Pak sang bac trung học cơ sở Phan Hòa, tui pathau khan di Ban giam hieu sang bac, kuhria meng tuk hadei tet mbiah tal ini, Sang bac THCS Phan Hòa hu anek saih klak bac rilo di abih dalam huyen. Mbiah tal tukvak ini, hu 15 anek saih padeih bac, dalam nan hu 8 anek saih klak bac dahlau tuk tet saong 7 adei padeih hadei tết. Ini lac sang bac hu jaik abih anek saih lac urang Cam.

#Ndom biai saong khol dahlak, gru Đa Văn Thành, Akok  sang bac THCS Phan Hòa brei thau, meng harei tame bac hadei tuk padeih tet mbiah tal ini, sang bac hu tacei pato gru dang akok tal bac nao jak ba dom adei mai bac veik, min biak kan, kayua tuk gru tal sang min oh hu thei piah jak ba, hu rilo sang tabiak truh palei nao ngak mbang atah. Gru Thanh Văn Huyền-Sang bac THCS Phan Hoà daok brei thau lac: "Tapa jak ba, sang bac hu thau hatai sahaneng di anek saih. Amaik ame lauac harei nao ngak mbang atah, anek saih khin me-in, takre game…Sang bac jeng hu langyah brei dom adei mboh makna praong glaong di bruk bac da-a ngan saong harei hadei di dom adei."

Anek saih klak bac jeng lac sa bruk hu mboh di ralo sang bac THCS karei dalm huyen Bac Binh. Thun halei jeng yau nan, tal tuk dahlau tet saong hadei tet lac anek saih di dom sang bac  klak bac, yaom lac anek saih klak bac hu trun takik dalam dua thun ini mai, min piah pasiam veik bruk nan, rilo sang bac jeng yau karja dom palei oh ka hu jalan ngak halei ka nyu siam, lagaih.  Hu thau, kuhria tal tuk hadei tết, dalam huyen hu 26 adei klak bac. Gru Nguyễn Văn Chương, Akok Sang bac  Phổ thông bangsa gam bac gam daok huyện Bắc Bình lac: "Dahlau di tuk brei dom adei padeih nao sang mbang tet ye sang bac hu kakei biak tani tanat min hadei tet blaoh dom adei jeng oh nao bac veik."

Bruk anek saih klak bac hadei tet thun halei jeng yau nan, gah Pato megru jeng hu rilo jalan ngak piah jak ba anek saih mai bac veik hadei tet, min mboh lac ta-eng gah Pato megru kham merat ye oh ka ginup piah jak ba dom adei mai bac veik kayua bruk klak bac ralo meng kayua sang biak kan kandah, oh daok bac hu atau oh daok di sang ta-eng hu piah nao bac dalam tuk dom urang dalam sang nao ngak mbang atah. Ong Nguyen Long, Akok jabat Pato megru huyen Bac Binh, t.Bình Thuan, lac: "Gah pato megru daok tacei pato ka dom urang dang akok sang bac, meng nan dom urang dang akok sang bac saong dom sang bac tham mưu ka dom mban nganh, ban sit nao jak ba dom adei mai bac veik."

Jalan ngak halei hu siam lagaih piah pacang cakak bruk anek saih klak bac, abih di nyu nan lac klak hadei di tuk tet hu ba tabiak tangi sua dalam tukvak suai lavik, min oh ka hu panuac javap jalei njauk. Tui khol dahlak, langiu di bruk ngak di gah Pato megru yau:padang angan dom adei piah tui iek, pachreih ba dom adei mbuan klak bac, samar jak ba dom adei nan mai bac veik…ye bruk ngak di karja, di dom kapol nyaom dalam bruk daong ka dom baoh sang kan kandah, pachreih ba, pathau khan paglaong akok sahaneng, paglaong trach nhiệm ngan saong bruk bac da-a di anek bik kayua harei hadei jeng lac bruk biak praong. Meyah ngak hu sumu gauk gauk, hu bruk pambuak gauk di gah pato megru saong karja, baoh sang, ye bruk anek saih klak bac dak harei dak takik nao./.