Pathau mikva saong taong abih gauk!

Lingik tasik Tây Bắc alin brei ka Sơn La hu biak rilo kaya nong pahe bingi, dalam nan hu khoai sọ Thuận Châu. Meyah urang halei hu nao tal Sơn La saong hu mbang janih bei hu angan ini, tantu oh var hu yamen, pahe bo oh hu sa janih bei halei karei hu yau nan.

Meng akaok bilan 9 saka ia harei, angaok jalan meng ban sit Sơn La nao Thuận Châu, rah tui 2 gah jalan roya 6, tuai damuai hu mboh khoai sọ Thuận Châu hu pablei biak rilo. Khoai sọ hu parang tabiak piah tuai ruah blei tui hatai, atau hu  caik tame yaok yot sit piah lagaih ka urang blei. Meng livik mai, khoai sọ Thuận Châu hu rilo menuac thau tal kayua nyu biak pahe, bingi. Khoai sọ di labik ini nyu gul yau khoai môn, tuk tasak nyu yamen, dẻo, pahe. Abih di nyu nan lac khoai sọ Thuận Châu ngak ia bai haong ralo pabui meda ye bingi oh hagait samu. Bei hu kaoh jeng candaih sit tuk haong ralo meda, buh hasit njam patam, hasit gia vị, hala thì là ye nyu biak bingi. Lingiu di nan, khoai sọ Thuận Châu daok hu ngak món chiên yau bei prang. Urang jeng bhian kaoh bei tabiak jeng candaih sit caik tame gaok lisei, mbang haong sara lange biak bingi cambuai. Sa-ai Tòng Văn Diện, daok di Thuận Châu brei thau:

         "Bei Thuận Châu mbang bingi, abih di nyu nan lac bei di bản Cụ, bản Cang mbang mboh nyu karei jang bei pala di dom bhum karei. Candaih bei caik tame cambuai mboh nyu yau ralai dalam cambuai, yamen, pahe, bingi, daok bei di bhum karei mbang tame mboh nyu yau gam tame cambuai."

          Xã Chiềng Ly urak ini hu 30 héc ta taneh pala khoai sọ. Khoai sọ pala di bản Cụ, bản Cang di xã hu angan lac pahe, bingi di abih. Tui ông Lường Văn Minh, akaok Ủy ban bhap bini xã: Kayua 2 bản ini hu lingik tasik karei jang dom bhum karei, taneh bhong, limin pasaoh, độ ẩm rilo nan ye bei biak bingi, năng suất jeng glaong, trak jaik sa kí lô. Rilo thun ini mai, bei hu pablei yaom biak tani tanat, meng 20 tal 25 ribau sa kí lô. Dom urang pablei salih bhian  yar jien dahlau, mai blei tal sang, mikva oh daok cang ba tabiak darak pasar :"Pala khoai sọ tuk halei jeng pablei hu yaom, oh huac laik yaom. Daok pala tanei ye tuk njauk, tuk oh, tuk njauk ye yaom lap"

          Huyện Thuận Châu urak ini hu labaih 100 héc ta khoai sọ, rilo meng mboh di Chiềng Ly, Chiềng Bôm, Nậm Lầu..... Ini daok lac sa dalam dom janih kaya nong hu yaom pablei pak bein tani tanat meng 15 tal 20 ribau sa kí lô. Huyện hu padang 2 tổ hợp tác di xã Chiềng Ly; patagok bruk yaih khan bei tapa dom mbang nyaom darak pasar di huyện, di tỉnh piah pambuak haong dom doanh nghiệp blei abih bei di mikva. Peih dom mbang pasram, tacei urang ngak nong jalan pala, jalan buac mek saong khik piah bei, ngak ka bei hu hacih sa-at saong siam mekre. Ong Lò Minh Nhã, Phó phòng ngak nong saong patagok palei pala huyện Thuận Châu, tỉnh Sơn La brei thau:"Huyện hu daong bhap bini piah ngak harak likau chứng nhận nhãn hiệu ka khoai sọ huyện Thuận Châu. Huyện hu pambuak bruk haong Sở khoa học công nghệ, pilih ruah hu gah tư vấn piah ngak bruk ini. Tui kuhria, tal thun 2018 hu brei harak chứng nhận nhãn hiệu sản phẩm khoai sọ huyện Thuận Châu."

          Khoai sọ lac phun pala takik hu halak halin ruak kik saong meda pala pablak haong dom janih phun karei, daong ka urang ngak nong oh klaak taneh saoh, caik taneh siam piah pala dom janih njam patam baoh kraoh karei karei. Min urak ini di Thuận Châu, phun pala ini jeng daok hu pala sit sot, kayua yau nan ye, njauk quy hoạch cambaih laihc bhum pala, padang angan, duah labik pambuak bruk khang kajap piah daong ka bhap bini hu jien mek tame rilo saong tani tanat raidiuk meng phun khoai sọ./.