Ndua salao lisei mbang amuk akei 

Akaok UBND tỉnh Ninh Thuận Lưu Xuân Vĩnh hu jao ka Sở Nội vụ ngak bruk haong Hội đồng Po gru gah Bàni, Mban lambaok bhap bani Islam, Mban adat cambat di dom sang megik Bàni, Hakem dom sang meghik Islam. Tui nan, pathau khan, jak ba dom halau janeng saong mikva tui agama peih ngak catang Chỉ thị ka 15 harei 17/3/2020 saong Chỉ thị ka 16 harei 31/3/2020 di Thủ tướng Raja-ei gam haong dom harak tacei pato di UB bhap bani tỉnh ka bruk pacang caga jit ruak COVID-19 dalam bruk peih ngak Ramưvan thun 2020.

UB bhap bani tỉnh pandar dom halau janeng saong mikva tui agama padeih abih dom bruk ngak adat cambat di dom sang meghik dalam tỉnh; padeih bruk nao gon mek hareik; taphia di nan brei padeih bruk tame eik dalam sang meghik. Bruk mbang amuk akei di sang jeng oh brei pataom rilo manuac, ngak siam jalan ngak sang halei daok pak sang nan.

Ong Nguyễn Lài, Akaok Hội đồng Po gru gah Bàni brei thau, Ramưvan lac Roya meng kan mai, prong abih dalam thun di bhap bani Cam Bani daok di 6 xã dalam 4 huyện di tỉnh Ninh Thuận. Tui adat cambat meng kan, dahlau di harei tame eik, taong abih mikva njauk ngak adat nao gol mek hareik, ngak adat mbang amuk akei di sang pambuak haong dom bruk ngak ilamo, daoh tamia salam uan blaoh hadei di nan dom ong car, ong imum tame eik dalam sang megik luac sa bilan.

Min dalam tuk jit COVID-19 daok rah tabiak srau dhau, ngak tui tacei pato di urang pal akaok UB bhap bani tỉnh, Hội đồng Pro gru jeng hu pathau khan tal taong abih bhap bani tui agama thau ka dom adat di Raja-ei, di tỉnh piah pacang caga jit ruak. Hội đồng Po gru brei padeih bruk nao gol mek hareik, oh tame eik dalam sang meghik sa bilan; taphia di nan pachreih bhap bani oh pataom gauk rilo manuac, oh pataom gauk mbang menyum, plaih njaom mbak jit ruak.

Y mưm Trương Thanh Huấn, lambaok mban khik iek sang meghik Văn Lâm 2, xã Phước Nam, huyện Thuận Nam brei thau, anak bruk jit ruak COVID-19 daok rah tabiak srau kadhau saong ngak tui công văn ka 1198 harei 9/4/2020 di  UB bhap bani tỉnh ka bruk uan raok Ramưvan di bhap bani, dom ong car ong imum  di sang meghik jeng hu ginum biai saong njauk gauk brei padeih dom bruk ngak adat di agama piah uan raok Ramưvan tui jalan tacei pato di UB bhap bani tỉnh.

Y mưm Trương Thanh Huấn daok brei thau yau ini: “Khaol dahlak pathau khan saong mboh mikva pachreih tui bruk mbang amuk akei ka nyu siam lagaih, oh pataom rilo manuac, sang thei daok sang nan, palei thei daok palei nan. Dom po gru jeng oh tame eik dalam sang meghik, bo njauk eik pak sang piah plaih pataom rilo manuac, pacang caga hu bruk njaom mbak jit ruak COVID-19".   

Bhap bani Cam Isalam di palei Văn Lâm 3 (xã Phước Nam, huyện Thuận Nam) jeng brei mboh hatai yau ini: Raya mai dalam tuk jit ruak COVID-19 rah tabiak srau dhau. Mboh hu dom kanjah jhak di jit ruak, mikva thei jeng pachreih tui, ngak njauk tui jalan tacei pato di Trung ương, di tỉnh ka bruk pacang caga jit meng dom bruk ngak sit di abih, kayua ini lac tukvak ameh piah ba gauk jhul kadhul likuk jit ruak.

Gam bui sambai haong bhap bani tuk uan raok Ramưvan, urang pal akaok UBND tỉnh Ninh Thuận saong karja dom puk palei hu urang Cam Bani, hu mai rivang dom halau janeng, dom urang hadah krah ngan haong jalan ngak lagaih, khik hu bruk pacang caga jit ka nyu siam lagaih saong peih ngak siam sarak agama dalam tukvak uan raok Ramưvan./.

Urang lang: Jasi-22/4