Pathau mikva saong taong abih gauk!

Yuan hu panuac lac “Cửa Phật từ bi”. Panuac ndom nan tal urak ini jeng daok tamo yaom glaong. Tui hatai saneng yau nan, meng rilo thun tapa, baha Bửu Trì daok di labik 67, jalan Mậu Thân, phường Xuân Khánh, quận Ninh Kiều, ban Cần Thơ hu raong ba biak ralo uranaih metui medhua saong brei ka dom adei hu nao bac da-a siam mekre; jeng baoh sang anit ranam di dom uranaih oh patuah. Kadha vak di Ngọc Hân, urang vak di rayo sap ndom VN daok di bhum taneran kraong Cửu Long brei thau ka bruk ini, daa mikva saong taong abih gauk tui pang:

Mai rivang baha Bửu Trì dalam sa biar harei hajan sraiy bilan 9, hatai mboh chreih chrai. Kayua ini hu iek lac baoh sang daok raong ba saong pato pakai labaih 60 uranaih metui medhua, oh hu gauk gar, oh hu labik daok.        

Meng dom thun 1990, baha hu peih bruk raong uranaih metui medhua, meng hu yau nan, dom adei oh patuah jeng hu labik daok. Sư cô Quảng Trí brei thau, dom adei ralo meng lac njauk amaik ame klak meng tuk daok sit, hu adei barau ndih tapui tabiak pasak oh ka cakak, oh thau mai meng halei, mboh biak anit. Mboh yau nan, tuk daok diuk, sư Trụ Trì Tâm Niệm hu raong, caik angan saong ngak harak khai sinh ka dom uranaih, daong ka dom adei hadei ini hu nao bac daa. Sư cô Quảng Trí lac:

“Hu ralo urang klak, atau radaih kua klak drei oh thau cambaih. Biak di nyu oh thau amaik ame. Klak hadom ye sư pok ba mai raong. Dom adei oh lac tame gam tuk bo sa adit, dua adit, sa bilan, dua bilan, nan ye umo di dom adei nyu karei di gauk”.      

Kayua umo praong sit karei di gauk, nan ye urak ini di baha hu 10 adei bac mầm non, 29 adei bac tiểu học, 13 adei daok bac pakat II, 1 adei bac pakat III saong 1 adei bac đại học, lingiu di nan daok hu sa adei oh patuah njauk bac sang bac khiếm thị. Dom adei, praong ye salih gauk iek glang, pato bac ka dom adei sit, sit ye thau pang tui; diukrai anit ranam gauk yau adei saai jeng.         

Adei Trần Vân Anh, umo 20 thun, urak ini lac sinh viên thun ka 2, chuyên gah sap Anh di sang bac Đại học Cần Thơ, hu baha raong meng tuk umo dua bilan khan lac:

 “Dom sư cô kuhria ka adei biak siam. Tuk nao bac oh tut angan lac urang kathaot atau metui medhua, kayua dom sư huac tuk dom ayut thau ye kol adei mặc cảm. Tuk adei nao bac mai ye melam brei dom adei bac thêm, brei dom adei ndih, plaih khan ao ka dom adei. Dom adei biak jat oh nduac nao nduac mai”.

Tapa dom panuac khan di dom sư, kol dahlak thau urak ini, baha kham merat khik bruk pajeng ba dom adei daok dalam umo nao bac tui njauk quy định. Oh lac kuhria caga khan ao, tapuk siphau, pandap bac daa saong pandap mbang ka dom adei, bo dom urang bảo mẫu daok salih gauk pajeng ba dom adei njauk tuk piah khik kajap lịch bac ka dom adei.           

Lac sa dalam dom urang ngak pahala saong jeng lac bảo mẫu pambuak saong baha biak lavik, anai Nguyễn Thị Hạnh daok di huyện Phong Điền, ban Cần Thơ brei thau, yaok harei, mesup mai, anai nyim pasang pajeng mai tal baha piah ngak bruk pahala, iek glang, ngak mbang huak ka dom adei tal biar harei sup meng mai sang, oh lac pandiak atau hajan. Saai ngak yau nan mbiah tal urak ini hu labaih 15 thun. Anai Nguyễn Thị Hạnh lac:

 “Yaok mbang nao mai ngak bruk pahala, mboh sư phụ raong dom adei, drei jeng daong sư phụ bruk lisei ia. Drei hu nao baha, ngak bruk pahala ye mboh sambai, hu iek glang kol adei mboh sambai jang”.

Saai Thiều Văn Đạt, gru pato sang bac tiểu học Xuân Khánh II brei thau, langiu dom tuk pato di sang bac hu dom adei daok di baha tui bac, yaok adit 3 var, saai daok halan hatian pato kèm môn toán ka dom adei ini di baha. Saai Thiều Văn Đạt khan lac:

 “Hu pato di baha jeng lac bui sambai praong. Hu taom gaok dom adei di sang bac, mboh bruk bac daa di dom adei kan kandah hasit, nan ye drei mai ini pato kèm, piah paglaong bruk bac daa ka dom adei”.

Meng hatai ngak bruk pahala, meng dom thun tapa, dom sư dalam baha Bửu Trì saong dom urang ngak pahala daok ba tangin tame padang baoh baha jeng baoh sang di ralo uranaih metui medhua. Hu raong ba, iek glang, pato pakai saong bac daa meng hatai anit ranam di dom sư saong urang ngak pahala, dom adei dak harei dak ihik nao bruk mặc cảm, tự ti, dak harei dak peih praong hatai piah patui dom caong khin yau dom ayut karei. Jia lac, tuk hu daong ba dalam anit ranam, dom adei hu jeng anek menuac hu hatai siam, thau anit ranam saong lac dom urang hu kein laba ka xã hội./.