Dahlau diah jalan nao tapa palei Tắc Hố, xã Ngọc Biên, huyện Trà Cú lac jalan haluk sit gluh bok, nan ye bruk nao mai, pajeng ba pandap panda gaok biak rilo kan kandah… hu jalan praong laneng lanoi lac bruk caong khin meng lavik mai di bhap bani labik ini. Bahrau ini tuk Karja brei peih prong jalan ini jeng jalan menyek, yaom lac lih tame taneh di sang drei min Sơn Sa Lene oh saneng kuhria hagait saong halar hatian alin brei 1.000 mét vuông taneh bein hu phun daok tabiak baoh, yaom labaih 100 triệu đồng. “Bilan hajan nao mai biak kan kandah. Kadua tra bruk pajeng ba padai brah, njam patam jeng gaok kan kandah, mboh yau nan dahlak alin brei taneh peih prong jalan piah ka mikva dalam palei nao mai mbuan laghaih saong anek saih nao bac jeng hu mbuan lagaih”.

Ngọc Biên lac xã bhum atah bayah di huyện Trà Cú, hu urang bangsa Khmer meblah jaik 81%. Bhap bani labik ini rilo meng ngak nong, rai diuk daok gaok ralo kan kandah, dalam nan baoh sang kathaot daok labaih 25%... Min kayua ngak siam bruk pathau khan, jak ba nan ye bhap bani Ngọc Biên biak pachreih tui saong halar hatain alin brei taneh pala njam patam, phun mbang baoh piah ngak jalan duan nao mai.

Tui jalan ngak lac “bhap bini thau, bhap bini ginum biai, bhap bini ngak, bhap bini pasang iek” nan ye bhap bani biak pachreih tui saong abih hatai rik daong. Njauk ndom tal di abih nan lac dalam bruk padang ngak jalan ribaong ba aia saong jalan mbak nao mai dalam palei hu 519 baoh sang alin brei labaih 145.000 m2 taneh yaom jaik 6 tỷ meteh. Langiu di nan daok rik daong labaih 500 triệu đồng gam haong Karja padang ngak 8 baoh tatua. Ong Kim Rây – lac baoh sang ba akaok nao dahlau dalam bruk alin brei taneh ngak jalan ndom lac: Hu bruk rik pren haong gauk nan ye oh kuhria lac jalan atah atau katut, jalan nhựa atau bê tông jeng ba gauk ngak abih, nao mai mbuan lagaih. Dahlau diah oh hu jalan pagam haong tỉnh lộ nan ye nao mai biak kan kandah, urak ini jalan duan hu ngak blaoh nan ye bruk pajeng ba njam patam, pandap panda padai brah biak mbuan lagaih.

Dreih yau xã Ngọc Biên, di xã Hiếu Tử, huyện Tiểu Cần, lac xã bhum atah bayah, hu 67 %  bhap bani  Khmer. Hadei di 4 thun peih bruk padang ngak palei pala bahrau, mbaok meta puk palei hu salih bahrau, abih di nyu nan lac jalan mbak nao mai. Hu yau nan, meng hu bruk rik daong pren yava, drap ar di bhap bani, abih di nyu nan lac taneh riya. Pagap yau sang ong Sơn On, palei Ô Trom, yaom lac sang oh kaya meda hagait min ong halar hatian alin brei labaih 300m2 taneh piah palei hu taneh ngak jalan. Kayua ong Sơn On mboh lac, padang ngak palei pala bahrau nan kayua bhap bani dang tabiak ngak, dom bruk hu padang ngak oh njauk lac caik brei ka urang halei bo nyu ba mai kein laba ka taong abih bhap bini saong lac jalan ngak piah mbaok meta bhum palei hu salih bahrau, paglaong rai diuk, dalam nan hu gam sang ong. Hu bruk jak ba di karja padang ngak jalan nao mai ka palei Ô Trom dahlak biak uan tabuan saong halar hatian alin brei taneh piah karja ngak jalan, lagaih ka bhap bani cakrok patagok kinh tế, nao mai mbuan lagaih. Dalam nan hu gam sang dahlak.

 Meng bruk kham merat di pakat ủy, karja saong bruk rik daong pren yava di bhap bani, xã kathaot Hiếu Tử samar ngak blaoh tiêu chí ka jalan mbak nao mai, sa dalam dom tiêu chí kan ngak dalam bruk padang ngak palei pala bahrau. Oh padeih di bruk padang ngak jalan mbak nao mai, meng labik thau patagok  dân chủ, mek pren di bhap bani piah ngak kein laba ka bhap bani bo ralo tiêu chí ka padang ngak palei pala bahrau jeng peih ngak hu. Jien mek tame kuhria tui akaok manuac di xã hu 29 triệu đồng sa thun, baoh sang kathaot daok jaik 8%, trun 10% dut haong thun 2011. Ong Lâm Văn Hiếu, Akaok UB bhap bnai xã Hiếu Tử, huyện Tiểu Cần brei thau: “Hadei di labaih 3 thun peih bruk padang ngak palei pala bahrau, bhap bani pak ini thei jeng pachreih tui, halar hatian alin brei taneh, phun kayau, njam patam, sang danaok piah padang ngak jalan mbak nao mai dalam palei. Urak ini daok dua jalan tra dalam 2 palei Ô Trom, Ô Trao tal urak ini jeng langyah hu mặt bằng,k Đảng ủy, Ủy ban jeng hu pok panuac tagok huyện, tỉnh piah parabha phun jienngak dua jalan ini”.

Meng hu bruk pachreih tui, bruk rik daong pren yava drap ar di bhap bani saong bruk buh jien tame meng Trung ương, yaom lac puk palei kan kathaot di abih dalam bhum min tal urak ini tỉnh Trà Vinh hu 13/85 xã  mek hu 19/19 tiêu chí padang ngak palei pala bahrau. Saong tal puac thun Trà Vinh hu 7 xã tra ngak hu dom tiêu chí padang ngak palei pala bahrau; daok 65 xã daok veik mek hu meng 10 tiêu chí tagok, dalam nan hu taong abih xã ngak hu tiêu chí jalan mbak nao mai dalam palei./.