Tukvak tapa, drei hadang tasik ba mai kein laba rilo jang phun la-u, phun padai nan ye urang ngak nong di dom huyện Bình Đại, Ba Tri, Thạnh Phú, Giồng Trôm, tỉnh Bến Tre ba gauk raok danao raong hadang ini pak dalam bhum ia taba. Bruk raong hadang tasik lingiu bhum quy hoạch, ba ia mbak tame hamu, ngak kan kandah tal bruk ngak nong saong bruk kein laba di dự án ngọt hóa dalam tỉnh.Nhật Trường, urang vak di rayo sap ndom VN daok di bhum taneran kraong CL hu kadha vak brei thau ka bruk ini di huyện Bình Đại, tỉnh Bến Tre- labik hu taneh raong hadang tasik lingiu bhum quy hoạch ralo abih di tỉnh Bến Tre.

 Tal tukvak ini, huyện Bình Đại hu 1.500 sang raong hadang lingiu bhum quy hoạch, daok dalam bhum ia taba ngan saong taneh praong jaik 540 ha. Bruk tak klak bein la-u, raok danao angaok mblang hamu piah raong hadang sú, hadang thẻ takai mbong rah tabiak ralo di dom xã Thạnh Trị, Phú Long, Phú Vang, Thới Lai, Vang Quới Đông… Ong Nguyễn Văn Bịt, daok di xã Thới Lai, huyện Bình Đại brei thau, sang ong raok danao angaok mblang hamu piah raong hadang hu labaih 10 thun ini mai. Dom thun camereip raong siam, pablei hu yaom, hu laba ralo. Thun ini, hadang laik yaom, sang ong khat trak: Danao ini hu labaih 10 thun paje. Raong hadang siam meng samar meda. Thun bloh raong oh hu, thun dahlau di nan raong hu. Danao ini meyah raong siam jeng duah hu dom ratuh triệu, daok raong oh hu ye khat jaik sa ratuh trieu. Thun ini yaom lap, sa kg hadang dom pluh ribau min, yaom ini raong kan hu laba.

Hadang tasik yaom lac kein laba ralo min urang raong jeng brei hu phun jien ralo, thau ilamu kỹ thuật glang iek. Dalam tuk nan, hadang ini mbuan hu jit ruak. Anak meta mboh lac, hu ralo sang ginup meda tagok meng drei hadang, saong jeng hu sang tavak sraiy meng nyu.  Lingiu di nan, raong hadang lingiu bhum quy hoạch, raong dalam bhum ia taba nyu ngak brei njom ia mbak, ngak kan kandah tal ia taba piah pandar, piah pala drak di bhap bini. Bruk njauk biai nan lac, ia mbak meng danao raong hadang daok  mbuan njom tame kraong Ba Lai- bhum ia taba ka yaok pluh ribau sang bhap bini daok di dom huyện taphia tasik di tỉnh Bến Tre

Di xã Thạnh Trị, huyện Bình Đại tal urk ini, hu 145 ha danao hadang tasik di jaik 300 sang urang raong dalam bhum ia taba. Piah raong hadang, urang daok loa kuac bingun mek ia mbak, bơm tame danao raong di độ mbak  7-8 phần ngàn. Ia ini nyu njom tame ribaong atau mblang hamu jaik taphia ye khat lihik oh thau yau habar.

Yaom lac karja, kapul nyaom kham merat pathau khan, jak ba, min bruk khoan giếng, kuac bingun raong hadang tasik lingiu bhum quy hoạch jeng daok rah tabiak ralo. Amuk  Huỳnh Thị Linh, Phó bí thư Đảng ủy xã Thạnh Trị mboh lac:Dahlau daih, UB bhap bini xã hu padang 2 tổ nao xử lý jeng pacang cakak hu dom giếng khoan di bhap bini. Hadei di nan, bhap bini pandar veik min urang ngak biak  kandang, kan thau hu. Karja palei hu pathau khan jak ba  min oh ka langyah hu bruk ini.  Urak ini, xã daok ramik pakhang veik 2 tổ ini piah nao tui iek dom sang raok bingun bahrau. Xã hu pok panuac tagok tỉnh likau ba tabiak panuac lac raong hadang hu halei oh piah raong veik atau salih tapa bruk karei.

Ngak tui  tacei pato di UB bhap bini tỉnh Bến Tre, tukvak tapa, dom gah chức năng huyện Bình Đại hu nao pasang iek saong brei lam veik dom baoh giếng khoan ia mbak, tacei dom sang raong hadang lingiu bhum quy hoạch, dalam bhum ia taba mbaoh tangin sanya. Min dom sang jeng daok loa pasiam veik atau raok bingun bahrau di labik joa kandauk, atau raok bingun dalam sang piah mek ia raong hadang. Ong Võ Trần Quốc Toàn, Phó jabat ngak nong saong patagok palei pala huyện Bình Đại brei thau, raong hadang dalam bhum ia taba oh khang kajap, atau njauk jit ruak. Yau ye bilan hadang tasik thun ini, yaom biar, urang raong khat lihik. Kayua yau nan ye, gah huyện daok hu jalan ngak khang piah langyah catang dom sang daok raok danao, khoan giếng raong hadang suan adat. 

   Anak meta mboh lac bruk raok danao mek ia mbak raong hadang dalam bhum ia taba yau di tỉnh Bến Tre kein laba saong khang kajap oh glaong. Suai livik, bruk raong yau ini daok ngak jhak tal alam môi trường, tal bruk pala drak, njom nerak ia taba, meda ngak glut haluk, njom mbak bhum ia taba. Kayua yau nan ye, oh kayua kein laba di anak meta di hadom urang bhap bini, dom pakat karja, dom gah chức năng di tỉnh Bến Tre  njauk hu jalan ngak khang jang, langyah catang jang piah pacang cakak bruk ini./.