Huyện Vĩnh Hưng daok jaik tapen negar Campuchia, atah di pasak tỉnh Long An 90km saong atah di ban raya HCM jaik 150km. Atah bayah, jalan nao mai oh ka laghaih, bruk ngak mbang pablei salih oh ka cak rok patagok, rai diuk di bhap bani daok rilo kan kandah… nan lac dom hagait bo rilo menuac daok di labik karei thau ka Vĩnh Hưng. Kayua yau nan ye, tuk jit Covid-19 tamuh khang mbang ini, rilo urang daok di dom labik karei dalam tỉnh Long An hu ba mai sang iek ruak dã chiến, mai labik brei daok karei pataom sa labik di huyện Vĩnh Hưng thei jeng mboh huac, mboh suh sah.

Ong Nguyễn Ngọc Lập brei thau, labik brei daok karei pataom sa labik Vĩnh Bình hu padang tagok meng bilan 8/2020 saong ong ngak bruk pak ini meng tuk nan tal urak ini. Tuk akaok mereip labik ini  piah ngak labik brei daok karei ka urang mai meng negar langiu. Daok meng mbang tamuh jit ka 4 ini, labik ini hu peih prong taduan raok bhap bani dalam tỉnh mai daok karei tui bruk parabha di Pasak Pasang iek jit ruak tỉnh Long An. Urang brei daok karei dak rilo ye bruk daong di bhap bani xã Vĩnh Bình, mikva dalam huyện Vĩnh Hưng brei ka labik brei daok karei dak rilo. Mikva oh sahneng lac urang nan mai meng halei, bo thei jeng saneng lac: Urang kayua njauk ruak nan ye meng nao atah di sang mai ini taong ruak, nan ye thei jeng mboh anit. Ong Lập drut droi lac: “Dahlak khik iek pak ini, duh ka labik brei daok karei ini hu sa thun paje. Dahlak oh ka mboh tuk halei bruk anit ranam, gul pataom gauk di urang lin haong bhap bani yau urak ini. Hu biak rilo urang ngak pahla joa kandang daong ka taong abih dom urang dalam labik brei daok karei ini”.

Oh lac gam haong karja daong bruk mbang huak yaok harai ka urang brei daok karei, urang njaom Covid-19 saong urang jakar daok ngak bruk di sang iek ruak dã chiến, labik brei daok karei, bo bhap bani dalam huyện daok hu daong lisei huak yaok harei ka dom urang kan kandah. Nan lac dom urang kathaot ngak pah duah jien diuk tapa harei min urak ini dom labik ngak kareik pabah mbang, lac dom menuac meng labik karei mai pak ini ngak mbang min gar veik kayua jit ruak. Baoh sang ong Lê Vũ Hạnh lac sa dalam biak rilo urang yau nan yaok harei daok taduan mek lisei huak meng dom nyaom ngak pahla di huyện Vĩnh Hưng: “Dahlak biak thau dhar phon dom adei sa-ai, cei anai hu tahanek lisei blaoh ba yaok hộp lisei mai ka khaol dahlak di labik sang trọ ini”.

Urang Vĩnh Hưng daong gauk saong daong menuac meng labik karei mai meng hagait, tuk bo dom pandap panda pak ini di tukvak ini lac eng drei ngak, eng drei mbang, pandap panda pajeng ba meng bal raya HCM mai jeng kan kandah? Panuac javap jalơi lac, daong meng hagait bo dom baoh sang di Vĩnh Hưng daok hu. Sang brei plang, brei laya, kruac aia piah rak aia. Sang brei brah piah tahanek lisei, brei baoh lahong piah ngak aia bai, brei ikan piah kho…Urang hu hasit jien ye pataom veik blei dom janih pandap pandar ka urang ruak, ka urang brei nao daok karei. Taong abih dom sruh radaih ô tô nduac dịch vụ ye urak ini thei jeng halar hatian ngak jeng radaih zero đồng daong pajeng ba. Urang oh hu jien ye buh pren yava tabiak ngak…

  Meng tuk quán cafe di sang kareik pabah mbang kayua pacang caga jit ruak, sa-ai Đặng Thị Hương brei peih chip sa labik tahanek lisei ngak pahla brei ka dom urang kan kandah saong brei ka urang jakar y tế: “Pandap panda rilo meng lac di labik, hu dom sang pak ini pala njam, pala padai ba brei, urang buh pren yava tabiak ngak. Dahlak saong dom sa-ai dalam palei tahanek lisei saong hasit aia menyum ka urang ruak saong y bác sĩ. Caong khin taong abih urang hu pabak pren yava piah jhul kadhul likuk jit ruak”.  

  Bruk daong di bhap bani brei ka urang ruak, urang njauk brei daok karei saong urang jakar daok ngak bruk di Vĩnh Hưng biak samar drah, biak hu yaom saong bak hatai anit ranam. Amuk Phạm Thị Kiều Phương, akaok Ban Tuyên giáo huyện Vĩnh Hưng brei thau, huyện urak ini hu 2 labik brei daok karei hu 149 F1 saong  1 sang iek ruak dã chiến daok taong ruak ka 87 F0 saong daok taduan raok urang ruak yaok harei. Oh kuhria abih hu hadom pandap mbang huak, hadom pok lisei, hadom aia menyum hu mikva rik daong ka bruk pacang caga jit. Bruk ba tangin tame daong di bhap bani nyu pachreih hatai dom urang jakar daok pacang jit saong dom urang njaom ruak hu pabak prein khang piah pacang veik jit ruak: “Yaok urang sa bruk, tui jalan klah rabha meng dom bruk ngak kein, lagaih, rik daong hasit prein yava di drei, sa tangin haong gauk dalam bruk pacang caga jit. Tukvak anak tal, khaol dahlak caong lac daok taduan hu bruk daong di bhap bini, piah jit ruak samar tapa, bhap bani samar mai veik haong rai diuk yau dahlau”.

Jit ruak jeng daok tamuh khang, dom bruk ngak bak hatai anit ranam yau nan di bhap bani Vĩnh Hưng daok ba bui sambai ka dom urang ruak, dom urang gaok kan kandah di jit ruak meng labik atah mai ini dalam tuk kan kandah./.

Urang lang: JASI -20/08/2021