Dom thun dahlau, jaik 500 baoh sang raong ikan bè angaok kraong Chà Và, xã Long Sơn, ban sit Vũng Tàu daok duh hatai kayua bruk ikan metai rah tabiak gam gam kayua halau aia njom nerak trak. Hu rilo sang drap ar oh daok hagait, klaak bè tagok ar duah bruk karei ngak mbang. Palei ngak ikan bè Long Sơn meng nan si lahik abih. Yau nan min, meng hatai kham merat mek veik môi trường hacih sa-at ka palei ikan bè Long Sơn, tỉnh Bà Rịa Vũng Tàu kham merat ngak catang bruk panduan ba 21 labik ngak kaya ikan dalam aia tathuak nerak tachauk tabiak ngak ô nhiễm tabiak truh khu vực, peih bruk pasiam veik baoh mbraong ka 6.

Tapa dua thun kham merat xử lý, tal urak ini halau aia dalam kraong Chà Và hu siam veik. Gam haong nan, karja palei saong gah thủy sản jak ba mikva raong palao njauk tui bruk ba tabiak, juai raong tapal dom janih ikan hu yaom yau: ikan chim, bớp, mú, hào saong hadang … nan ye oh daok mboh bruk ikan metai rilo, chất lượng dom janih ikan jeng hu tagok. 

Ong Phạm Văn Toàn, urang jakar ngak nong xã Long Sơn, ban sit Vũng Tàu brei thau, oh ka thau cambaih hu hadom baoh sang raong ikan bè pak ini, yau nan min urak ini hu jaik 700 baoh sang raong pataom gauk di labik kraong Chà Và, raong dom janih yau hào, ikan chim, ikan bớp hu chất lượng. Bruk ikan metai rilo oh daok rah tabiak yau 2 thun dahlau: “Meda lac 2 thun mai veik  ini khaol dahlak ngak biak khang dom sang mac tathuak nerak tachauk, mbraong ka 6 jeng oh xả thải gam gam yau dahlau. Aia oh daok njom nerak rilo yau dom thun dahlau diah. Meda lac hu ikan metai min oh metai rilo saong gam gam yau dom thun dahlau”.

    Ong Nguyễn Công Biên, urang daok di palei 4, xã Long Sơn brei thau, meng  halau aia hu pasiam veik nan ye chất lượng ikan jeng hu tagok, yaom ikan pablei glaong jang dut haong dahlau diah meng 60 – 70 ribau đồng/kg. Thun 2018 ong Biên mek hu 200 tấn ikan bớp saong ikan chim, hadei di tuk kaoh abih jien buh tame ong daok laba hu labaih 1 tỷ đồng: “Urak ini ikan praong siam samu gauk, ruak takik jang 2 thun dahlau biak rilo. Yaom kaom anak meta jeng grap tanat, lô ikan 2017 – 2018 pablei hu yaom biak glaong. Ikan bớp pablei hu 215 ribau/kg daok ikan chim hu 205 ribau/kg, dut haong thun 2016 – 2017 ye thun 2018 yaom glaong jang 70 ribau đồng/kg”.

Daok sa-ai Võ Thị Diệp Thúy, urang daok di palei 1 xã Long Sơn, ban sit Vũng Tàu khan lac: sa-ai kak kajap haong bruk raong hàu labaih 5 thun ini mai, nao tal Nha Trang atau dom tỉnh jaik taphia oh hu labik halei hu halau aia laghaih yau pak ini. Kayua yau nan ye, meyah khik hu môi trường aia siam suai lavik ye  bhap bini biak sahanang hatai ngak meda meng bruk raong hàu: “Ia pak ini biak laghaih, dahlak hu nao tal rilo labik min aia di dom labik karei oh raong hu hàu, tok hu mboh di Long Sơn meng raong hu hàu biak siam, di Nha Trang raong jeng oh siam yau di Long Sơn. Sản lượng tabiak ye chất lượng jang, drei hàu drei raong jeng samu bilan drei hàu urang raong min drei hào pak ini katil rilo jang yaom lac drei prong nde gauk”.

          Ong Nguyễn Hữu Thi, Akaok Jabat khik iek raong pala kaya ikan dalam aia, Chi cục raong pala kaya ikan tỉnh BRVT brei thau, meyah jalan saneng di urang raong hu patagok gam haong hatai kham merat di tỉnh dalam bruk ngak hacih môi trường raong ye tukvak anak tal aia meda hu siam jang rilo mbang: “Bruk ini pambuak pagam rilo janih, dalam 2 thun mai ini bruk tuh nerak tachauk tabiak hu pacang cakak, daok dom jalan tathuak ia nerak bahrau jeng hu xử lý chip meng akaok, mek mẫu định kỳ môi trường ye aia daok siam tagok. Ngan haong bruk rah tabiak yau ini gam haong kadha pambuak bruk di mikva saong kham merat di karja, dahlak jia lac aia dak harei dak siam jang”.

Mai veik palei ikan bè Long Sơn, tỉnh Bà Rịa-Vũng Tàu dalam dom harei akaok thun 2019, khaol dahlak mboh bui sambai haong urang raong ikan pak ini kayua lac, ikan, hadang dalam bè urak ini oh daok metai tra meng aia kraong pak ini dak harei dak hu siam tagok.  Sa palei bè harei halei nan ngak ka rilo manuac urang lahik abih jien padai, drap ar, urak ini daok diuk veik./.