-Tui rilo sang pala amraik kalu dalam huyện Châu Đức saong  Xuyên Mộc tỉnh BRVT, bilan amraik kalu thun ini lingik siam lagaih  nan ye phun amraik kalu caikrok siam, takik ruak kik halak lin, baoh hu rilo jang duk saong bilan amraik kalu thun dahlau. Urak ini urang nong daok pruh jru khik siam ka phun amraik kalu. Min yaom amraik kalu daok trun ngak ka urang pala amraik kalu duh hatai, mbang ndih oh bingi, abih di nyu nan lac dom sang pala barau. Tapa duah thau, ngan soang yaom meng 57 - 60.000 đồng/sa kg lac dom sang pala amraik kalu meng 5 thun tagok jeng daok hu laba min takik, daok dom sang barau pala lac khat kayua jien buh tabiak akaok mereip ka phun amraik kalu biak glaong, oh hu jien piah buh tame ka bilan pala barau.

-Ông Nguyễn Hoàng Phương, daok di palei Tân Hòa, xã Bàu Chinh, huyện Châu Đức duh hatai lac: thau lac khat min ông oh klaoh hatai kaoh klak kayua jien buh tame biak rilo, pren pasang iek ka beir amraik kalu jeng rilo. Urak ini ông Phương daok kham merat khik ka beir amraik kalu dua hecta pala hu 4 thun di drei. Ông Phương brei thau, dua thun dahlau, yaom amraik kalu meng 150-170.000 đồng/sa kg, sang ông mek tame hu jaik 500 triệu đồng, urak ini yaom lac sản lượng tagok rilo jang min tui yaom yau urak ini, sang ông meda khat jien khak, jien jru, pren pasang iek: “Yaom yau nan biak kan kandah, kayua phun jien buh tabiak glaong,bo yaom lac bair biak rilo, kaoh tabiak pren ngak, khak drak, jru khik caga phun pala lac urang nong tok khat, bo oh klak hu njauk kham merat tui pala phun amraik kalu.

  -Ngan saong dom sang barau pala meng 1-2 thun ye yaom amraik kalu yau urak ini daok ngak  ka urang mboh biak duh hatai, tuk jien buh tame ngak, pren pasang iek glaong jang biak rilo duk saong dom beir livik thun. Yau ye ông Nguyễn Hữu Huệ, daok di xã Đá Bạc, huyện Châu Đức, dom thun dahlau diah, tuk cao su laik yaom, mboh rilo sang pala amraik kalu dalam bhum ngak hu kein laba, yau nan ye thun 2014, sang ông Huệ salih 1 ha cao su tapa pala amraik kalu. Kayua beir amraik kalu barau nan ye năng suất, sản lượng daok bair, yaom amraik kalu gilac trun yau nan ye ông Huệ tok mek tame hu labaih 40 triệu đồng, dalam tuk dahlau di nan ông njauk padang harak gar sang danaok labaih 100 triệu đồng piah buh tame ka bein amraik kalu:“Thun ini kayua yaom trun yau nan ye bhapbini mboh biak duh hatai kayua buh tame blaoh njauk lac dalam sang oh ginup jien njauk nao mesriay gilang pariak bo mesraiy ye 1 thun lac bayar. Kayua yau nan ye yaom amraik kalu trun bier jeng gaok rilo kan kandah abih janih. Kayua tal vụ hadei njuak buh jien tame ngak veik oh klak hu.”

.

  -Tui kuhria mboh dahlau di kapul amraik kalu tỉnh BRVT, yaom amraik kalu daok di tanut bier meng ini tal abih thun 2019. Makna lac kayua taneh amraik kalu dalam taneh ia jeng ye di BRVT nyu tagok tapa quy hoạch, kuhria ta-eng dalam tỉnh hu 11 rabau ha pala amraik kalu, dalam tuk quy hoạch lac 7 rabau ha, ba tal cung tapa cầu. Amuk Nguyễn Thị Ngọc Dung, akaok kapul amraik kalu tỉnh brei thau, di BRVT oh pachreih mikva patagok taneh pala kayua darak pasal nyu daok bão hòa. Tui kuhria mboh dahlau, meng 4-5 thun tra yaom meng meda jhul tagok hu.

-Bruk cung tapa cầu ba tal yaom trun lac bruk oh plaih hu. Min, yaom amraik kalu trun daok hu makna lac kayua mikva jeng daok pala tui jalan quảng canh, nduac tui năng suất, sản lượng bo oh sangka rilo tal kỹ thuật ngak ka chất lượng amraik kalu oh pabak hu dom tiêu chuẩn tuk pablei nao dom darak pasal praong di negar lingiu.

 - Ông Hồ Phúc Tiên, Phó giám đốc Sở ngak nong saong patagok palei pala tỉnh BRVT brei thau, tỉnh daok peih ngak đề án daong urang nong pala drak, urang pala amraik kalu meda hu 50% lãi suất di gilang pariak piah padang dom bhum pala amraik kalu, dalam nan meda caik ngak dahlau ka dom xã palei pala barau.: “Barau ini tỉnh BRVT jeng hu dom sarak ka dom xã palei pala barau meraiy jien ngak dự án. Urak ini, daok yaok iek veik piah ba tagok  Sở jien padai ngak dom mô hình ka dom sang urang nong, karja meda daong meteh jien laba mesaiy di gilang pariak piah urang nong blei jamraik, pandap, pajaih….

-Bruk yau Yuan lac “được mùa mất giá”; “mất mùa được giá” jeng daok lac bruk having akaok oh ta-eng hagait ka amraik kalu bo daok ka rilo janih phun pala, kaya raong karei. Piah pandap ngak tabiak gam njauk, gam hu yaom tuk halei jeng lac bruk kan bo gah ngak nong njauk duah tabiak jalan langyah piah daong ka urang nong ngak mbang khang kajap, tani tanat saong paglaong raidiuk./.