Ribaong Tham Lương 

Page ini 22/4, HĐ bhap bini Ban raya HCM mbang IX, vaktu 2016 -2021 di mbang nyaom 25 hu brei tapa jalan buh jien tame ngak 2 danak dak tuvak 2021 - 2025, ngan saong phun jien labaih 12.000 tỷ đồng. Nan lac danak dak padang ngak  labik rilo canah jalan taom gauk An Phú di Ban Thủ Đức saong danak dak padang ngak jalan mbak, pasiam hacih ribaong Tham Lương - Bến Cát - Rạch Nước Lên. Danak dak labik rilo jalan pataom gauk di An Phú piah brei sumu saong jaln cao tốc Ban raya HCM - Long Thành - Dầu Giây daok peih ngak. Daok danak dak pasiam ribaong Tham Lương - Bến Cát - Rạch Nước Lên piah daong ka Ban raya HCM langyah dom bruk pacang ia dauk di bhum  pasak saong bhum Tây Bắc.

Melam ini (22/4), di ban sit Châu Đốc, UBND tỉnh An Giang hu peih pakak “Harei pataom pandap OCOP haong pandap biak karei di dom tỉnh, ban thun 2021”. Harei pataom peih tabiak tal harei 25/4, hu 150 labik pablei pandap di 24 tỉnh, ban dalam taneh ia. Pandap panda pataom tame pandap OCOP (danak dak yaok xã 1 janih pandap) saong dom pandap biak karei, hu angan di dom puk palei, dom tỉnh ban.

Page ini, kapol pasang iek đồn Biên phòng Cửa khẩu cảng An Thới, Bol lin biên phòng tỉnh Kiên Giang chap hu 1 kapal saong sa sruh gilai peih meng Campuchia mai Việt Nam. 4 urang angaok gilai khan lac tapa Campuchia ngak mbang, min kayua jit ruak Covid-19 tamuh khang nan ye mai veik Viet Nam plaik jit. Jeng dalam harei ini, Đồn biên phòng pabah mbang negar  Vĩnh Xương, An Giang pambuak haong Đồn biên phòng pabah mbang negar Thường Phước, tỉnh Đồng Tháp pacang cakak chip 12 urang daok jaik tame Viet Nam suan hukum.

Mesup 22/4, Hạt Kiểm lâm ban sit Đà Lạt (t.Lâm Đồng) pambuak haong mBan khik iek glai Lâm Viên gam haong jabat karja pak nan pasang iek bruk rilo phun kayau taha praong thun njauk urang kaoh pajaleih pak di pasak ban Đà Lạt. Hu 5 phun thông njauk kaoh pajaleih, rup phun praong meng 40 cm tal 72 cm, glaong meng 12 m tal 20 m. Labik ini daok dalam ban, kayua mban khik iek glai pacang caga Lâm Viên Đà Lạt khik iek. Kol jhak nyu ruah harei padeih, harei hajan, melam sup piah ngak bruk nan.

Kapol Urang kumei Hàm Tân, tỉnh Bình Thuận pambuak saong Balai CSGT Hàm Tân birau peih bruk jao brei “ baoh sang uranam” brei ka baoh sang sa-ai Phan Thị Hằng, lac baoh sang urang bangsa takik hu raidiuk kan kandah di palei Láng Gòn 1, xã Tân Xuân. Kapol Urang kumei huyen jak ba Trạm CSGT Hàm Tân di Phòng CSGT Công an tỉnh Bình Thuận daong 50 trieu dong piah padang baoh sangka sa-ai Hằng, praong labaih 60m2 .

Harei ini (22/4) lac harei baoh taneh mbang ka 51 di dunya. “Pasiam veik baoh taneh di kol drei” lac asal kadha di harei baoh taneh thun ini dalam tuk dunya daok dang anak jit praong Covid 19 saong pamaong tal pasiam veik raidiuk, pasiam veik bruk ngak mbang kinh tế. Rilo bruk pacang biến đổi khí hậu daok hu peih ngak di harei baoh taneh thun 2021. Dalam nan, jabat Hàng không vũ trụ Mỹ (NASA) peih bruk harei baoh taneh online meng ini tal harei 24/4, pataom tame jalan diukrai khang kajap jang angaok baoh taneh saong duah thau talei pambuak gauk di khí quyển, di ia, di glai, mblang hamu, ban roya, ia patau saong langik tasik.

Mentri Ngoại giao Mỹ brei pabak takik di abih 116 taneh ia tame angan kakei bruk nao mai pakat 4 kayua jit Covid-19, angan nan meda daok hu tame veik dalam tukvak anak tal. Dom taneh ia dalam angan kakei brei bruk nao mai takik glaong abih di Mỹ nan lac: Anh, Canađa, Pháp, Ixraen, Mê-hi-cô, Đức, Phần Lan và Thổ Nhĩ Kỳ. Mỹ urak ini pakauk bhap bini negar langiu hu tuvak daok di châu Âu, Trung Quốc, Braxin, Iran saong Nam Phi tame negar ini kayua taneh ia ini huac lac dom biến thể birau di SARS-CoV-2. Harei 20/04, Mỹ jeng hu brei dui atah veik 30 harei pakauk dom bruk nao mai oh njauk bruk khin tabiak di bhum taphia negar Canađa saong Mê-hi-cô.

  Ban Chu Hải di Trung Quốc hu ngak blaoh bruk klauk vaccine Covid-19 brei ka labaih 80% rahra, jeng ban camereip abih di taneh ia ini mek hu bruk pacang hu ruak dalam bhap bini. Yaom lac yau nan, bruk klauk vaccine Covid-19 di Trung Quốc jeng daok suai damuai. Urak ini, taneh ia hu 1 tỉ 4 ratuh triệu menuac ini bahrau ngak hu bruk klauk labaih 200 triệu mbang vaccine, dalam nan rilo menuac bahrau klauk mbang camereip, daok biak atah piah mek hu bruk klauk ka 560 triệu menuac di puac bilan 6./.

Urang lang: M.Phuong & A.Nghiem