Bruk Công ty Mariana Châu Pha daok padang ngak sang danaok suan hukum dalam labik khik caga salamt di danao

Tui Sở ngak nong saong patagok puk palei tỉnh Bà Rịa Vũng Tàu, tapa mbang pasang iek di puac bilan 4 meng blaoh hu mboh mboh labik danao Suối Đá (dalam xã Châu Pha, ban sit Phú Mỹ) labik gah angaok njauk lih mek taneh piah pala phun, gah la ye njauk kuac raok taneh, padang ngak dom baoh sang kathaom. Labik cống mek ia njauk lih mek padang ngak sang hu gheng pasei, gah hanuak cống mek ia njauk lih mek padang ngak paga bê tông saong paga pasei … Di labik taoh ia jeng njauk lih mek piah ngak tatua, lih mek ribaong piah ngak labik caluai ia. Dalam danao hu sa gò tambok glaong kayua menuac ngak, dom jamriak kuac, radieh tải pajeng daok koa pasamu mbaok taneh …

Ong Lê Văn Lâm, akaok UB bhap bini xã Châu Pha, ban sit Phú Mỹ brei thau: danao Suối Đá hu UB bhap bini ban sit Phú Mỹ jao ka xã khik ramik, urak ni karja mbaoh tangin pambuak bruk haong công an xã ka bruk jao mbaok ia piah raong ikan duah kein laba. Min, bruk Công ty Mariana Châu Pha daok padang ngak sang danaok suan hukum dalam labik khik caga salamt di danao, ong Lâm oh thau hu kayua bahrau salih mai ini ngak bruk: “Dalam bruk tui iek di xã tal halei ye pabak harak gar tal nan, kayua dahlau daih oh thau hu bruk ni. Kayua yau nan ye dom harak gar hukum pambuak tal meda hu gah taneh riya, karja palei pabak ginup khau tin”.

Tui ong Trần Văn Hiếu, akaok Chi cục Thủy lợi saong jabat pacang caga rabuk ia sua tỉnh Bà Rịa – Vũng Tàu ye di labik binek Suối Đá hu doanh nghiệp Marina Châu Pha daok ngak dalam labik khik caga danak dak thủy lợi. Min, tal vaktu ni doanh nghiệp ka oh hu UB bhap bini tỉnh Bà Rịa – Vũng Tàu brei adat peih bruk zirah main di labik danao Suối Đá: “Min tal urak ni doanh nghiệp ni jeng ka oh hu brei adat, kayua yau nan ye dom bruk ngak di kapul ni di binek Suối Đá lac ngak suan adat. Daok bruk ngak gò nổi ye njauk tapa jabat taong yaom saong brei adat, ka dua lac brei hu gah khik iek danao brei ngak meng hu ngak dom harak gar”.

Meng thun 2017 tal urak ni, Sở ngak nong saong patagok palei pala tỉnh Bà Rịa – Vũng Tàu hu rilo mbang mboh doanh nghiệp padang ngak suan, lih tame labik khik caga salamat danao. Bruk ngak suan di doanh nghiệp jeng hu khan ka ban sit Phú Mỹ piah langyah, min, oh thau njauk hagaih bo tal urak ni bruk nan jeng daok rahtabiak. Ong Trần Văn Cường, Yam ndoc Sở ngak nong saong patagok palei pala tỉnh Bà Rịa – Vũng Tàu brei thau: “Jeng daok rahtabiak bruk padang ngak suan adat nan ye Sở ngak nong saong patagok palei pala ieu kakei ban sit Phú Mỹ lac gah khik ramik danao  njauk brei padieh dom bruk padang ngak suan hukum tal tuk halei bo UB bhap bini tỉnh brei adat meng peih ngak. Patui di nan khol dalak ieu kakei ban sit Phú Mỹ njauk langyah catang bruk ni”.

Daok gah karja palei, ong Nguyễn Văn Thắm, akaok UB bhap bini ban sit Phú Mỹ brei thau lac daok samar pato tacei ban sit taong phat dom doanh nghiệp ngak suan di danao Suối Đá. Gam tui di nan pato tacei UB bhap bini xã Châu Pha padieh bruk brei pah mbaok ia piah raong ikan di danao.

Tui parabha pakat di UB bhap bini tỉnh Bà Rịa – Vũng Tàu, danao Suối Đá hu jao ka UB bhap bini ban sit Phú Mỹ khik ramik, ba pandar di thun 2005 ngan haong bruk padang ia saong pabak ka bruk pruh ia pala drak. Min, bruk khik ramik danak dak nikarja palei ngak cadu. Rilo bruk ngak suan ka oh hu langyah nan ye bruk lih mek labik khik caga salamat binek daok rahtabiak dalam rilo thun ni mai. Kayua yau nan ye, karja tỉnh Bà Rịa – Vũng Tàu njauk samar pasang iek, lanyah ka nyu salah blaoh dom bruk ngak suan nan piah piyar viek mbaok danao yau dahlau piah khik njauk bruk di nyu lac khik piah ia, pruh ia ka mikva bhum jaik taphia./.

Urang lang: Thu Thảo – 19/06/2020