Darak padang eng

  Atah di khu phố Tây sa jalan, darak tamuh eng Cô Giang, phường Cầu Ông Lãnh saong phường Cô Giang - Quận 1, Ban raya HCM lac sa labik karei jang, ron sir saong nerak. Dom bilan dahlau, yaok rituh quầy, sạp daok pajiak gauk lih tabiak jalan Cô Giang (meng Nguyễn Thái Học tal jalan Hồ Hảo Hớn) saong jalan Đề Thám (meng Trần Hưng Đạo tal jaik jalan Võ Văn Kiệt), ngak brei mbaok jalan sit veik saong khut mbaok jalan kayua luac thun kandaong ia tuh tathuak di dom kuan pablei pandap mbang.

Hu labaih 10 thun daok di labik Cô Bắc - Cô Giang, muk Nguyễn Thị Nhung bhian randap haong bruk subuh page peih meta tabiak lac mboh ron sir saong sraw kadau dom radaih tame tabiak di darak tamuh eng ini. Hadei di tuk nao daok di labik karei, birau ini hu mai veik labik daok klak, muk mboh tatuah drei anak bruk salih birau di labik ini. Muk Nhung bui sambai lac, harei ini jaln mbak laneing lanoi, mekre lo. Quận 1 yah hu darak ini, mbaok meta labik ini hadah hadai tagok.

Lac urang hu mbaok meng tuk darak Cô Giang birau tamuh tabiak, yaom lac yam tabiak pabah mbang lac blei hu pandap mbang min muk Nguyễn Mỹ Hạnh  daok di jalan Cô Bắc jeng mboh oh njauk hatai haong bruk darak tamuh eng di kreh phố, tuk halei jeng mbau hanye ikan, hadang, dom njam patam khut bruk saong ia nerak, hareik pambuk. Muk Hạnh khan lac: “Duk saong labik pasak ye takai jalan, mbaok jalan labik ini praong laneng, min tal biar harei meng mboh, kayua meng subuh page tal jala pandiak, yaok rituh  labik pablei njam patam, rilo, ikan, radaih pablei pandap lih tabiak jalan abih jaik 1 mét. Urak ini nao darak atah jang, min khol dahlak bui sambai kayua hu daok di labik hacih sa-at, oh srau kadau yau dahlau.

Dreih yau nan, sa thun ini mai, jalan hẻm 41 Nguyễn Văn Tráng, phường Bến Thành jeng hu salih birau mbaok meta. Subuh page, tabiak tuh ia bingu anak sang blaoh pasram rup pabhap, ong Trần Vũ Duy brei thau lac, dahlau diah, labik ong dang lac labik pablei iakn. Tuk nan, yaok bilan ong jeng hu hasit jien pah labik daok di dom urang pablei min raidiuk biak laih glar. Ong Duy chreih chrai khan lac: “Khin nao hlei meng radaih lac biak kan kandah, ndom hagait tal bruk hu harei laneng lahei tuh ia ka phun, pasram rup anak sang. Yau nan bo urak ini, yaok pluh sạp di darak tamuh eng  di labik ini oh daok, bayar veik jalan hacih sa-at njauk lih mek labaih 20 thun tapa, jeng yau bayar veik sron mbon ka khol dahlak.”

Ong Lưu Trung Hòa, Phó akaok UBND quận 1 brei thau darak Cô Giang hu meng thun 1994, hu 349 sang pablei salih, bruk pablei salih  di dua gah jalan  Cô Giang, Đề Thám meng 5 tuk tal 13 tuk. Darak ini oh hu sang hu tabung, sạp darak, oh hu labaik pataom mek hareik, ia nerak tachrauk…ngak kanjiak jhak tal alam moi truong, jalan mbak nao mai di labik ini.

  Ong Lưu Trung Hòa brei thau: “ Sa darak hu meng labaih 25 thun ngan saong yaok rituh baoh sang pablei salih, bruk pathau khan, jak ba saong langyah oh mbuan nan ye dom gah di phường, quận abih rilo tukvak. Min tuk Thành ủy Ban raya HCM tabiak Chỉ thị 19 ka bruk jak ba “Bhap bini Ban raya HCM oh klak hareik tabiak jalan saong kraong ribaong, brei ka ban raya hacih saong takik duak ia”. Tal urak ini, taong abih dom baoh sang pablei salih jeng padeih pablei. UB bhap bini  quận 1 hu daong dom baoh sang yaom jien abih tih jaik 14 tỷ đồng, rilo baoh sang daok hu quận daong salih bruk ngak piah tani tanat raidiuk.

Langiu di nan, UB bhap bini quận 1 jeng hu pasang iek, yaih khan 35 labik pablei salih daok klak saoh di darak Tân Định saong darak Đa Kao brei ka dom urang pablei salih di darak hẽm 41 Nguyễn Văn Tráng palih ruah, tut angan pah meyah khin pablei salih veik. Dahlau di nan, thun 2009, quận 1 jeng yah klaak hu darak Nancy di jalan Nguyễn Văn Cừ (phường Cầu Kho) ngan saong 169 baoh sang pablei salih./.

Urang lang: Aí Nghiêm -4/1