Kapul bác sỹ, urang jakar Sang iek ruak Trung ương Huế tame ban raya HCM piah padang bruk ngak di Pasak Hồi sức Covid-19 

  Mesup ini 3/8, dalam taneh ia hu 3.578 urang njom bahrau Covid -19. Dalam nan ban raya HCM hu 1.998 urang. Hu 46.965 urang ruak Covid-19 dalam taneh ia thit abih ruak. Jeng dalam mesup ini, dhar kapul taong ruak, mBan tacei jalan pakat negar pacang caga jit ruak Covid-19 hu panuac pabak 186 urang metai di 10 tỉnh, ban. Dalam nan, di ban raya HCM meng harei 28/7 tal harei 2/8 hu 165 urang metai

Piah samar pabak praong labik siam mekre salamat dalam bol bhap rahra, ban raya HCM brei kapul klauk vaccin nao tal labik ngak bruk, labik daok di bhap bini piah klauk jru dalam tuk ban raya daok pa-atah di gauk tui sarak 16. Dalam 2 harei tapa, ban Thủ Đức – labik camereip abih dalam ban raya HCM – brei 3 kapul nao klauk tal labik daok di bhap bini. Siam lagaih di bruk ngak ini, lac meda nao tal labik daok pacang veik, piah klauk vacccin ka dom menuac oh nao atah hu.

Harei 2/8, Kapul bác sỹ, urang jakar Sang iek ruak Trung ương Huế tagok jalan tame ban raya HCM piah padang bruk ngak di Pasak Hồi sức Covid-19 di phường Tây Thạnh, quận Tân Phú. Kapul ba tui rilo jamriak, jru tavao..duh ka bruk taong ruak Covid-19 trak. Ba kaok kapul, Giáo sư, Tiến sỹ Phạm Như Hiệp (Yam ndok sang iek ruak Trung ương Huế) brei thau, Kapul kham merat padang 1 pasak siam di abih, gam khik kajap bruk pambuak gauk samar drah, siam mekre dalam taong ruak ka urang ruak trak, gam khik kajap dom jalan pacang caga jit, oh caik rah tabiak bruk njaom mbak nao mai. Tui kuhria, dalam dom harei tal, pasak ini hu peih tabiak, hu 500 papan ndih taong ruak.

Urang bangsa Cam di An Giang urak ini hu labaih 17.000 menuac tui agama Islam, daok rilo di ban sit Tân Châu haong 4 huyện: An Phú, Châu Phú, Châu Thành, Phú Tân.  Tukvak tapa, dom puk palaei dalam tỉnh An Giang hu jhul khang bruk pathau khan, jak ba, daong ka rahra thau cambaih ka jit ruak Covid-19 saong ngak catang tui dom jalan pacang caga jit dalam palei. Hadei di tuk mboh dalam xã Ða Phước, huyện An Phú hu menuac njom Covid-19 dalam palei, UBND huyện, Ủy ban MTTQ huyện An Phú haong Ðảng ủy, ban, ngành, kapul nyaom xã Ða Phước nao tal yaok sang, pathau khan, jak ba bhap bini ngak njauk tui 5 paka di Mintri Y tế, oh ba tangin tame pacang padauk, daong ka dom menuac nduac dauk bruk nao daok karei. Meng ngak siam bruk pathau khan, nan ye hatai sahneng ka pacang caga jit di mikva jeng hu siam tagok, mikva Cam ngak tui biak siam dom adat hukum, gam haong karja palei ngak hu siam bruk pacang caga jit.
Tỉnh Ninh Thuận pataom tame daong bhap bini bangsa takik pandar siam công nghệ - thông tin, daong ka mikva samar thau dom sarak di Đảng, hukum di karja; thau ginup ka bruk y tế, pato megru, ilamu công nghệ, darak pasar, rik daong jhul patagok KTXH bhum urang bangsa takik. Tal thun 2025, tỉnh Ninh Thuận brei ngak pasaim dữ liệu ka bruk bangsa saong dom ứng dụng daong ka urang bangsa takik, daong hu 80% dom rija, roya, adat cambat tanarakun di dom bangsa takik dalam tỉnh hu khik ramik dalam dữ liệu số hóa, đa phương tiện piah khan brei thau praong dalam tal bhap bini. Gam haong nan, tỉnh padang gilang tapuk điện tử, dữ liệu ka bruk bangsa di tỉnh, duh ka bruk khik ramik karja  saong daong ka urang bangsa takik thau dom bruk, dom kadha dalam samar drah.

Gah Y tế Thế giới (WHO) hu ba tabiak panuac ieu dom taneh ia hu rilo vắc xin caga Covid-19 njauk jhul khang bruk klah rabha haong dom taneh ia karei, abih di nyu lac dom taneh ia daok kurang vắc xin biak khang. Tui WHO, bruk njaom mbak khang di vi rút Sars-Cov-2 saong dom biến thể di nyu dalam dom taneh ia kurang vắc xin ngak brei patagok dom biến thể bahrau mbuan njaom mbak saong mbuan metai lahik jang, meda ba tal patrun prein pacang ruak di dom janih vắc xin daok hu. Bruk ini oh ba mai kein lagaih ka dom taneh ia, dalam nan hu gam taneh ia daok hu rilo vắc xin, kayua dom taneh ia jeng hu bruk pablei salih nao mai di dunya. WHO ndom lac, mbiah tal tuk taong abih menuac sia angaok dunya hu salamat, oh hu urang halei hu salamat.

Yaom lac Israel hu klauk vaccin samar abih di dunya min urak ini taneh ia ini daok dang anak bruk biến thể vi-rút covid-19. Harei kabroi lac harei ka 5 gam gam, taneh ia ini hu 2.000 urang njaom bahrau covid-19. Mbang klauk vắc xin ka 3 brei ka  1 triệu 500 rabau urang umo labaih 60 thun hu peih tabiak di harei adit meng blaoh. Ini lac sa binah di bruk kham merat piah patrun patakik bruk njaom mbak di biến thể Delta saong pacang cakak jit njaom mbak. Israel lac taneh ia camereip abih klauk vắc xin mbang ka 3 ka rilo menuac sia hadei di mbang klauk ka 2 dahlau di nan brei ka urang praong trun prein pacang caga ruak biak khang.

Gah padam pui negar Italia harei kabroi brei thau, glai di bhum kreh negar saong gah meraong taneh ia ini daok khuah khang, dalam tuk langik pandiak, ngak brei yaok rabau menuac njauk panduan nao labik karei. Di bhum gah meraong Puglia, dom kapul padam pui jeng daok kham merat padam pui dalam luac 4 harei tapa tuk pui khuah  mbang abih 350 héc-ta thảm thực vật. Di bhum gah meraong Molise – labik daok kreh Abrudô haong Puglia, 20 héc-ta glai jeng daok khuah khang./.

Urang lang: M. Phương – 03/08 10:13:20