Pataom iek viek danak dak jhul khang pablei salih

Dahlau dieh, yaok thun labik ngak hadang thu kraong Đầm di huyện Đầm Dơi, tỉnh Cà Mau tok pablei hu meng 400-500 kg hadang thu di dom tỉnh jaik taphia. Min, meng thun 2016 tal urak ni, tuk hu mbaok tame danak dak pambuak bruk pablei salih, yaok thun labik ni blei tabiak rilo jang dua mbang, yaom pablei tagok 20-30% duk saong dahlau. Saai Lê Minh Sang, po labik ngak hadang thu Sông Đầm brei thau: “ pandap panda di drei siam min pablei di tỉnh bhian njauk urang blei kateik yaom. Meng tuk tame danak dak jhul khang pablei salih, pambuak cung cầu ni ye dom doanh nghiệp yau ye Big C, Coopmart saong rilo kadai quan pandap hacih hu tal drei, hu pambuak bruk pablei hu rilo pandap jang"

5 thun tapa, 28 doanh nghiệp khik tani tanat yaom kaom darak pasa di ban raya HCM hu buh jien tame ngak 47 sang mac, labik sản xuất di dom tỉnh, ban Đông - Tây Nam Bộ. Dom  doanh nghiệp hu pambuak gauk, brei ka urang nong nyim jien raong glang, pala drak, blei viek abih pandap yaom 3 rabau 200 tỷ đồng sa thun. Dom doanh nghiệp khik tani tanat yaom kaom darak pasa ban raya hu padang dom talei pambuak bruk, padang bhum nguyên liệu tani tanat, suai lavik di dom tỉnh, ban ni. Muk Châu Thị  Lệ, Phó Giám đốc Sở Công thương tỉnh Long An brei thau:“ Dalam danak dak pambuak bruk ni, ban raya HCM hu ngak brei salih karei jalan ngak di urang pala Long An biak pachrieh tui. Long An daok pambuak bruk pabak ka ban raya HCM dom pandap siam jang. Meng nan ngak brei salih jalan saneng lac pandap Việt Nam yaom lap, oh siam.

Min, bruk pambuak gauk ngak tabiak, pabak pandap yau urak ni jeng daok hu dom kan kandah nan ye rilo pandap hu prien khang di dom puk palei jeng ka oh pambuak hu, oh ka pabak hu ka darak pasa ban raya saong yam tal bruk pablei tabiak negar langiu. Makna lac kayua pandap pabak brei di doanh nghiệp mbiah saong sit, sang ngak meng tangin takai oh ka tani tanat, oh ka siam samu gauk. Dom doanh nghiệp, dom labik pabak pandap di dom puk palei jeng ka oh caga hu, oh ka pambuak gauk hu dalam bruk pajeng ba, logistics, marketing... oh pabak hu bruk jao pandap, biyar jien, daong hadei di tuk pablei, salih, biyar, bảo hành... Ong Mai Sáu, Giám đốc Công ty TNHH Vĩnh Hòa Phát di huyện Năm Căn, tỉnh Cà Mau brei thau lac ngan haong dom doanh nghiệp sit brei hu bruk pambuak gauk piah ngak tabiak rilo pandap siam samu gauk saong brei hu bruk daong di kanja piah salih bahrau ilamo công nghệ: “Doanh nghiệp biak caong hu Sở công thương tỉnh daong gah pachrieh công piah salih bahrau jamriak, paglaong prien ngak tabiak rilo pandap panda saong trun yaom phun jien "

Piah paglaong siam lagaih di danak dak pambuak bruk, muk Nguyễn Huỳnh Trang, Phó Giám đốc Sở Công thương TP.HCM brei thau: Sở meda pataom tame, daong dahlau abih dom pandap panda kaya nong, đặc sản mek hu tanut salamat pandap mbang. Gam tui di nan padang dom talei pandap salamat, pambuak gauk khang kajap, pablei pandap kein lagaih piah paglaong kein laba bruk pablei pandap dalam taneh ia saong pablei tabiak negar langiu, patrun jien ka urang dang kreh. Ban raya meda lang talaih kan kandah saong jhul khang bruk pambuak gauk ni, ong Dương Anh Đức, Phó Chủ tịch UBND TPHCM ndom lac: “TP.HCM lac labik ngak dom khâu chế biến mayah pambuak gauk meda ngak tabiak dom pandap panda yaom glaong jang. Vaktu anak tal, UBDN TP meda pato tacei dom gah di ban pambuak bruk saong dom tỉnh, ban peih ngak catang bruk jhul khang pablei salih, daong ka dom gah pambuak gauk, lang talaih dom tavak tavaiy ka dom gah, daong palagaih ka doanh nghiệp pambuak gauk pablei salih, ngak tabiak pandap saong pablei tabiak negar langiu "

“Khin nao samar ye nao sa drei, khin nao atah ye nao rilo menuac” nan lac jalan pablei salih bo rilo doanh nghiệp biak thau saong biak takre. Kayua yau nan ye piah ba gauk nao atah saong cak rok patagok jang, ban raya HCM saong dom tỉnh, ban Đông- Tây Nam bộ daok jhul khang bruk pambuak gauk atah saong suai lavik dalam vaktu anak tal. Rilo urang nong, doanh nghiệp hu mbaok tame danak dak caga buh jien tame paglaong chất lượng pandap  pabak ka dom kadha salamat hacih pandap mbang saong peih praong bruk ngak mbang, pala drak piah hu mbaok tame bruk pambuak bhum, pamaong tal darak pasa pablei tabiak negar tangiu saong ba gauk yam tabiak “tasik praong” ./.

Urang lang: Thu Thảo – 29/09