-Tukvak ini, sang saai Trần Thị Kim Ngân daok di phường Hiệp Bình Chánh, quận Thủ Đức, ban raya HCM daok jar var saong yaok pluh urang ngak harei melam pasang iek bingu saong phun kiểng piah pabak ka dom đơn đặt hàng ngan saong jaik 15 rabau chậu bingu saong phun kiểng ka darak pasal bingu tết Nguyên đán jaik tal. Angaok mblang taneh praong labaih 5.000 m², saai Ngân pala dom janih bingu: cẩm nhung, vạn thọ, cúc, cát tường… Bruk pruh ia, buac hareik, cakak dhar saong buh khak…ka bingu yaok harei, saai Ngân njauk pah 6 urang ngak, yaok urang hu brei mbang daok saong bayan jien bilan 6 triệu đồng/sa bilan. Yaom lac njauk bayan ka urang ngak jien bilan glaong, min kayua taduan bloh rilo đơn đặt hàng nan ye yaom bingu di saai Ngân oh tagok dalam tuk tết jaik tal. Saai Trần Thị Kim Ngân brei thau: Yaok thun drei pablei dom janih phun kiểng tui kuhria meng 10 tal 15 rabau chậu. Drei ngak randap saong urang blei bloh paje, nan ye meyah hu hợp đồng bahrau meng mek rilo jang. Urang blei hu mbaoh tangin tame hợp đồng saong drei meng 3 bilan dahlau, drei hu caga bloh dom janih pandap nan paje. Thun ini yaom jien pah urang ngak nyu tagok jang min bingu di drei oh tagok yaom, drei takik laba veik hasit min jien mek tame jeng oh gaok hagait rilo.

-Yau rilo sang bein karei di dom libik lingiu ban, saai Nguyễn Thanh Hà, po sa bein mai di quận Thủ Đức daok ngak si blaoh dom bruk cakak mbeik thaot binguk ka labaih 1.000 chậu mai piah sumu pablei di tuk Tết thun sak pabui. Tui saai Hà, darak pasal ka phun mai tết thun ini jeng rilo meng lac di ban raya HCM. Dom công ty meda pah dom phun hu hu dhar praong, glaong jaik 3 mét, daok urang mein mai di sang phố ye pilih ruah phun hu bề ngang labaih 1 mét saong glaong jaik sa mét meteh. Rilo sang bhian pilih ruah dom phun bon sai janih chữ nhật, chậu vil gul dom phun hu got gheih, mekre. Phun ba tabiak Hà Nội rilo meng lac dom phun meng 5 triệu đồng trun tal dom phun 2 atau 3 ratuh rabau đồng. Meyah lingik siam saong yaom tani tanat, yaok chậu mai di saai  Hà meda pablei hu jaik 250 rabau đồng. Daok yaok phun mai gheih mekre brei pah jeng hu yaom meng 5 tal 10 triệu đồng dalam tuk tết. Yau nan, gam saong dom janih bingu karei, Tết ini sang saai Nguyễn Thanh Hà meda mek tame hu dom ratuh triệu đồng: Kayua lingik meng akaok thun tal urak ini jeng siam lagaih nan ye phun mai thun ini bein halei jeng siam abih. Mai hu tabiak caduk, hala siam abih…nan ye mai thun ini jeng hu rilo. Jien mek tame jeng daok pambak tame lingik meng tuk ini tal tết, min mboh lac tal tukvak ini jeng siam jang duk saong yaok thun.)

-Lingiu di dom libik pala mai meng lavik saman di ban raya HCM yau: phường Hiệp Bình Phước saong Hiệp Bình Chánh di quận Thủ Đức; dom xã Bình Mỹ, Trung An, Tân Thạnh Tây, Hòa Phú di huyện Củ Chi ye rilo sang beir di huyện Hóc Môn, Quận 12 thun ini jeng peih praong taneh pala bingu, phun cảnh. Lingiu bingu lan saong bingu mai, sang bein di ban raya daok pala veik dom janih bingu, phun cảnh karei yau tắc (quất), mào gà, cúc vạn thọ, khế, hướng dương... piah duh ka bruk mein Tết di bhapbini. Saai Nguyễn Thị Ly, sa urang pala bingu di quận 12 brei thau: Lingik yau urak ini drei mboh siam, oh gaok kan kandah hagait. Jeng dreih yau yaok thun, drei hu mối lái urang hu đặt hàng abih paje yau: cúc, vạn thọ, thược dược…Tal tukvak ini oh hu kan kandah hagait, urang blei jeng caong hu bingu kheih bo drei jeng caong mek hu jien tame glaong.

-Urak ini, ban raya HCM hu labaih 2.200 ha pala bingu saong phun  cảnh. Dalam nan rilo meng lac bingu mai, labaih 600 ha, bingu lan  360 ha, bingu hala nền 680 ha saong kiểng– bonsai labaih 560 ha. Taneh pala dom janih bingu jeng tagok hasit duk saong thun blaoh. Yaom lac ban raya HCM barau gaok kan kandah kayua ribuk ka 9 saong rilo mbang hajan praong gam saong ia tagok glaong, min meng bruk kuhria caga siam saong pasang iek tani tanat, urang pala bingu di ban raya daok caong tame sa bilan bingu kein laba./.