Rilo thun tapa, ban raya Ho Chi Minh lac labik ngak siam bruk khik hu tani tanat yaom kaom. Danak dak ini hu rik daong tani tanat dom janih pandap ngak mbang ngak huak yaok harei di ban raya, daong dui patrun bruk tagok  yaom saong jeng bruk khik ramik yaom di darak pasar. Abih di nyu nan lac, dalam tuk tet nguyen dan athak thaih barau blaoh, danak dak khik tani tanat yaom di ban raya sa mbang tra brei mboh bruk kein laba di nyu. Kadha vak di Cao Thoa – urang vak daok di ban raya Ho Chi Minh brei thau ka bruk ini, daa mikva saong grauk yut tui pang :

 Dahlau, dalam saong hadei tet, pandap panda saong dom kaya mbang huak dalam darak pasar ban raya Ho Chi Minh hu biak rilo janih. Pak dom sieu thi, pasak blei pandar, dom darak meng kan atau dom cua hang pandap panda kaya mbang, urang blei, urang pablei biak rilo  min oh hu bruk kurang pandap, tagok yaom. Amuk Le Thi Bay, urang daok di quan Thu Duc mboh lac : “ Urak ini, yaom pandap di darak pasar jeng hu tani tanat abih, oh tagok yaom. Njam, ikan, rilo yaom yau dahlau, oh chiat, oh tagok yaom, blei salih  mbuan jang duk saong dom  thun dahlau”

Tapa danak dak khik tani tanat yaom kaom, bhap bini oh daok duh hatai anak bruk kurang pandap, yaom tagok tal having akaok, daok doanh nghiep ye hu jalan piah ngak pandap, pabak ginup pandap panda ka darak pasar. Danak dak ini ba mai kein laba ka urang blei, ka labik ngak pandap saong doanh nghiep. Ong Van Duc Muoi, Tong Giam Doc Cong ty Vissan, sa dalam dom labik hu mbaok tame dahlau danak dak tani tanat yaom kaom brei thau : “ Kol dahlak jeng hu urang blei klah rabha saong jia tame angan Vissan yau nan ye, kol dahlak jeng tagok hu kaya pandap, bo tagok hu kaya pandap ye kol dahlak trun hu yaom jien buh tame ngak. Meng nan, parabha ka urang blei meng bruk khik tani tanat yaom. Ini lac bruk pambuak nao mai di urang blei saong urang ngak saong urang pablei salih” 

Danakdak khik tani tanat darak pasar tagok hu kein laba nan nyu brei mboh bruk sami samar dalam khik ramik, tacei pato saong kuhria mboh dahlau di ban raya ka bruk ngak pandap, bruk pabak pandap saong pren blei pandap panda, abih di nyu nan lac dalam tuk tet. Meng bilan 4 thun 2013, dom urang pan akaok ban raya hu jao ka dom doanh nghiep daok dalam danak dak khik tani tanat yaom kaom kuhria caga 9 nyaom pandap hu pandar rilo saong pandap panda hu ngak tabiak, khik piah ginup pablei dalam 2 bilan dahlau saong hadei tet nguyen dan samu yaom jien abih tih labaih 7.500 tỷ đồng, tagok 40% duk saong tet Qui ty thun 2013.

Pandap di dom doanh nghiep tame danakdak khik tani tanat yaom kaom di darak pasar meblah meng 30 tal 40 % thị phần. Dalam nan, rilo nyaom pandap panda meblah thị phần praong, nan lac menyek mbang labaih 60%, rilo athur labaih 66%, rilo menuk ada 40%,  baok menuk ada 47%... Langiu di nan, dom doanh nghiep praong di ban raya ye Saigon Coop, Vissan saong dom doanh nghiep karei hu kuhria caga pandap panda praong pabak ka dom puk palei daok jaik taphia tapa dom jalan phan phoi di drei.

Kadha njauk ndom nan lac meng thun 2013, ban raya oh daok daong jien meng kadung jien karja oh mek laba ka dom doanh nghiep hu mbaok tame danak dak khik tani tanat yaom kaom bo salih tapa bruk pambuak dom doanh nghiep saong dom Gilang pariak saong mek laba mbiah, meng 6% tal 9%. Tukvak tapa, hu 5 gilang pariak tut angan saong paok jien daong jaik dua rabau ty dong saong peih brei mesraiy hu jaik 500 ty dong. Abih di nyu nan lac, hu biak rilo doanh nghiep tut angan tame danak dak khik tani tanat yaom kaom, min oh taduan bruk daong jien di ban raya. Oh lac pataom tame khik tani tanat di tuk tet, ban raya daok khik ramik, cakrok 4 danak dak khik tani tanat saong padang jalan ba pandap tani tanat yaom kaom nao tal 24 quan, huyen. Yau nan ye, bhap bini ban raya daok di grauk labik jeng blei hu pandap tani tanat. Bruk tagok yaom hu trun takik, daong ka bhap bini hu sahanang hatai jang dalam raidiuk mbang ngui yaok harei. Amuk Nguyen Thi Hong, phaok akaok Uy mban bhap bini ban raya Ho Chi Minh brei thau: “ Urak ini, ban raya Ho Chí Minh daok hu 4 danak dak tani tanat yaom kaom nan lac : danak dak pandap mbang menyum, danak dak jru prang, danak dak tapuk katap anek saih saong danakdak ia tasau ka urang taha saong uranaih. Meng 4 dana kdak ini, ban raya hu labaih 7.500 labik pablei. Meyah kuhria ta-eng danak dak kaya pandap mbang menyum hu 3.281 labik pablei. Meyah duk saong thun 2008 tagok 3.033 labik pablei”.

Kein laba di danak dak khik tani tanat darak pasar di ban raya hu Thu tuong rajaei taong yaom glaong. Thu tuong brei thau : ini lac bruk njauk patagok saong pambak praong dalam taneh ia. Thu tuong Nguyen Tan Dung ndom lac :  “ Tani tanat yaom di ban raya biak hu makna saong bhum. Tuk dahlak mboh ba tabiak yaom di ban raya lac dahlak sahneng tabiak yaom dalam taneh ia. Yau nan ye, ini lac bruk bo kol drei njauk patagok piah gam tani tanat ka ban raya saong ka taneh ia.”

Meng danak dak khik tani tanat yaom kaom darak pasar, ban raya Ho Chi Minh daok peih ngak danak dak pambuak bruk, pambuak pablei salih saong rilo tinh, ban dalam bhum gah Đong  saong Tay Nam Bo, tapa nan, rik daong gam saong dom tinh peih bruk khik tani tanat yaom kaom, khik ramik darak pasar di ban raya saong bhum kinh tê praong gah meraong./.

     Bien dich Thuy Linh