Dom thun tapa, Kapul Doanh nhân ranaih umo tỉnh Đắk Lắk hu ralo bruk ngak piah daong hội viên cakrok patagok kinh tế. Yau ye bruk pambuak gauk peih giao lưu xúc tiến thương mại, yaih khan jalan buh jien tame ngak mbang dom gah kinh tế; peih bruk nao rivang iek, bac megru ilamu ngak mbang di dom doanh nghiệp dalam negar… Sa-ai Phạm Đông Thanh, Akaok Công ty TNHH vận tải ô tô An Phước - Buôn Ma Thuột, tỉnh Đắk Lắk brei thau: "Kapul doanh nhân ranaih, drei bahrau hu mbaok tame jaik di ini, tapa nan drei hu thau dom thông tin  di Đảng saong karja, di raja-ei puk palei. Kadua lac dalam tuk hu mbaok tame bac megru hu ilamu ngak mbang di dom doanh nhân karei, meng nan meda pabak saong ngak siam bruk khik iek dom doanh nghiệp karei siam jang...”

         Lac urang takre bruk ngak nong công nghệ glaong, sa-ai Đặng Văn Huy, xã viên Hợp tác xã ngak nong Bình Minh, daok di xã Chư Suê, huyện Cư M’gar hu mbaok tame Kapul Doanh nhân ranaih tỉnh Đắk Lắk haong hatai caong khin kapul lac talei pambuak bruk piah hu  daong ba siam jang meng karja, yau peih abiak dom phun jien daong, pato megru urang ngak, pabei pandap panda kaya nong… Sa-ai Đặng Văn Huy lac: “Urak ini hu mbaok tame piah klah rabha ilamu kinh nghiệm, piah duah labik pablei kaya nong hu siam jang, coang khin hiệp hội doanh nhân ini dak padang jeng sa hiệp hội khang, patagok ka abih cộng đồng di anak tal. Daok phun jien meyah hu peih brei ye lac siam, daok meyah oh peih brei hu ye njauk ba trun puk palei, xã phường piah ka dom urang nan hu mesraiy...”

Langiu di bruk pataom tame cakrok patagok bruk ngak mbang, pablei salih, yaok pluh hội viên Hội Doanh nhân ranaih tỉnh Đắk Lắk abih drei hu mbaok tame bruk an sinh xã hội, pamaong tal cộng đồng. Meng kaok thun 2016 tal ini, labaih 40 hội viên doanh nhân ranaih tỉnh Đắk Lắk hu rik pataom yaok tỷ đồng daong ka dom puk palei, daong ka bhap bani dalam saong langiu tỉnh pasiam veik dom khut khat kayua bala meng langik tasik; daong dom baoh sang kan kadnah, baoh sang sarak karja, hu mbaok tame dom bruk pachreih bac... Sa-ai Huỳnh Văn Toàn, Akaok Kapul doanh nhân ranaih tỉnh Đắk Lắk brei thau: “Anak meta lac kapul lambaok ka adei sa-ai doanh nhân pamong tal bruk ngak xã hội, ngak pahla, tal mikva hu rai diuk kan kandah, bhap bani njauk aia sua… Gam haong nan khaol dahlak jhul khang talei pambuak bruk haong dom doanh nghiệp, patagok bruk nao rivang iek dom mô hình ngak mbang hu piah klah rabha, ba gauk nao tagok…”

Anak tal, Kapul doanh nhân ranaih tỉnh Đắk Lắk meda hu ralo bruk ngak yau: Patui veik jhul pakhang dom bruk daong ka doanh nghiệp hội viên; peih bruk daong ba dam dara padang mbang ngui; patagok dom bruk pambuak gauk pablei salih, taom gaok doanh nhân ranaih haong dom negar dalam bhum hu jalan tapen negar haong gauk; peih ngak danak dak pasang iek, njaom biai xúc tiến thương mại haong  doanh nghiệp langiu khu vực saong duah cơ hội đầu tư; ba tabiak bruk padang dom chi hội doanh nhân ranaih pakat cơ sở./.