Melam 26/11, hadei di 8 harei kuhria meng saboh mesup 18/11 pandik harao, glut jaleih ngak ka labaih 20 menuac di xóm Núi, thôn Thành Phát metai saong njauk rambus; amuk Trần Thị Hoa, Phó trưởng thôn jeng daok nduac nao nduac mai kuhria parabha pandap daong ka dom sang njauk bala. Tapa 2 mbang gaok hajan ribuk, ba tal glut jaleih, jaik 100 baoh sang di xóm Núi nyu jaleih, labaih 20 urang metai saong njauk rambus. Dom urang daok diuk ye lahik abih drap ar, oh daok hagait. Abih menuac di palei kan kathaot ini oh var hu saboh mesup 18/11 pandik harao nan. Harei nan, lingik hajan praong, ia craoh tagok glaong, nduac khang, ia sua ba tui patau praong meng angaok ceik taglung trun lam lahik sang danaok. Hajan sup langik, jalan dhuan dauk dalam, dom gah chức năng oh mai daong hu. Pak di tuk nan, 4 urang jakar thôn Thành Phát khang hatai nduac tagok ceik preo ieu abih gauk samar nduac nao piah plaih di metai. Rilo menuac katung talei bua, kan nhựa ka urang njauk ia ba seik pan tame plaih di metai, hu urang chat trun ia nduac khang piah daong sraong menuac. Amuk Trần Thị Hoa patuah oh njauk hagait, daok 3 urang jakar daih jeng njauk rambus tuk nduac nao daong sraong menuac:

(Khan brei mikva thau lac ngaok daih ceik nyu glut jaleih abih paje, mikva duah labik dauk siam mekre, cang tuk hajan sit bloh trun mai ini. Bloh hadei di nan nduac tagok veik piah daong ka urang njauk bala. Tuk nan drei daong gauk, dui tagok rao hacih vết thương, bloh cakaong trun. Talei bua piah pan tangin gauk nao tapa.)

Hadei di ia sua khang, rilo menuac lahik sang danaok, lahik gauk gar. Sang danaok theik tui ia, sang ilamu palei jeng labik ngak ndam metai ka urang oh patuah. Yaok rituh menuac daok diuk tok daok hu sa bộ khan ao cuk angaok rup. Dom urang jakar palei ba gauk peih bruk taduan mek, parabha pandap daong ka mikva, dalam nan hu pandap mbang, ia menyum, khan ao cuk dalam dom harei hadei di hajan ia sua. Amuk Phạm Thị Thực, sa urang gaok bala patuah oh metai, khan lac:

(Pô lơi, ia nyu nduac khang, oh pacang hu. Dom sang nyu jaleih mboh biak huac. Tổ dân phố kol dahlak trun mai ini daong, nan ô metai abih. Daong gauk ba menuac trun gah ala, nan ô nyu jaleih ye metai abih. Hu dom urang metai, mboh biak huac. Huac lô, ba urang halei trun hu ye ba, caik veik ye metai abih.)

Tok dalam bilan 11 thun ini, tỉnh Khánh Hòa gaok 2 mbang ribuk ka 8, saong ka 9. Dom lực lượng quân đội samar ba menuac nao daong ka bhap bini. Thiếu tá Lê Văn Danh, đại đội thiết giáp 74 Bộ Chỉ huy Quân sự tỉnh Khánh Hòa brei thau, dalam tuk nao tame labik glut jaleih, radaih thiết giáp DM2 gaok bruk bhap bini njauk pandik baoh hatai saong suy hô hấp min oh hu jalan halei piah nao tal sang iek ruak. Nan ye radaih thiết giáp samar pajeng urang ruak nan nao cấp cứu. Angaok radaih, dom urang lin pataom tame sơ cứu urang ruak, hu tuk urang ruak kaik dalah, dom urang lin njauk caik tangin tame pabah ka urang kaik piah plaih ka urang metai. Bahrau ini, dalam tuk nao daong labik glut jaleih di xã Phước Đồng, ban Nha Trang, radaih thiết giáp DM2 hu ba urang kumei jaik ndih tapui nao tal sang iek ruak tuk dom jalan oh nao mai hu. Thiếu tá Lê Văn Danh khan lac:

(Tuk nan, labik nan ia biak rilo, radaih thiết giáp di kol dahlak tame nan daong ka bhap bini saong ba dom sruh radaih glut di palei Phước Hà. Kol dahlak jeng yau urang karei, tuk dang anak bruk mbuan metai lahik di anek menuac, yaom lac nao ngak bruk hagait, ye cấp cứu anek menuac lac bruk praong njauk ngak dahlau.)

Ban Nha Trang, tỉnh Khánh Hòa, lingik daok hu pandiak tagok, ia daok trun nao. Rilo urang ba gauk mai sang veik. Urang daok puh ramik sang danaok, tani tanat raidiuk. Dom dalikan, dom bruk daong gauk tuk dang anak bruk mbuan metai lahik, anak bala di langik tasik, daok hu mikva dalam bhum hajan ia sua khan veik mboh biak drut drui, ndung bak hatai anit ranam gauk di anek menuac haong gauk./.