Takik caik hatai sangka tal dom bruk ngak kayua Pasak ilamo quận, huyện peih tabiak, gaok mai oh thau pasak ilamo di quận, huyện drei nyu daok pak halei nan lac bruk bhian mboh di bhap bani bal raya Hồ Chí Minh. Kurang pren dui pachreih dalam bruk pathau khan, parang me-in; cơ sở vật chất saong pandap panda ralo labik oh ka samu gauk; oh ka khan brei thau dom kadha bahrau tal bhap bani; oh ka pabak hatai caong ilamo di bhap bani... nan lac dom makna ngak ka dom pasak ilamo pak bal raya daok klaak saoh yaom lac jien padai karja buh tame oh takik.

 “Pathau ong, ong hu thau pasak ilamo di labik drei daok nyu ndih pak halei?

-Dahlak oh thau

- Dahlak bhian nao tal dom pasak ilamo di dom quận min bhian nao pathram padhih atau bac dom môn thể thao, daok bruk ma-in bui sambai ye oh thau ralo. Dahlak mboh dom bruk ngak di labik nan oh ka pachreih ralo”.

 Angaok nan lac panuac di 2 urang daok pak bal raya Hồ Chí Minh ka bruk sangka di dom urang nan ngan haong bruk ngak di dom pasak ilamo di labik drei daok. Urak ini bal raya hu 24 pasak ilamo praong laneng saong hu brei bruk peih ngak ralo kadha ilamo duh ka bhap bani. Yau nan min, mai meng ralo makna karei di gauk nan ye tal urak ini, dom pasak ini ralo meng oh ka pachreih hu bhap bani mai ma-in. Pagap yau Pasak ilamo quận Bình Thạnh atau Pasak ilamo quận Phú Nhuận, daok di labik lagaih nao mai saong hu ralo bruk ngak, dom harei dalam adit jeng oh mboh thei mai ma-in. Tok tal puac adit, tuk dom tal ngoại khóa peih ngak, meng mboh chreih chrai.

Daok dom pasak ilamo di langiu bal ye dak joa lange jang. Kayua địa bàn biak prong saong cơ sở vật chất, trang thiết bị ralo labik daok kurang nan ye dom pasak ralo meng ba danak dak pathau khan, parang me-in nao tal puk palei meng pachreih hu bhap bini mai mong iek. Daok pak pasak, mblang bein prong hu ralo khu vực chuyên môn min bhian joa lange, takik mboh menuac.

Kayua caong hu ralo bruk ngak saong caong hu jien mek tame piah padang ngak cơ sở vật chất, paglaong danak dak, hu oh takik pasak ilamo di bal raya Hồ Chí Minh brei ka tư nhân pah mặt bằng tui jalan pambuak bruk patagok rai diuk ilamo. Tui ong Lê Văn Lộc, Phaok Akaok Pasak ilamo bal raya Hồ Chí Minh, meyah bruk brei papah ini piah paglaong bruk pathau khan saong pamere siam ka bhap bani ye njauk ngak kayua nyu meda ba jien tame. Yau nan min, pak dom pasak kayua kurang palih ruah dalam bruk brei papah labik nan ye ba tal ralo kadha oh siam. Ong Lê Văn Lộc lac: “Hu dom pasak ilamo daok nao suan jalan. Labik oh prong, oh ginup ka dom bruk ngak ilamo bo daok brei papah. Ngan haong dom labik brei papah njauk bruk ilamo saong njauk haong hatai caong khin di bhap bani ye khaol dahlak oh ndom hagait. Min hu dom labik brei pah ngak dom bruk oh pambuak pagam hagait tal ilamo, nan ye bhap bini urang ndom tabiak ndom tame.”.

 Tui meta maong di urang hu mbang tui dom bruk ngak ilamo di puk palei, sa-ai Nguyễn Duy Thịnh daok pak Quận 11 ndom lac, meyah brei papah labik, dom pasak ilamo njauk saneng duah jalan ngak bahrau dom danak dak  piah pachreih manuac urang mai ma-in: “Dahlak mboh bruk nan nyu palai pajua kayua pasak ilamo lac labik piah peih ngak dom bruk ilamo ka bhap bini, ka bruk bui ma-in di bhap bani. Ngak yau nan dahlak mboh lac oh siam. Dahlak saneng lac njauk hu jalan mong iek yau habar piah ka dom pasak ilamo hu mai veik njauk jalan di nyu.”.

 Daok tui amuk Nguyễn Thế Thanh, urang dahlau diah ngak phaok akaok Sở Ilamo, padhih saong rivang ma-in Bal raya Hồ Chí Minh, bruk dom pasak ilamo brei xã hội hóa bruk ngak di drei oh hu hagait lac njauk ndom njauk puac. Kadha daok veik nan lac bruk pasang mong, khik iek catang meng gah chức năng. Karja ba tabiak jalan ngak lagaih piah ka dom pasak ilamo grap tanat bruk thu chi, min njauk caik taong abih janih dalam pasang mong nan ka meng khik iek siam dom bruk ngak di dom jabat ini. Amuk Thanh lac: “Tui dahlak kadha ini hu ndom tal dalam Nghị định 10 ka xã hội hóa bruk ngak ilamo. Yau nan, karja palagaih ka doanh nghiệp ngak bruk min doanh nghiệp njauk peih ngak tui jalan bo drei ba tabiak. Khaol dahlak oh patagok jien mek tame meng gah doanh nghiệp min njauk pandar urang ngak yau habar ka nyu meng langiu tal bruk ngak gah dalam. Dahlak mboh lac, taong abih dom kadha ini kayua drei kurang chi tiết dalam bruk peih ngak danak dak xã hội hóa bo raja-ei hu ba tabiak ka dom puk palei. Khaol drei ngak bo oh caik hatai tal asal gah dalam di nyu”.

Ngak habar piah ka dom pasak ilamo ngak hu abih bruk di nyu? Sa kadha sua tangi yau mbuan mbiah min caong khin langyah kadha ini, taphia di bruk kham merat di rup drei, dom pasak ilamo pak bal raya Hồ Chí Minh biak caong khun hu dom bruk daong gah jien ndo, manuac urang jang yau bruk ba jalan di gah ilamo./.