Dang tapen hamu padai đông xuân hijao mekre, dalam sap jamriak bơm ia patuh xình xịch, ong Đỗ Văn Nhỏ di palei Mỹ Trinh, xã Hưng Phú, huyện Phước Long, tỉnh Bạc Liêu chreih chrai lac, ong song dom urang nong di labik ni dok bơm ia taba dalam dom kraong, ribaong ba tame hamu. Urak ni, pandiak, mbak du halei urang nong di labik ni jeng oh huac kayua mbaok hamu hu ginup ia ka phun padai tamuh tal harei yuak. Hu yau nan mai meng kuhria mboh dahlau bruk njom mbak meda rah tabiak khang, karja palei hu pathau khan dalam bhap bini piah taong abih gauk ba pren yava tabiak pacang caga pandiak, mbak bo bruk ngak anak meta lac samar pok ar piah pacang mbak, khik taba

  Khol hulin pataom adei saai mai pok ar ribaong  ni dalam dom tuk ye ngak salah, bloh khol lin ba jamriak mai bơm ia. Dahlau deih mikva bơm bak ribaong, bak mblang hamu bloh ye. Bloh hulin pok ar tra, bơm ia tra, khik hu ia tra. Hadei di ni meyah hu ia mbak mai, khol hulin oh gaok kan kandah hagait dalam sa bilan tagok.

Tui dom urang dang akoak huyện Phước Long, piah khik hu bilan padai đông xuân that mekre yau urak ni oh lac mbuan, brei pok  ar ye lac pacang hu pandiak,  mbak, bo dahlau di nan, huyện hu sa tuk vak kuhria caga biak suai lavik. Labaih 5 thun tapa, tuk hu TƯ palih lac sa dalam 5 huyện điểm di taneh ia ka bruk padang ngak palei pala bahrau, dalam tuk peih ngak dom tanut, huyện hu pataom tame ka bruk ngak nong, dalam nan iek prong bruk patagok dom ar pacang song dom bilai bơm điện. Tui labik bo yaok bilai hu buh jien tame ngak meng 400 tal 700 triệu đồng. Dalam 18 bilai bơm điện hu padang ngak ye di bilan đông xuân ni hu 11 bilai hu ba tame pandar piah piah bơm ia khik piah tagok mblang hamu song dom krong ribong dalam mblang hamu. Ngan song dom labik oh ka hu bilac bơm điện song ar pacang, huyện tacei dom puk palei samar pok ar piah pacang ia mbak njom tame, saong piah khik ia taba. Meng hu kuhria caga tani tanat song tui iek, peih ngak bruk pacang caga pandiak, mbak, ieu pataom hu pren khang meng huyện tal puk palei, nan ye Phước Long khik caga hu siam padai đông xuân song njam patam di tuk pandiak, mbak dok rah tabiak khang. Ong Trương Phước Hiền- Phó Jabat ngak nong song patagok palei pala huyện Phước Long ndom lac:

 “Khol hulin pambuak bruk song dom gah, dom pakat pataom pren yava tame piah pok ar, pasiam veik dom krong ribong dalam mblang hamu,  pasang iek dom cống neh rabha mbak - taba oh caik ka nyu sraiy tame labik ia taba , khik ia ginup pabak ka padai đông xuân tuhn 2016 ni, oh caik ka boh sang halei kurang ia atau ia njom mbak

Dom harei tapa, huyện Phước Long ieu pataom hu labaih 2.500 harei ngak bruk piah pok jiak 50 boh ar prong sit di dom krong ribong dalam mblang hamu, piah pacang mbak, khik ia taba. Abih di nyu nan lac, tuk hu ia taba mai, huyện hu pataom dom jamriak bơm ia, mô tơ song brei ka dom bilai peih b ơm ia luac harei melam piah bơm ia tame hamu song khik ia di tong abih krong dalam hamu. Jalan ngak ni di huyen Phước Long oh lac trun hu phun jien ka urang nong bo dok mek hu kein liba glong dalam bruk pacang caga pandiak bhang, njom mbak. Urak ni tong abih mblang hamu Đông xuân jiak 8.500 ha song yaok ribau ha njam patam di huyện hu ginup ia taba mbiah tal tuk yuak, paik. Ong Nguyễn Văn Nghĩa dok di palei Huê 2, xã Vĩnh Thanh, huyện Phước Long brei thau: 

           “ Padai di hulin urak ni hu 45 harei. Bơm ia taba harei ni bloh, hulin khik hu oh huac ia mbak. Urak ni hamu hulin ia ginup ye, hulin oh daok hu ia mbak. Padai urak ni tamuh biak siam.

Meng jalan ngak di huyện Phước Long, tỉnh Bạc Liêu brei mboh lac, dalam bruk pacang caga pandiak, mbak meyah tỉnh halei jeng hu jalan ngak siam, lagaih, hu tacei pato catang, gam song dom jalan ngak khang, samu gauk, saong ieu pataom hu pren khang ye labik nan, meda pacang hu pandiak, mbak njom tame, khik hu ia taba ka mik va pandar song pala drak./.