Meng phun jien mesraiy takik laba 20 triệu đồng di Kadung jien daong urang nông, ong Võ Văn Lê daok di palei Thới Tứ 2, xã Thới Tam Thôn, huyện Hóc Môn blei hu 2 drei limo binai. Tapa 4 thun, meng sa baoh sang jaik si kan kathaot, sang ong hu rai diuk tani tanat. Tapon limo di ong Lê urak ini tagok hu 6 drei yaom jaik 100 triệu đồng:  

 “Drei mesraiy hu 20 triệu ye drei blei 2 drei limo praong 8 bilan mai raong. 8 bilan hadei nyu metian, 9 bilan 10 harei hadei nyu menek. Hadei di nan drei pablei drei anek, daok sa drei drei laba, bayar hu saraiy. Khak limo drei jeng pablei hu. Dalam bruk raong limo drei tarieng cakak hareik, mek pren ngak laba”.

Jeng meng kadung jien daong urang nông, amuk Trần Thị Phải, baoh sang jaik si kan kathaot daok di phường Tăng Nhơn Phú B, quận 9, ban raya Hồ Chí Minh buh jien tabiak pala 50m2 rau mầm di sang. Hadei di 5 thun tari tarieng ngak mbang, tal urak ini sang amuk Trần Thị Phải padang hu labik ngak rau mầm praong 200m2 dalam sang halam, dut paik njam, ngak njam mek hu chuẩn chuẩn VietGap kayua sở ngak nông saong patagok palei pala ban raya HCM brei harak chứng nhận. Yaok thun, labik ngak njam ini pabak ka darak pasar jaik 18 tấn rau mầm pablei hu 700 triệu đồng. Amuk Trần Thị Phải lac:

“Dahlak caong lac phun jien mesraiy brei ka urang nông rilo jang piah mikva peih praong bruk pala drak, blei dom jamriak chế biến piah pandap pablei hu yaom glaong di abih. Meyah phun jien takik ye drei oh peih praong bruk ngak mbang hu”.

Angaok nan tok lac 2 dalam biak ralo baoh sang urang nông di ban raya HCM tabiak truh hu kan kathaot meng dom bruk ngak lagaih saong bruk di ban raya. Bruk njauk uan tabuan nan lac tapa dom mô hình sản xuất hu kein laba ini, mikva urang nông hu bruk ngak mbang saong hu jien mek tame pak di labik oh njauk nao atah palei.

Di dom xã palei pala di ban raya HCM hu ralo bruk ngak hu kein lagaih, daong ka urang nông tabiak truh kan kathaot dalam phun jien mesraiy ngak mbang dom pluh triệu đồng, yau: bruk raong limo menek, raong ikan cảnh, pala rau mầm, pala njam an toàn, ngak mây tre lá, pablei salih sit. Di dom quận vùng ven saong 5 huyện langiu ban, karja yaok quận huyện jeng hu jalan ngak cambaih laih saong parabha nhiệm vụ dalam bruk patrun kathaot ka yaok mban, ngành, kapul nyaom. Ong Nguyễn Hữu Hoài Phú, akaok Ủy ban bhap bini huyện Củ Chi brei thau:

 “Jalan ngak di huyện Củ Chi lac ngak habar piah paglaong jien mek tame ka dom baoh sang bhap bini. Meng ralo jalan ngak, dalam nan kol dahlak jhul urang ngak nộng tapa ngak di dom cụm công nghiệp, khu công nghiệp piah tagok giá trị khai thác. Ka dua lac kol dahlak patui bruk kein lagaih di dom xã  gah timur piah jeng dom bein sinh thái, du lịch piah dui pachreih tuai damuai negar langiu jeng yau 10 triệu bhap bini di ban raya”.

Dalam 5 thun tapa, ban raya HCM hu daong labaih 3.000 tỷ đồng ka labaih 90.000 mbang baoh sang urang nông mesraiy piah sản xuất, pablei salih. Meng phun jien ini, yaok ribau urang nông di ban raya hu yam tagok truh kan kathaot saong ngak kaya meda. Langiu di nan, ban raya padang hu 83 klup kapul urang nông sản xuất, pablei salih joi, ngak mbang hu kein laba dalam bruk pandar ilamu kỹ thuật, daong urang nông hu pajaih, phun jien saong drak pasar pablei kaya nông.

Piah patrun kathaot khang kajap, UB bhap bini ban raya HCM daok peih dom jalan ngak piah ieu pataom dom nguồn lực di  xã hội, dom thành phần kinh tế tui jalan “patagok pren bhap bini piah iek glang ka bhap bini” Taphia di nan, daok brei jhul khang bruk jak ba “kadung jien ka urang kan kathaot”piah dom bruk ngak ka urang kan kathaot tuk halei jeng lac bruk pakacah gauk ranam taneh ia, dui pachreih hu bruk sangka hu mbaok di ralo bhap bini. Ong Trần Trường Sơn, Phaok akaok kapul urang nông ban raya Hồ Chí Minh brei thau:

“Jalan ngak dalam bruk tut angan piah daong, jalan patagok talei pambuak bruk piah daong urang nông gah phun jien, pato bruk ngak jeng yau bruk duah darak pasar. Sa bruk karei lac kol drei brei pambuak urang nông piah ngak hu kein laba. Ini lac dom bruk kapul urang nông ban raya ba tabiak dalam tukvak 2017-2021”. 

Gam saong bruk daong phun jien, kapul urang nông ban raya HCM jeng hu pambuak bruk saong sở ngak nông saong patagok palei pala jhul khang bruk salih jalan ngak nông tui jalan ngak nông đô thị, hiện đại meng bruk daong ka urang nông thau ilamu kỹ thuật, pandar công nghệ dalam sản xuất paglaong yaom pandap./.