Dom baoh sang raong glang njauk pasang iek jit di dom jabat chuyên môn 

Buh jien tame ngak var raong khang kadang, min thun 2019, labaih 30 drei pabui ralaow di sang muk Phạm Thị Ngợi daok di xã Phong Nẫm, ban Phan Thiết jeng matai kayua jit tả pabui châu Phi, khat lahik yaok rituh triệu đồng. Urak ni yaom pabui daok di tanut glaong min muk Ngợi jeng ka oh khin raong viek, var raong dahlau daok hu pandar piah raong manuk. Muk Ngợi ndom lac: “urak ni pajaih pabui biak glaong, 6-7 kg bo tal 3,2 triệu đồng/ sa drei, bo kan blei hu. Dalam tuk nan, jit ruak mboh yau oh ka abih mbong nan ye rilo urang oh khin raong viek.

Muk Vạn Thị Hạnh, puk Tiến Hưng, xã Tiến Lợi jeng lac sa dalam dom sang raong pabui hu angan je di ban Phan Thiết. Tuk ka oh hu jit ruak tamuh tabiak, dalam var bhian hu takik di nyu 60 drei pabui. Min, vaktu ni, dom pabui  dalam var daok sa mateh dut saong dahlau. Kan kandah lo, muk meng blei hu dom drei pajaih pabui di gah krieh negar min yaom glaong di abih kuhria meng tuk raong pabui tal urak ni, meng 2,5 – 3,8 triệu đồng/ sa drei tui drei praong atau sit. Yaom lac caong raong rilo yau dahlau min kurang phun jien, langiu di nan dom janih jien buh tame jeng tagok khang yau nan ye muk Hạnh ka oh raong viek hu.

Tui ong Nguyễn Ngọc Vấn – akaok Chi cục raong glang saong Thú y Bình Thuận, kayua njauk kan kandah di jit tả papui châu Phi meng thun blaoh nan ye taong abih tapon pabui trun ngak ka yaom pabui tagok glaong. Taong abih tapon pabui di dalam tỉnh urak ni lac labaih 324 ribau drei, samu labaih 97% dut saong tuk ka oh hu jit tamuh tabiak. Vaktu urak ni, langiu di bruk kurang pajaih saong yaom glaong ye jien buh tame lac sa bruk ba tal kan kandah ka urang raong viek pabui.

Ong Vấn brei thau, bruk raong viek oh njauk peih tabiak rilo bo peih ngak tui njauk jalan pato tacei di gah chuyên môn. Tui nan, dom sang bhap bini, abih di nyu nan lac dom baoh sang raong sit sot njauk raong viek tui jalan khik hu salamat sinh học, ngak njauk, ngak catang dom adat pacang caga jit. Dom baoh sang raong glang tuk blei anek pajaih njauk caik hatai duah thau cambaih asal di nyu, blei meng dom labik hu angan ye. Abih di nyu nan lac, dalam tuk blei, pajeng ye njauk pasang iek jit di dom jabat chuyên môn. Langiu di nan, dom sang raong njauk pasang iek catang var raong glang, abih di nyu lac bruk tame tabiak di anek manuac. Hu yau nan, bhap bini meng khik hu bruk raong pabui dalam palei.

Tal puac thun ni, tỉnh Bình Thuận ba tabiak jalan ngak lac cak rok patagok  tapon pabui 292.500 drei, sản lượng ralaow blei tabiak labaih 59.000 tấn. Piah ngak hu bruk nan, gah ngak nong meda pambuak bruk haong dom tinh, ban, pato tacei saong ba mbuan lagaih ka urang raong glang jhul khang bruk raong viek tapon pabui, tagok tapon raong tui jalan khik kajap salamat sinh học saong salamat jit ruak; gam tui di nan, padang bruk raong viek ka nyu lagaih haong bruk di anak meta, khik kajap bruk cung - cầu ralaow pabui./.

Urang lang: Thu Thảo - 29/07