Alin brei pandap tết ka bol lin 

3 sruh gilai HQ561, KN-490, KN-491 hu ba Kapul urang ngak bruk di Bộ Tư lệnh Vùng 4 Hải quân gam haong rilo urang vak nao tal dom pulao kaoh  Trường Sa ba tui rilo pandap ndung bak Tết meng kan. Dom thùng brah ndiuk, hala patei, patei hijao, kruac bhung, pabui, menuk, bingu that, quất cảnh, mứt, har meneing... hu ba tagok dom pulao dahlau di tuk tame thun bahrau. Nhà báo Ngô Tiến Mạnh, Báo Phòng không- Không quân oh pacang hu drut droi tuk yam takai tagok angaok dom pulao kaoh di Trường Sa: "Ba pandap Tết tabiak haong Trường Sa, Khaol dahlak mboh biak bui sambai, ye tuk nao tal dom pulao kaoh dahlak mboh bol lin taduan mek ye dak chreih chai jang. Sa pok hala patui, kalaok aia mesil, 1 drei pabui, 1 drei menuk ngan haong Trường Sa nan lac taong abih hatung hatai di taneh hakuk. Tết tabiak haong Trường Sa nan lac dom bruk ngak biak hu makna  piah ka bol lin jang yau bhap bani angaok pulao kaoh Trường Sa ngak siam bruk pacang khik khang kajap pulao tasik, mblang taneh palei negar")

Meng puac bilan Puis saka aia bulan, dom urang lin Trường Sa cang raok dom sruh gilai pajeng pandap Tết tabiak pulao. Tasik puac thun riyak prong, hangin khang nan ye yaok mbang gilai nao tabiak pulao njauk yam tapa rilo kan kandah. Dom harei gilai tame pulao, urang jakar, urang lin chreih chai taduan raok kapul urang ngak bruk mai rivang. Dom van huak angaok pulao yaom lac oh ginup kaya mbang yau angaok taneh haluk min nyu ndung bak hatai ranam. Đại úy Đặng Văn Chiến, Chính trị viên pulao Đá Lớn A, huyện đảo Trường Sa, tỉnh Khánh Hòa brei thau, tuk dom sruh gilai pajeng pandap Tết tabiak haong Trường Sa, dom urang lin angaok pulao mboh biak chreih chai, bui sambai: "Tuk caga yam tapa thun bahrau biak bui sambai ka urang jakar bol lin angaok pulao Đá Lớn, biak thau dhal phol hatung hatai di dom jabat ban ngành ba anit ranam di taneh haluk tabiak haong pulao, pabak ginup pandap panda ka bol lin uan raok Tết. Adei sa-ai urang jakar bol lin angaok pulao kaoh ini thei jeng mboh bui sambai."

Jaik 19 harei mbleing mblang angaok tasik, 3 kapul urang ngak bruk hu nao rivang, alin brei pandap Tết di 21 pulao, 33 labik pulao, ba Tết avan jang tal pulao kaoh Trường Sa. Đại tá Lã Văn Hùng, Phaok Chính ủy Bộ Tư lệnh Vùng 4 Hải quân brei thau, mbang nao ngak bruk atah harei ini hu caik veik dalam hatung hatian rilo drut drui, bika kan si van hu ka rai diuk di dom urang lin saong bhap bani angaok huyện đảo Trường Sa. Tui Đại tá Lã Văn Hùng, manuac sia tabiak pulao thei jeng iek prong saong pok meyaom bruk kak kajap haong trách nhiệm di bol lin saong bhap bani angaok pulao Trường Sa ngan haong hatai saneng lac daok manuac urang, daok pulao kaoh, taong abih brei ka pulao tasik di taneh aia palei negar./.

Urang lang: Jasi-14/1