Pathau mikva saong taong abih gauk! Bruk anek saih klak bac daok ngak ka gah pato megru duh hatai dalam rilo thun ini mai. Kayua yau nan ye, bruk ieu gauk daong pren saong jak ba anek saih klak bac mai bac veik daok hu dom kapul nyaom, menuac urang dalam, saong langiu tỉnh Sóc Trăng biak sangka. Baha Khmer Lakhanawong Xung Thum daok di xã Lai Hòa, ban sit Vĩnh Châu, tỉnh Sóc Trăng daok hu iek lac labik hadah dalam bruk daong ralo anek saih kan kathaot hu nao bac. Kadha vak di Thạch Hồng -  urang vak di rayo sap ndom VN daok di bhum taneran kraong Cửu Long brei thau ka bruk nan:

Daok di xã Lai Hòa, ban sit Vĩnh Châu, baha Lakhanawong Xung Thum (ieu katut lac baha Xung Thum) urak ini daok raong 21 adei anek saih likei meng rilo puk palei karei mai ini mbang bac. Dom adei ini jeng gaok kan kandah, amaik ame nao ngak mbang atah atau baoh sang ralo anek, oh hu jien brei ka dom adei nao bac. Sư Trần Huyền, Phaok trụ trì baha Xung Thum, xã Lai Hòa brei thau:    

 “Mboh mikva gaok ralo kan kandah nan ye sư taduan dom adei mai raong, iek glang piah dom adei hu nao bac”.

Di labik ini, langiu tuk bac di sang bac, dom adei hu baha brei labik ndih, labik mbang huak, hu me-in sambai saong ayut sahbat, bac kinh phật saong bac sap Khmer yaok harei. Jien bac, khan ao, tapuk siphau jeng hub aha kuhria. Adei Danh Sang, bac tal 5A, sang bac Tiểu học Lai Hòa, lac sa dalam dom adei hu baha Xung Thum taduan raong brei thau:

 “Adei daok di sang adei nao cap ikan piah duah jien nao bac. Sang adei kan kathaot, hu 5 adei saai. Muk di adei ba nao daok dalam baha, ong sư blei tapuk siphau khan ao brei. Adei hu nao bac adei biak bui sambai”.

Dalam baha,  tuk halei jeng bui sambai, bak sap ndom, sap klao di dom adei. Langiu tuk bac, dom adei daok hu me-in thể thao. Bruk ini hu daong ka dom adei takik uan sang. Adei Tăng Chãi daok bac tal 9A1, sang bac trung học cơ sở saong trung học phổ thông Lai Hòa, ban sit Vĩnh Châu brei thau, umo 7 thun, amaik ame adei luai gauk. Muk ngoại oh hu jien raong nan ye ba adei tame baha daok jaik sa thun ini mai.

 “Daok dalam baha biak sambai kayua hu ralo ayut sahbat. Adei jeng hu biai brei ong sư thau kayua adei oh hu amaik ame. Sư jeng pachreih adei brei kham bac, hadei ini khin bac bruk ngak ye ong sư daong brei”.

Tui trưởng phòng pato megru ban sit Vĩnh Châu Lê Văn Vui, hadei Tết Nguyên đán 2017, dalam ban sit Vĩnh Châu hu labaih 150 adei pakat tiểu học saong THCS padeih bac. Yaom lac takik jang yaok thun, min ini jeng daok lac bruk duh hatai di gah pato megru ban sit. Ong Vui daok brei thau lac, tukvak anak tal, lingiu di bruk paglaong chất lượng pato saong bac, gah pato megru ban sit sangka jang dalam bruk daong dm labik yau  baha Xung Thum, piah puk palei hu rilo labik taduan raong anek saih kan kathaot mbang bac.

 “Bruk ngak di nhà sư di baha Xung Thum hu rik daong ka puk palei, abih di nyu nan lac ka bhap bini bangsa, dom adei anek saih sang kan knadah yam tapa kan kandah nao tal sang bac. Kol dahlak hu khan ka UB, khan ka ban sit saong đề xuất dom jalan daong pabak piah ngak yau habar ka puk palei hu ralo labik yau na tra, daong anek saih hu bac daa siam jang”.

Dom mbang tabung glaong, baha Xung Thum taduan raong tal 40 adei, dalam nan hu dom adei mai meng tỉnh Bạc Liêu. Dom adei hadei di tuk amaik ame  nao ngak mbang hu jien, tani tanat labik daok hu mai ba dom adei nao sang. Ini jeng lac bruk bui sambai di baha, kayua dom adei hu daok haong amaik ame bo oh klaih klaoh bruk bac daa. Sư Trần Huyền, Phaok trụ trì baha Xung Thum daok brei thau lac: 

 “Tui sư saneng, dalam xã hội urak ini, labik halei jeng caong hu urang naih, urang hu ilamu, meyah kurang dom urang ini ye puk palei kan patagok. Sư taduan raong dom adei saong brei mbang bac jeng caong khin daong dom adei piah hadei di ini dom adei praong tagok, kham merat jeng urang hu kein laba ka xã hội”.

“Kayua kein laba pluh thun - pala phun, kayua kein laba 100 thun - pala menuac”, meda lac, bruk ngak di dom sư tăng baha Xung Thum biak njauk iekpraong, lac labik hadah dalam bruk ngak pahala saong xa hoi hóa pato megru, daong ka ralo anek saih sang kan kandah kham merat yam tapa, khang takai nao tal sang bac, pabak dom hatai caong daok klaih klaoh./.