duah jien ka bhap bini di Tập đoàn Central/Big C Việt Nam. Jalan nao ni hu dong ka urang nong ba drei tame darak pasa, paglaong yaom kaya nong, patagok jien mek tame ka urang nong./.

Vinh Thông/VOV-Miền Trung