Ong  Võ Văn Thạch, dok di palei  Bình Hòa, xã Bình Châu, huyện Xuyên Mộc brei thau, ong hu  1 kapan pasei ngak tui Nghị định  67 hu angan  BV 96279, pren khang 1.300 mã lực. Hadei di tuk ngak bloh sruh  kapan , ong Thạch hu dong blei bảo hiểm rup kapan di  Công ty bảo hiểm PJICO Vũng Tàu.

Kapan di ong Thạch hu tabiak tasik tong  chap meng bilan 8/2017, tal puac thun 2017 sruh kapan nan paok tame sa sruh kapan tong ikan karei  ngak brei jaoh lan can cabin, cong be pacing riyak. Ong Thạch hu khan brei thau song  công ty bảo hiểm jeng hu mai pasang iek, bloh pandar ong  ieu jeing mai iek dom labik khut, brei thau yaom jien pasiam veik. Gah jeing, hadei di tuk iek bloh, brei thau yaom pasiam veik dom khut khat di kapan lac  65 triệu đồng, min gah bảo hiểm oh njauk hatai, lac yaom glong. Ong Thạch ieu công ty bảo hiểm duah jeing karei, mbang ni yaom pasiam vek lac  34 triệu đồng. Bảo hiểm pandar po kapan buh jien tabiak pasiam veik, hadei di nan, gah công ty taong yaom veik bloh ngak harak gar bayar veik ka po kapan  . 

Min, mbiah tal harei ni  oh ka hu bruk njauk gauk di dom gah pablei bảo hiểm, cơ sở pasiam veik SAONG urang tong ikan, daok ong  Thạch oh hu jien piah pasiam veik nan ye kapan dok pataok di angaok thu. Ong Thạch brei thau: “klau gah ngak harak sinya ka  chất lượng pasiam veik , min  bảo hiểm ndom lac  oh hu  biên bản yau nan , hulin lac rahra oh thau habar . Ieu jeing  cơ khí ngak min brei hu hóa đơn đỏ meng hu bayar jien. Khut hasit bo nao Sài Gòn ngak, jien mbang huak, nao mai thei bayar ini. Thun  2018 tabiak tasik hu  2 mbang bloh ndih angaok thu mbiah tal harei ni, urak ni abih tukvak bảo hiểm jeng oh kha pasiam veik song oh ka blei bảo hiểm veik.  ”.

Dok saai Nguyễn Trường Quang, dok DI palei  Phước Lâm, xã Phước Hưng, huyện Long Điền lac po di 2  kapan kanduh pasei  ngak tui Nghị định 67 song 2 kapan  jeng  blei  bảo hiểm di  Công ty bảo hiểm PJICO Vũng Tàu, yaom blei labaih  361 triệu đồng/sa thun/2 kapan. Dalam nan, karja dong  90% (tui Nghị định  67) nan ye jien  bảo hiểm saai buh ka ka  2 kapan lac  jiak  40 triệu đồng. Bilan 4/2017, 2 kapan di saai  khut takai da . Saai hu khan brei  công ty bảo hiểm trun iek . Gah công ty bảo hiểm jeng pandar saai buh jien tabiak pasiam veik, hadei di nan gah  bảo hiểm bayar veik.

Taong abih 2 sruh kapan saai njauk bayar jien pah dui meng lingiu tasik tame, jien menyek ka kapan dui tame, jien blei takai da bahrau song jien pah jeing pasiam veik ka 2 sruh kapan  lac  204 triệu đồng. Min, urak ni saai Quang jeng oh ka hu  Công ty bảo hiểm PJICO Vũng Tàu bayar jien. Saai Quang njauk ngak đơn  payua Sở ngak nong song patagok palei pala, Gilang pariak ngak nong tỉnh Bà Rịa- Vũng Tàu likau dui atah tuk vak bayar sre, payua đơn likau dong ka bruk bảo hiểm suai bayaR. Anh Quang lac “Kasa lac cong khin bảo hiểm samar bayar piah hu jien blei bảo hiểm bahrau, ka dua kan kandah oh tabiak tasik hu nan ye likau karja, dom gilang pariak dui atah tukvak ka hulin bayar sraiy dalam dom thun, tal tuk duah hu jien ye bayar jien phun, dok urak ni likau bayar jien bala”

Ni lac 2 dalam dom  urang tong ikan ngak kapan tui Nghị định 67 di  tỉnh Bà Rịa-Vũng Tàu brei thau gaok kan kandah tuk ngak harak gar ka bảo hiểm bayar jien.

Anak bruk ni, rilo urang tong ikan ngak kapan tui Nghị định 67 pok panuac lac hu palih ruah  công ty bảo hiểm piah blei  bảo hiểm ka kapan di drei. Kayua tuk vak jiak di ni, bruk tong chap ian gaok rilo kan kandah, jien duah hu takik nan ye urang tong ikan jeng hu panuac likau karja brei ka mik va đóng yau yaom  đóng bảo hiểm klaak  di Nghị định  67, nan lac urang tong ikan dóng  10%, karja dong 90%.

Ndom nyai song khol hulin, ong Nguyễn Hữu Thành, Phó Chi cục trưởng Chi cục Thủy sản tỉnh Bà Rịa-Vũng Tàu brei thau, tuk vakjiak di ni, tapa dom mbang taom gaok mik va urang ngak ikan, hu biak rio  panuac di

mik va ngak kapan tui Nghị định  67 pambuak tal bruk gah  công ty bảo hiểm ngak “kan kandah ”urang tong ikan. Ong Thành lac  “Urak ni,  bảo hiểm di drei  meda lac yau  độc quyền, tok hu sa đơn vị pablei min, nan ye mik va dok dut hatai, biak suai bayar. Hu panuac likau ka mik va blei  bảo hiểm song palih ruah labik siam ye blei.  Sở ngak nong  jeng hu pok panuac tagok Mintri jien padai brei ka mik va hu  quyền palih ruah min tal urak ni jeng oh ka hu panuac javap jalei di gah chức năng”.

Anak bruk ni, khol hulin hu ndom biai song gah Công ty Bảo hiểm PJICO Vũng Tàu. Ong Nguyễn Văn Năm, Phó Giám đốc Công ty Bảo hiểm PJICO Vũng Tàu brei thau, po kapan tuk kapan khut brei pabak ka gah công ty bảo hiểm piah ngak hồ sơ, dalam nan hu dom janih harak gar yau : harak  đăng ký, đăng kiểm kapan,  harak adat tong chap ; sổ hành trình; angan thuyền viên, thuyền trưởng, máy trưởng di kapan tui dom mbang tabiak tasik: “Tui quy định po kapan  brei pabak  ginup hồ sơ, dahlau deih  PJICO Vũng Tàu hu brei bruk langyah  dom bruk 50 triệu, urak ni lac 20 triệu min, Bruk brei  langyah  oh tapa 15 – 20 harei ”.

Tapa dom bruk nan, piah khik kajap bruk ngak song quyền lợi di dom gah, jabat  bảo hiểm njauk khan brei thau ginup tal urang tong chap ikan dahlau di tuk mbaoh tangin tame harak  hợp đồng. Karja jeng njauk caik ka urang tong ikan palih ruah labik blei bảo hiểm hu dịch vụ siam di abih  piah urang sahanang hatai ngak mbang./.