Sruh radaih pathau khan lưu động 

Dom harei tapa, duk ngak bruk di Mban Tacei pato pacang caga jit Covid – 19 bal sit Lương Sơn tuk melam jeng hadah menyek gom. Yaok urang sa bruk, meng vak tin, vak kadha pacang caga jit ka harei paguh tal bruk pasang iek veik angan baoh sang gaok kan knadah kayua jit… taong abih jeng ngak siam bruk cuk siuk pabang mbaok (khẩu trang), daok atah di gauk tuk ngak bruk.

Kapul hu 5 urang, yaok harei salih gauk nao 3 sruh radaih patuh tal yaok baoh sang ba harak tacei pato mikva sanya ngak siam bruk oh pablei salih, oh pataom rilo manuac mbiah tal tuk hu pathau khan bahrau. Sa-ai Trương Thị Anh Thư – Bí thư đoàn bal sit Lương Sơn brei thau: “page ini drei haong sa urang tra nao pathau khan ka dom baoh sang pablei salih di khu phố Bắc Sơn, Lương Tây saong pahadar meyah hu mboh sang halei oh ka ngak tui”. Sruh radaih patuh di sa-ai Anh Thư bahrau nao atah, ye sa sruh radaih ô tô mai ataok anak pabah mbang UB bhap bani xã. Dua urang jaka bal sit dang cang pak nan samar tauk băng rôn saong pagam loa pathau khan tagok radaih. Sa urang jakar khan brei thau, ini lac sruh radaih di urang dalam palei, hadei di tuk mehit bal sit nao jak ba, ye urang brei nyim radaih saong peih radaih.

Hu 5 sruh radaih halan tian rabha gauk yaok radaih sa harei dua mbang nao pathau khan lưu động meng harei 1/4 tal ini. Ong Mai Sơn – Phaok MBan tacei pato pacang caga jit Covid -19 bal sit Lương Sơn iek gah pathau khan daok brei thau lac: “Dalam bal sit Lương Sơn hu ngak 57 cụm loa ngan haong 114 loa pathau khan, yau nan min jeng daok hu dom jalan oh mehit hu sap loa ye jalan ba khaw tin tal bhap bani nan lac loa di động. Meng bruk bhap bani pachreih tui halar hatian brei radaih nduac saoh oh mek jien, yaok harei radaih hu nao grauk dom khu phố khan brei thau ka jit ruak, bruk ngak di karja sangka iek glang ka bhap bani thau, meng nan urang paglaong akaok saneng ka bruk pacang caga jit, ngak siam jalan ba di Raja-ei”.

Tuk raja-ei hu Sarak 42 ka pok jien daong 62.000 tỷ đồng brei ka bhap bani gaok kan kandah tapak kayua jit Covid-19 saong hadei di tuk taduan hu dom harak gar di tỉnh, di huyện, bal sit Lương Sơn hu padang tagok kapul peih ngak Sarak 42 saong parabha bruk ngak ka yaok urang yaok bruk ngak dalam labik drei mong iek, akaok plaei, khu phố… pambuak gauk peih ngak, pasang iek.

Ong Ngô Văn Minh – akaok UB bhap bani bal sit Lương Sơn brei thau: “UB bhap bani bal sit hu ngak salah blaoh bruk pasang iek, duah thau padang angan 4 urang buh rilo pren yava ka cách mạng, baoh sang kathaot, jaik kathaot, urang hu mbang jien bảo trợ xã hội payua ka Jabat Lao động – TBXH piah pasang iek veik saong samar drah ba-yar jien daong ka mikva dahlau di harei 25/4 tui bruk ba tabiak di UBND tỉnh. Daok veik, dom urang karei daok hu pasang iek”.

Jeng tui ong Minh, manuac urang bo puk palei biak sangka tal nan lac dom urang ngak bruk tự do. Kayua dom urang ngak ini bruk ngak oh tani tanat, nan ye bruk duah thau jeng biak kan. Yaom lac yau nan, min ini lac dom urang gaok kan kandah rilo di abih kayua jit Covid-19 nan ye njauk peih ngak ka nyu tani tanat, njauk manuc njauk urang.

Puk palei hu ba tabiak mẫu piah ka manuac sia kê khai, hadei di nan kapul pasang iek hu akaok palei, khu phố duah thau ka yaok baoh sang saong payua mai ka UB bhap bani bal sit mong iek veik ka nyu tani tanat meng payua tagok jabat pakat angaok. Daok dom urang pablei vé số lẻ, puk palei hu pambuak haong Công ty Xổ số kiến thiết tỉnh daong brei 63 urang, yaok urang hu daong 750.000 đồng. Langiu di nan, Ủy ban MT negar Việt Nam bal sit saong dom kapul nyaom hu taduan mek saong jao brei 260 pok pandap yaom 52 triệu đồng, 5 tấn brah, 3.200 siuk pabang mbaok (khẩu trang), 300 klaih sabon… ba tal tangin dom baoh sang kathaot dalam bal sit.

Tapa 3 adit peih bruk brei daok atah di gauk tui tacei pato di Thủ tướng Raja-ei, UB bhap bani bal sit Lương Sơn hu tabiak 12 harak peih ngak dom jalan  samar drah pacang caga Covid - 19; padang 8 kapul pasang iek bruk brei daok karei piah pasang iek y tế di 8 puk palei khu phố; brei 700 blah ba-ar tacei pato pacang caga jit ruak; jak ba 67 labik pablei salih sanya padeih ngak… Meng bruk njauk hatai pachreih tui tapa dom bruk ngak hu mboh di anak meta ini bo bruk pacang caga jit di bal sit Lương Sơn hu huyện Bắc Bình, tỉnh Bình Thuận taong yaom glaong./.

Urang lang: Jasi-29/4