- Tui kuhria mboh di Sở Y tế tỉnh Bến Tre, meng urang ruak akaok meti di thun 1993 tal ini, tỉnh Bến Tre hu labaih 2.700 urang njaom HIV; dalam nan hu labaih 1.800 urang salih tapa AIDS,  jaik 1.000 urang metai. Ta-eng thun ini, dalam tỉnh hu 177 urang njaom HIV.  

 -Piah pacang caga ruak “thế kỷ”, tỉnh Bến Tre hu patagok bruk pathau khan, tacei pato dalam bhapbini. Tapa nan, paglaong akaok sahaneng di bhapbini ka kanjah jhak, jalan pambak ruak saong bruk caga plaih ruak HIV/AIDS. Gam saong nan, dom gah, dom kapul nyaom di puk palei peih ngak siam dom bruk yau ye: daong ka dom urang mbuan si gaok pambak ruak HIV nao dut iek; jak ba dom urang njaom ruak nao iek ruak meng jru ARV.  Dom bruk ngak yau: pathau khan, jak ba urang nghiện ma túy menyum jru Methadone salih ka pandar jrum klauk, pabak brei dom bruk pacang caga anak bruk njaom HIV hu peih ngak…

-Abih di nyu nan lac di tỉnh Bến Tre  daok khik hu 6 kalup kapul piah ka dom urang njaom HIV/AIDS mai taom gaok, klah rabha saong gauk. Bruk njauk biai nan lac kalup kapul Li-u hijao tapa 8 thun ngak bruk tal ini, pataom hu 25 urang tame pataom gaok gam gam yaok bilan sa mbang saong labaih 200 urang karei hu mai taom gaok di kalup lapul ini. Saai  Đinh Hoàng Châu Bảo, daok di Phường 6, ban Bến Tre, Chủ nhiệm kalup kapul Li-u hijao brei thau: meng bruk ngak di kalup kapul Li-u hijao bo dom urang ruak mai jaik gauk gauk jang, klah rabha saong daong gauk dalam bruk pacang caga HIV/AIDS; patrun bruk phân biệt, kỳ thị, kham merat nao iek ruak, pasiam pren yava:Rup drei hu H yau nan ye drei thau hu bruk kan kandah di urang hu H. Drei ndom ka rup drei, klah rabha dom alamu di rup drei. Nan lac drei tacei tabiak dom bruk siam, dom kanyak jhak ka dom ayut mboh, blaoh dom ayut pilih ruah  jalan ka drei, drei klah rabha haong dom ayut.

-Meng peih ngak sumu gauk rilo bruk, urak ini urang njaom  HIV dalam bhapbini di tỉnh Bến Tre daok jaik 0,13%, bair jang rilo duk saong tanut trung bình dalam tanneh ia (0,3%) saong bair jang rilo di bhum taneran kraong CL. Bruk njauk biai nan lac labaih 80% dom urang njaom HIV di puk palei thau hu ruak di drei, hu 87% urang ruak hu iek ruak meng jru ARV. Yaok harei hu jaik 300 urang nghiện ma túy nao tal cơ sở y tế atau pasak pacang caga HIV/AIDS tỉnh Bến Tre piah menyum jru Methadone salih ka bruk klauk dom chất ma túy karei. Bruk ngak ini nyu patrun bruk pambak HIV tapa jalan jrum klauk saong daong dom urang ruak cakak nghiện ma túy. Daok sruh jit HIV/AIDS di xã Ngãi Đăng, huyện Mỏ Cày Nam hu mboh di thun 2012, urak ini oh hu urang njom barau. Bhapbini puk palei hu tanit tanat tâm lý, sahanang hatai diukrai.

-Urak ini, rilo urang ruak HIV/AID di tỉnh Bến Tre  nao ngak mbang atah kan si pasang iek; hu oh takik urang mbuan si pambak ruak oh ka abih hatai haong bruk xét nghiệm, duah mboh ruak drah samal piah pasiam ruak. Hu dom urang ruak oh ka khin menyum jru ARV... Kayua yau nan ye, anak tal, bruk pacang caga HIV/AIDS  saong bruk pasang iek, klah rabha kan kandah saong urang ruak di puk palei ini daok hu sangka. Amuk Lê Thị Kim Thoa, Giám đốc pasak pacang caga HIV/AIDS tỉnh Bến Tre lac: Kol dahlak peih praong dom dịch vụ tư vấn xét nghiệm tal puk palei piah ka bhapbini mbuan lagaih nao xét nghiệm HIV.  Di sang iek ruak lac kol dahlak paglaong tư vấn xét nghiệm ka urang ruak piah xét nghiệm sớm HIV. Kol dahlak daok ba tagok UB bhapbini tỉnh daong jien blei thẻ bảo hiễm ka urang njaom HIV piah pandar ka bruk iek dom ruak pambuak tal HIV; hu menyum jru ARV.

-HIV/AIDS urak ini lac ruak di dunya. Dom bruk kham merat dalam pacang caga HIV/AIDS di tỉnh Bến Tre hu rik daong paglaong akaok sahaneng di bhapbini, gam ba gauk caga plaih jit praong ini saong tuk halei jeng sangka tal dom urang oh patoah gaok ruak sớm,  pasiam pren yava dui atah raidiuk./.