Bến Tre: Ông Đại Đức hu hatai dhar phuan

 -Taduan mek raong labaih 100 uranaih gaok klak, uranaih metui saong pataom tame dom bruk ngak pahla, xã hội. Nan lac baok hatai praong glaong di Đại đức Thích Lệ Hiếu, trụ trì baha Vạn Đức, xã Tam Hiệp, huyện Bình Đại, tỉnh Bến Tre- sa urang Đại đức ranaih umo, hu hatai dhar phuan kak kajap saong bruk đời, bruk agama biak njauk pok meyaom. Nhật Trường, urang vak di rayo sap ndom Viet Nam daok di bhum tanren kraong Cuu Long hu kadha vak ndom ka greih camin ini:

-Palei daok pak xã Giao Hòa, huyện Châu Thành, tỉnh Bến Tre, dahlau thiah hu tu bac di Tiền Giang saong ban raya Hồ Chí Minh.  Thun 2010,  Đại đức Thích Lệ Hiếu mai tu pak baha Vạn Đức. Baok baha hu dak apdang di libik cù lao kathaot taik tahak. Yau nan min, rilo urang kathaot di ini kayua sang kan kandah yau nan ye hu ba dom uranaih barau ndih tapui tabiak payua anak pambang baha.

-Anit dom anek kamal barau ndih tapui gaok klak, Đại đức Thích Lệ Hiếu oh huac sap ndom tame ndom tabiak, pok dom anek kamal ini tame baha raong ba. Mboh bruk ngak di baha hu makna, rilo urang hảo tâm jaik atah hu rik pren yava, rik jien padai daong baha raong dom uranaih oh patoah jamo ini. Meng nan dom uranaih gaok klak, uranaih metui, anek di dom sang kathaot hu payua ka baha dak harei dak rilo. Tal tukvak ini, baok sang Đức Quang daok raong ba labaih 100 uranaih; dalam nan hu adei dom bilan tal labaih 12 thun tagok. Rilo adei hu nao bac tal pakat bac 2. Raong uranaih abih di nyu nan lac anek kamal biak glaih glan, yau nan min urang tu sĩ ini gam saong dom phật tử  di baha hu yam tagok kan kandah, glaih glan gam ngak sa urang ame, urang amaik piah raong ba dom adei. Piah hu jien raong ba dom adei, đại đức nao jak ba dom urang hảo tâm rik daong jien pasang iek ka dom adei.

-Cambaih laih ye amuk Phạm Thị Thơ, daok di ấp 2 xã Tam Hiệp, hu halan hatian brei 1 ha beir darang piah baha hu jien mek tame raong ba dom adei. Barau ini tuk sruh jit patuh tabiak di baok sang Đức Quang,  urang tu sĩ ini saong dom urang dalam baha Vạn Đức njauk medhieh luac melam pasang iek dom adei saong ba dom adei ruak trak nao sang iek ruak piah iek ruak ye hatai di urang ame, urang amaik ka dom urang anek sa hatian di drei. Đại đức Thích Lệ Hiếu lac : Urang tu sĩ njauk kak kajap saong raidiuk, haong agama tui tôn chỉ di đức Phật lac raong ba anek menuac lac cúng dường chư  Phật  yau nan ye lac tu sĩ drei sahaneng njauk kham merat habal ngak bruk phụng sự chúng sanh, daong dom urang kan kandah. Nan lac bruk ngak di urang  tu sĩ di tukvak urak ini.

 -Lingiu bruk khik bruk ngak di baok sang Đức Quang, tukvak tapa, Đại đức Thích Lệ Hiếu daok npataom tame dom bruk pahla di puk palei ye: dak padang sang anit ranam, daong urang katahot, alin pandap ka uranaih sang kathaot, dak padang danao padang ia taba ka urang kathaot…hadah trah lac bruk jum pataom jien piah daong karja puk palei ngak rilo canah jalan di palei pala di xã Tam Hiệp,  xã Long Hòa, Vang Quới Đông, huyện Bình Đại.  Dalam thun tapa, đại đức Thích Lệ Hiếu hu jum pataom labaih 6 tỷ đồng ngak bruk xã hội. Karei meng akaok thun tal ini, paok jien ngak bruk ini jeng labaih 4 tỷ đồng. ndom ka hatai di urang tu sĩ ini, ông Nguyễn Hữu Thọ, akaok uy mban bhapnini xã Tam Hiệp lac: Thầy thích Lệ Hiếu ka gah đạo đức lac biak siam, hu hatai dhar phuan. Dom uranaih bo amaik ame klak bo hu tangin pahla lac gah puk palei tuk halei jeng daong bruk ngak di Hiếu. Di puk palei, tuk hu caong khin dak apdang sang anit ranam, alin pandap harei dunya uranaih, pandap Trung thu  … thầy daong, ngak siam bruk pahla.

 -meng bruk kham merat di drei dalam bruk pahla xã hội, tukvak tapa, đại đức Thích Lệ Hiếu hadah mbaok hu dom gah, dom pakat alin rilo harak meyaom. Min, tui tu sĩ Lệ Hiếu bruk bui sambai saong haniem phuan praong abih lac hu daong dom sang kan kandah, raong ba dom uranaih gaok klak piah hadei ini jeng urang siam ka taneh ia./.

Thúy Linh