Bahrau mboh hu 6.000 pandap ja tauk angan pandap hu angan je hu ba tame dom drak pasa di TP.HCM

Tui UBND tỉnh Bình Phước, dalam thun 2020 yaom lac kinh tế gaok kan kandah trak meng jit Covid- 19, min jien mek tame kadung jien karja di tỉnh jeng hu 11.608 tỷ đồng (samu 169% tanut TW jao). Thun 2020, Bình Phước hu 21/24 tanut kinh tế - xã hội rilo meng ngak hu saong ngak rilo jang tanut ba tabiak, bruk ngak kong tagok 12,5%, yaom kaya nong ngak hu rilo jang 10,3%, jien pablei pandap tabiak negar lingiu tagok 7,3%. Tỉnh Bình Phước ba tabiak bruk lac tal thun 2025, jien mek tame kadung jien karja tỉnh tui kuhria hu 20.000 tỷ đồng.

Beir harei 20-1, di mblang kapan haoh Biên Hòa (tỉnh Đồng Nai) hu rah tabiak bruk brei thau tukvak ka sa danak dak langyah nerak dioxin mblang kapan haoh Biên Hòa song dom labik taom dar. Danak dak yaom 300 triệu USD ni dui atah dalam 10 thun song dom haluk hu langyah tagok tal yaok rituh rabau mét khối. Tui bruk nan, lambaok gah Mỹ song Việt Nam hu ba tabiak danak dak daong urang jaoh jo Việt Nam di 8 tỉnh brei ngak dahlaui song mbaoh tangin tame harak pambuak bruk brei thau ka pasiam veik khut khat hadei di mesruh metak di Việt Nam. Meyah hu peih ngak, danak dak meda ba mai kein lagaih ka labaih 100.000 urang jaoh jo song gauk gar di dom urang nan, pasiam veik bruk dong ka urang jaoh jo di 8 tỉnh Quảng Bình, Bình Định, Thừa Thiên Huế, Tây Ninh, Đồng Nai, Quảng Trị, Kon Tum song Bình Phước.

Dalam mbang ginum biai "Tacei tabiak, jhul kadun likuk bruk tín dụng đen” hu peih tabiak harei 20/1 di TP Hồ Chí Minh, Thiếu tá Trịnh Khánh Hùng, Phaok akaok jabat Cảnh sát Hình sự CA TP Hồ Chí Minh brei thau, jaik di ini, dom bruk brei mesraiy laba trak, "tín dụng đen" rah tabiak rilo, bhian pagam tal dom bruk ngak suan adat hukum yau ye: cap mek menuac suan hukum, kateik greik blah mek drap ar, taong paoh, palai pajao drap ar, pametai menuac… Bruk njauk biai nan lac, "tín dụng đen" hu ngak tui rilo jalan piah pachot urang mesraiy jien, yau ye yaih khan angaok mạng, phát tờ rơi brei mesraiy jien oh cang taom mbaok…piah plaih CA, mbuan ba tal srau kadau puk palei.

Kapul cảnh sát kinh tế pambuak bruk song Công an phường Tân Phong, ban Biên Hòa (tỉnh Đồng Nai) brei thau lac bahrau mboh hu 6.000 pandap ja tauk angan pandap hu angan je hu ba tame dom drak pasa di TP.HCM, hadei di nan ba tal dom khu công nghiệp pablei ka urang ngak. Hu thau, mesup 20/1, gah chức năng pasang iek sa labik pablei salih Hoai Dior Nguyên di khu phố 11, phường Tân Phong kayua muk Nguyễn Thị Hoài (umo 35 thun) ngak po. Tuk vak pasang iek, pak di gilang caik pandap prong tal yaok rituh mét vuông hu dom pandap panda yau kadung bak, vali, balô, camin meta…Tapa pasang iek, hu labaih 6.000 pandap ja mek dom angan hu angan je angaok drak pasa urak ni. Tapa duah thau mboh lac labik ini peih tabiak ngak hu labaih sa thun.

Yaom baoh meriak di dom darak praong di TP Hồ Chí Minh daok tagok yaom biak samar, meng 200.000 - 220.000 đồng/kg kayua takik hu. Tuk baoh meriak mai tal dom darak, yaom nyu hu kuhria pagam tame yaom xang menyek, pajeng ba nan ye yaom tagok glaong. Tui Cty Cholimex, labaih 1 bilan ini yaom meriak tagok glaong di gah meraong lac kayua kurang baoh saong urak ini doanh nghiệp daok gaok kan kandah piah hu ginup baoh meriak ngak pandap pablei Tết. Min piah khik kein laba di urang blei mbang, Cty kuhria yaom rah tapa dalam thun nan ye yaom lac baoh meriak tagok yaom min dom pandap ngak meng meriak jeng daok hu khik yaom tani tanat.

Harei kabroi (20/1), Tổng Thư ký Liên Hợp Quốc Antonio Guterres pok meyaom bruk Mỹ sinya veik song Gah Y tế dunya (WHO). Kayua bruk dong di Mỹ lac biak prong dalam kham merat di dunya piah pacang cakak siam jang song jit prong Covid-19. Urang brei panuac di Tổng Thư ký Liên Hợp Quốc Stephane Dujarric brei thau, ni lac tuk vak bhap bini dunya jum pataom gauk piah pacang cakak vi rút SarsCoV-2 song dom kanyah jhak di jit prong. Urak ni tok hu vắc xin lac pandap prong dalam bruk mesruh pacang veik Covid-19, nan ye bruk Mỹ hu mbaok tame song dong danak dak Covax kayua WHO dang akaok, meda pabak pren khang song khik caga pabak samu gauk dom vắc xin ka tong abih dom taneh ia angaok dunya.

Chứng khoán Phố Wall (Mỹ) kreih pabah mbang di tanut glaong di abih dalam mbang giao dịch harei 20/1 hadei di tuk ong Joe Biden tagok ngak Tổng thống ka 46 di Mỹ. Dom darak pasar chứng khoán angaok dunya bak sambo hijao meng hatai chreih chrai di dom urang buh jien tame ngak mbang anak bruk ngak di Tổng thống bahrau di Mỹ brei buh tame jaik 2.000 tỷ USD piah pachreih kinh tế praong abih dunya ini.

Melam 20/1 (tui tuk vak di Mỹ), sa sruh trực thăng di gah Khik caga negar Mỹ laik trun dalam sa bruk pato pasram di gah lingiu ban New York ngak brei 3 urang lin metai. Sruh kapal haoh nan laik di ban sit Mendon, atah di ban sit Rochester labaih 27 km nao gah merong. Sruh kapal haoh gaok bala lac trực thăng panduan ba y tế UH-60./.

Urang lang: M. Phương – Hani Pha – 21/01