Thứ trưởng Mintri Y tế Đỗ Xuân Tuyên bahrau mbaoh tangin tame harak ka bruk taduan mek, khik piah, parabha saong ba pandar 4.886.600 mbang vaccine caga Covid-19 vaktu 2021-2022 kayua COVAX Facility daong brei. Dom kapul urang klauk vaccine Covid-19 hu rami ramik tui tanut dahlau hadei iek tui bruk jit ruak saong tui bruk pabak vaccin oh ka hu rilo di Việt Nam.

Bier harei kabroi 23-2, lô F chung cư Carillon, ka 1 jalan Trần Văn Danh, phường 13, quận Tân Bình- ban raya HCM hu yah klaak adat pacang cakak. Ni lac labik pacang cakak puac di abih di ban raya hu pambuak tal COVID-19. Dahlau di nan, abih tih rahra daok di tal 15 lô F di chung cư tapa dut iek mboh âm tính haong COVID-19. Tui pasak pacang ruak kik ban raya HCM (HCDC), tui kuhria tal harei 23-2 ban raya hu 12 harei oh mboh urang halei njom mbak dalam rahra. Piah pacang caga jit, ban raya patui veik peih bruk pathau khan, mek mẫu dut iek dom urang mai meng bhum hu jit saong dom labik brei daok paatah di gauk, mek mẫu ngẫu nhiên urang meng dom tỉnh ban karei mai ban raya di mblang kapar haoh, mblang radaih pui, mblang radaih, bilai y tế, labik công nghiệp – labik chế xuất...

Harei 23/2, urang pan akaok UBND ban sit Đà Nẵng hu jao Harak dak angan inem krung pakat ban ka inem mek Chăm Phong Lệ brei ka lambaok karja saong bhap bini phường Hòa Thọ Đông, quận Cẩm Lệ. Tapa kuac raok brei mboh, ini lac 1 danak dak praong daok dalam dom bimon Cam di gah kreih negar drei. Dom inem krung, pandap panda hu duah mboh hu brei mboh cambaih laih ka bruk bruk mbang ngui, daok dang, kinh tế, xã hội, ilamo di urang Cam di bhum taneh Amaravati meng abap X - XII. Abih di nyu nan lac, bruk duah mboh “Hố thiêng” daok tamo dalam bimon lac sa bruk duah mboh bahrau, hu makna ilamo biak praong dalam bruk khảo cổ, pasang iek ngan haong dom kiến trúc saong gah ilamo Cam daok rilo bruk ka oh thau hu. Đà Nẵng urak ni hu 2 inem krung pakat negar hu makna biak praong, 17 inem krung pakat negar saong 60 inem krung kapat ban, dalam nan bahrau hu Di chỉ khảo cổ Chăm Phong Lệ lac janih inem krung khảo cổ. Bruk ni brei mboh dom yaom glaong hu makna biak praong saong angan je di inem krung ni.

Di tỉnh Tiền Giang, dalam bhum hu abih tih labaih 15.500 ha padei pathak daok cang yuak saong tal harei 22/2, bhap bini hu yaok hu jaik 4.000 ha, năng suất tui kuhria mek hu 65,3 tạ/ha saong sản lượng yaok padei mek hu jaik 25.000 tấn. Bruk njauk uan tabuan lac padei Đông Xuân daok hu yaom, bhap bini hu jien laba glaong jang vụ Đông Xuân di thun dahlau yau nan biak biak bui sambai. Tapa pasang iek di gah chức năng brei mboh, yaom padei bo gah pablei salih blei di tanut mangaok 8.600 đồng/kg padei, glaong jang vụ Đông Xuân 2019–2020 meng 1.900 đồng tal 2.000 đồng/kg tui yaok labik, daong ka bhap bini mek hu jien laba jaik 32 triệu đồng/ha, glaong jang 13,3 triệu đồng dut saong vụ Đông Xuân di thun dahlau.

Harei 23/2, pasak pasang iek ruak kik tỉnh Bà Rịa – Vũng Tàu brei thau, 5 urang ngak di gilai dương tính mbang ka 1 haong SARS-CoV-2 saong sa urang medil lac di mangaok sruh gilai di negar langiu saong daok mek mẫu dut iek mbang ka 2. Mayah tapa mbang dut iek ka 2 jeng daok dương tính haong SARS-CoV-2 ye sruh gilai ni nao veik Indonesia piah salih abih tih urang ngak bruk di gilai, pruh jru pamatai anek ruak di gilai, hadei di nan meng mai veik Việt Nam piah ba pandap tagok. Dahlau di nan, di harei 20/2, gilai OCEAN AMAZING di jalan meng Indonesia nao jao pandap panda, tuk nao tapa bhum tasik Việt Nam ye di mangaok gilai hu 1 urang metai ka oh thau cambaih asal. Tapa mbang dut iek SARS-CoV-2 ka 20/21 urang ngak di gilai (langiu di sa urang dak metai) ye hu 5 urang dương tính haong SARS-CoV-2 saong 1 urang oh thau cambaih ruak halei oh. Urak ni dom urang ngak bruk di gilai OCEAN AMAZING ka oh ngak harak adat piah tame negar Việt Nam.

Dalam sa pathau khan hu brei thau di harei 23/02, Ủy ban châu Âu ba tabiak tukvak lac 10 harei paih ieu kakei 6 negar dalam Ủy ban lac Đức, Bỉ, Đan Mạch, Hungary, Phần Lan saong Thụy Điển yah klaak bruk kareih pambang atau pacang cakak biak catang di jalan tapen negar. Tui Ủy ban châu Âu, bruk ngak di negar dalam Ủy ban ni hu caga tayah klaak dom adat ka bruk tự do nao mai di manuac saong pandap panda dalam kapul, di tuk hu rilo negar karei meda pandar dom adat dreih yau nan.

Tapa pasang iek saong dut iek di jabat y tế meng kreih adit brei mboh, labaih 30 urang kumei dalam abih tih 431 urang kumei main di Đặc khu kinh tế Tam Giác Vàng, di huyện Tonpheung, tỉnh Bokeo gah barak negar Lào njauk ruak xã hội njom mbak tapa jalan ndih daok. Di Lào, kumei main lac sa bruk ngak suan hukum, ngak suan biak trak tal ilamo. Dom urang pambuak tal bruk kumei main meda hu langyah tui hukum. Min, bruk ngak ni di Lào jeng daok ratabiak biak rilo, tuk pandauk ala bruk ngak dịch vụ dalam dom Đặc khu kinh tế.

Harei kabroi (23/2), labaih 50 urang metai saong rilo urang karei njauk rambuac dalam dom mbang mesuh metak di klau sang guk di dom tỉnh Guayas, Azuay saong Cotopaxi di Ecuador. Tui gah kanja Ê-cu-a-đo, dom mbang mesuh metak lac sa bruk ngak hu bruk pambuak di dom kol tội phạm piah ngak tabiak bruk taong paoh dalam dom sang guk di talam taneh ia. Urak ni, kapul chức năng hu pacang cakak hu bruk ni dalam sang guk di tỉnh Gu-a-dát saong daok peih dom bruk karei piah mek hu quyền pacang cakak di 2 sang guk daok veik./.

Urang lang: Thu Thảo -M.P  24/2/2021  11:13:06