Tukvak jaik di ini, ralo urang Cam Islam di bal raya Hồ Chí Minh hu caik hatai sangka ralo tal bruk takik caih menek, tui jalan lac yaok baoh sang tok hu sa tal dua urang anek piah iek glang raong ba anek bhik hu siam mekre, mbang bac tal labik tal dua. Tapa nan nyu ngak brei patrun bruk patagok dân số di bal raya Hồ Chí Minh.

Phường 12, quận 10 bal raya Hồ Chí Minh hu 200 urang Cam Islam. Piah ngak siam bruk kế hoạch hóa gia đình, dom thun tapa, gam haong bruk sangka di phường, di quận, Ban Quản trị sang megik Hayatul Islam phường 12 kham merat biak prong dalam bruk pathau khan, pablak tame dom danak dak bruk ngak piah paglaong akaok saneng ka mikva dalam bruk lac baoh sang sit, takik anek piah hu rai diuk trei sil, haniem phol saong hu mikva njauk hatai pachreih tui. Ralo diuk pasang daok ranaih umo halar hatian ngak tui bruk baoh sang sit  hu dua urang anek.  

Meng peih ngak samu gauk sarak ka bruk dân số -kế hoạch hóa gia đình tal yaok baoh sang, nan ye yaok diuk pasang urang Cam di labik ini bhian hu 2 urang anek min, bruk patrun menek daok tagok saong khang kajap. Bruk ndih tapui meng anek ka 3 tagok oh daok mboh tra. Hatai saneng "ralo anek ralo drap ar" oh daok mboh dalam bhap bani urang Cam labik ini. Kadha ngak hu praong dalam bruk dân số kế hoạch hóa gia đình di phường 12 nan lac: 200 urang mboh tangin sanya ngak tui jalan baoh sang sit hu dua urang anek, piah daong patruh eik patrun kathaot, grap tanat kinh tế baoh sang.  

Jeng yau bhap bani Cam di phường 12, quận 10, labaih 25 baoh sang urang Cam di phường 1 saong phường 11 quận 5 Bal raya Hồ Chí Minh jeng mboh tangin sanya tui bruk baoh sang takik anek, khang kadang; yam tal grap tanat bruk dân số di tanut laghaih piah hu sa rai diuk trei sil, haniem phol, pasiam veik bruk caih menek; paglaong chất lượng dân số. 

Urang Cam di Bal raya Hồ Chí Minh urak ini hu jaik 7500 urang, daok pataom gauk di 10 quận. Dalam nan, 70% baoh sang daoktui bruk baoh sang 2 urang anek. Ilamu dalam bruk kế hoạch hóa gia đình di phường 12 quận 10 lac bruk pambuak gauk siam di Ban Quản trị sang megik urang Cam haong phường; taphia di nan, pablak bruk dân số haong danak dak patagok bruk ngak mbang kinh tế - xã hội karei karei yau mesre phun jien; sarak patruh eik, patrun kathaot, pasiam sang taik tahak, sarak daong dom baoh sang kan kandah hu Cục dân số sangka jang hu pambak khang tal bruk paglaong chất lượng dân số. Mai meng nan, ralo baoh sang hu tabiak truh kan kathaot, raong anek mbang bac tal labik tal dhua./.