Thaik binguk Wa Ho mai rivang palei mbang ka 2 thun 1961

Dalam dom harei bilan 5 ini, di Pasak Ilamu – Thể thao huyện Hàm Thuận Bắc, tỉnh Bình Thuận mboh chreih chrai jang meng dom mbang pataom mbaok, ginum biai di dom kapul nyaom pahadar 130 thun harei menek CT Hồ Chí Minh. 

Ông Hoàng Sơn Nể - bangsa K’ho, urang dahlau daih ngak bol lin di xã Đông Giang, huyện Hàm Thuận Bắc, tỉnh Bình Thuận brei thau, hadei di tuk Rajaei brei adat pacadu bruk pa-atah di gauk dalam pacang caga jit CoVid-19, adei sa-ai meng hu pataom mbaok ginup yau ini. Uan tabuan hu taom gaok gauk veik, dom dalikan ka raidiuk hu dom urang dahlau daih ngak bol lin khan brei gauk thau, meng bruk patak pataom, klah rabha ia pandar dalam bilan pandiak bhang daok rah tabiak khang yau urak ini, tal bruk daong brei gauk dom ký brah dalam tuk cang yuak, atau bruk pok panuac tagok ka UB bhap bini xã buh jien daong urang gaok kan kandah kayua jit Covid-19 tui Sarak 42 di Rajaei… Ong Nể daok brei thau lac, Đông Giang dahlau daih lac bhum taneh pasak di bruk kháng chiến Khu 6, dalam  căn cứ Nam Sơn di tỉnh Bình Thuận. Meng dom mbang taong jayah praong di bhum taneh Nam Sơn, bhap bini bangsa K’ho di Đông Giang miat miat mboh hadah mbaok meta ka bhum taneh anh hùng ini. Dom jayah nan hu Đảng saong Karja pok meyaom brei angan lac Anh hùng tapon nyom bol pan phao kraong ka xã Đông Giang… Meng hu Đảng, hu Wa Hồ bo Đông Giang meng hu raidiuk trei sir yau harei ini. Prein yava di Wa luac rai urang K’ho daok pak ini oh tuk halei var hu. Jalan sahneng saong jalan diukrai hadah krah siam mekre di Wa Hồ hu prein pambak praong saong jeng bruk ngak yaok harei di yaok urang jakar, urang đảng: Kayua jalan diukrai siam mekre di Hồ Chí Minh biak praong, pato pakai ka drei hu thau ka sarak di Đảng saong hukum di Karja. Bhap bini bangsa drei brei khik hu ilamu di bangsa drei, oh pang tui kol kanjah jhak nyu pacuh pajarak ngak bruk suan. Bhap bini bangsa urang hu ilamu dalam 2 mbang mesruh taong Prang saong Mỹ, khik hu ilamu nan, lac bruk jum pataom gauk, daong gauk ngak mbang.

Daok ngan saong ong Thông Điệu, bangsa Cam mai meng palei Ma Lâm 3, ban sit Ma Lâm, huyện Hàm Thuận Bắc jeng biak chreih chrai tuk ndom tal Wa Hồ. Ong Điệu brei thau, tu daok diuk di dunya, Wa Hồ tuk halei jeng sangka tal bruk pachreih bac – pachreih megru. Nan ye tuk hu brei bruk ngak gah pacheih bac, ong ba abih prein yava di drei tabiak piah ngak siam bruk.  Ngan saong bruk pachreih bac ye dahlak mboh bruk xã hội hóa pato pakai dak harei dak patagok dalam bhap bini bangsa. Dahlak jeng hu padang Dhar Kapul Pachreih bac pajaih Thông. Caong khin di dahlak lac anek saih, sinh viên bangsa dak harei dak rilo jang. Kayua bruk pachreih megru yau panuac pato di Wa Hồ lac “pluh thun pala phun, ratuh thun pala menuac” piah dak padang sa xã hội bac megru.

Ong Khe Châu Xe – sa halau janeng di palei Cam Lâm Giang, xã Hàm Trí, huyện Hàm Thuận Bắc chreih chrai brei thau: Yaom lac oh ka hu taom gaok Wa Hồ, min rup binguk Wa biak jaik, jaik yau gauk gar ralow darah di drei. Tui ong Xe, agama halei jeng tacei ba menuac sia diuk rai siam ka dunya, mekre ka agama. Kayua yau nan ye bo dom agama kol drei oh neh rabha guak, bo brei thau jum pataom gauk veik. Tui Wa Hồ, jum pataom gauk ngak jeng prein khang saong lac ba tal yaok jak jeng: “Jum pataom, jum pataom, praong jum pataom; Jayah, jayah, praong jayah”.

Bruk chreih chrai di Pasak Ilamu - Thể thao huyện Hàm Thuận Bắc, tỉnh Bình Thuận dak chreih chrai jang tuk dom urang đoàn dam dara ba gauk daoh kadha daoh “Yau hu Wa Hồ dalam harei sambai jayah”. Hadar tal Wa Hồ, bhap bini dom bangsa takik pak ini daok nao tui jalan hadah krah siam mekre di Wa./. 

Urang lang: Musa-17/5