Amuk Tạ Thị Chung ndih tapui thun 1931 di xã An Thạnh, huyện Mỏ Cày, tỉnh Bến Tre. Patui ilamu cách mạng di palei Đồng Khởi, meng umo daok sit, amuk tame bruk ngak di urang kamei xã saong jeng urang kamei y tá, hu mbaok di grauk mblang mesruh gah meraong. Hadei di tuk gah meraong peih paha, amuk mai ngak bruk di sang iek ruak Từ Dũ. Ngan saong bruk ngak lac phaok Giám đốc gam lac Phaok akaok kapul chữ thập đỏ sang iek ruak, amuk Hai Chung saneng tal bruk padang palei hòa bình saong lac urang rik daong abih drei ka bruk padang palei. Ini hu iek lac labik iek glang uranaih njauk jru mek klik kruoc, uranaih jaoh jo ndih tapui tabiak njauk amaik ame klak veik di sang iek ruak Từ Dũ.

Thun 1998 amuk padeih hưu, min jeng daok pambuak bruk saong jabat klak. Amuk mai ini gaok tuk piah pachreih ba, atau uak ia meta ka dom urang ruak tuk pandik harao. Dom rai rah anek kamuan di labik ini anit ranam ieu bác sĩ Tạ Thị Chung lac amuk nội.

Amuk Nguyễn Thị Sáu – Phaok akaok Jabat Hành chính quản trị - sang iek ruak Từ Dũ ban raya Hồ Chí Minh brei thau:

 “Yaom lac anai Hai praong thun ye min anai oh khin padeih padei, tuk halei jeng abih hatai jai ka bruk ngak. Bruk ini dahlak mboh yau sứ mệnh, yau jalan ngak bo anai hai hu palih ruah. Anai hai tuk halai jeng nao ngak biak avar piah iek glang ka dom kamuan di palei Hòa Bình. Anai hai jeng lac urang padang hu phun jien piah iek glang ka bruk ngak XH”.

Taphia bruk iek glang ka uranaih jaoh jo, amuk Chung daok ieu dom urang ngak pahala, gauk gar saong ayut sahabat dalam taneh ia jeng yau negar langiu padang ngak sa sang tạm lánh ka dom urang kamei metian oh hu labik daok, dom kamei dara nao sung jalan piah daong urang hu iek glang dalam tukvak cang ndih tapui. Tal urak ini, sang tạm lánh di Từ Dũ hu raong yaok rituh urang kamei oh hu sang danaok. Langiu di nan, meng kadung jien jak ba, amuk Chung gam saong urang dang akaok sang iek ruak hu alin hadiah yaok ribau paok jien back a dom adei sang kan kandah daok di bhum atah bayah; daong jien blac baoh hatai ka dom uraniah sang kan kandah; padang ngak ralo mbaik tatua dân sinh ka dom huyện kan kathaot dalam taneh ia.

Amuk Huỳnh Thị Thanh Thủy, anek kumei tacua di amuk Chung biak hadah mbaok meta ka dom rik daong di amaik drei brei ka sang iek ruak Từ Dũ jeng yau palei Hòa Bình. Urak ini, amuk Thanh Thủy lac phaok Giám đốc sang iek ruak Từ Dũ. Amuk jeng lac urang kham merat hu mbaok tame bruk ngak pahala piah klah rabha dom kan kandah ka dom urang ruak kan kathaot, urang njauk jru mek klik kruoc. Amuk Thanh Thủy brei thau:

 “Hatai siam di amaik jeng hu pambak tal dom urang anek yau kol dahlak saong kol dahlak jeng hu patui jalan ngak di amaik, nan lac kham merat hu mbaok tame bruk ngak pahala; rik daong klah rabha kan kandah ka dom urang ruak jeng yau dom baoh sang, dom urang gaok kan kandah dalam rai diuk”.

Ngan saong amuk Chung, dom bruk ngak pahala hu mbang tame dalam ralo drah di amuk, nyu ngak ka amuk mboh drei yau hu pabak pren khang piah ngak bruk:

“Meng tuk daok dalam mban giám đốc tal urak ini biak anit adei saai meng puk palei tagok ini iek ruak, ralo meng lac kan kathaot, hu urang nao nyim jien piah mai, bloh dua diuk pasang tagok ini iek ruak caik anek daok di sang… gam ruak gam kan kathaot, anit lo nan ye dahlak bhian saneng , urang ruak biak caong hu bruk daong brei. Hu sa mbang sở y tế mai pasang iek sang iek ruak hu ndom lac, sang iek ruak Từ Dũ dũng cảm. Kayua urang ruak mai khám bloh oh dok jien, tame iek bloh meng kuhria. Nan ye dahlak daok tui daong bruk ngak di kapul chữ thập đỏ tal urak ini”. 

.Dom bruk ngak pahala bo bác sỹ Anh hùng lao động, gru jru bhap bini Tạ Thị Chung halan hatian ngak dalam rilo thun tapa hu dom pakat urang dang akaok saong dom đơn vị pambuak tal pok meyaom saong alin hadiah ralo phần thưởng praong glaong. Min, ngan saong amuk Chung, phần thưởng praong abih lac dom cambuai klau, hatai anit ranam saong iek praong di dom uranaih jaoh jo di palei Hòa Bình, di dom urang maik cơ nhỡ, dom baoh sang kan kathaot di bhum biak kan kandah. Nan jeng lac bruk daong pren ka amuk dalam bruk ngak saong rai diuk./.