Thun 2014, xã Hàm Trí, huyện Hàm Thuận Bắc, tỉnh Bình Thuận mek hu angan palei pala bahrau. Thau lac patagok sản xuất pambuak haong rami ramik veik bruk ngak nong lac bruk praong, rik daong paglaong jien mek tame ka urang nong, mBan Tacei jalan palei pala bahrau xã Hàm Trí daok pambuak bruk haong dom gah pambuak tal, tacei pato padang ngak hu dom bruk gah pambuak gauk ngak, ba công nghệ tame sản xuất saong mek hu kein laba. Pagap yau bruk pala thanh long hacih, tui chuỗi liên kết; pandar jalan pruh ia patak pataom, kein laba glaong;… meng nan bo klaak hu bruk pala sa janih phun padai, palahik bruk jah glai ngak puh. Urang Cam pak ini thau pandar khoa học kỹ thuật, pala pablak phun pala lagaih piah cakrok patagok kinh tế sang. Meng dom jalan ngak gheih saong jalan nao khang kajap, tal urak ini bhap bini Cam palei Lâm Giang jeng ye bhap bini xã Hàm Trí dak harei dak kham merat jang haong bruk ngak, kham merat khik kajap angan palei pala bahrau. Ong Khê Thanh Mai – Trưởng thôn Lâm Giang, xã Hàm Trí, huyện Hàm Thuận Bắc, tỉnh Bình Thuận brei thau: 

Lingiu di bruk paglaong raidiuk mbang ngui, danak dak palei pala bahrau jeng hu rik daong paglaong raidiuk ilamu ka bhap bini Cam. Rilo bruk ilamu, rilo janih văn nghệ bhap bini hu padang veik yau ye kalup kapul daoh tamia bhap bini Cam ka thiếu niên nhi đồng di xã Phan Hiệp, kalup kapul dit blong, caoh mbanh thiếu niên xã Phan Hòa, huyện Bắc Bình, kapul daoh lagu bhap bini Cam di xã Phú Lạc, huyện Tuy Phong… Taong abih dom bruk ngak di dom kalup kapul ini bhian rah tabiak di Nhà Văn hóa xã, Nhà Sinh hoạt cộng đồng di palei saong pachreih hu rilo menuac hu mbaok tame, daong pabak jang ka raidiuk ilamu di bhap bini, daong jhul patagok bruk padang ngak palei pala bharau pambuak haong du lịch sinh thái, du lịch cộng đồng...

Ong Nguyễn Văn Hiểu – Bí thư Chi bộ palei Bình Thắng, xã Phan Hòa, huyện Bắc Bình, tỉnh Bình Thuận chreih chrai khan lac:  

Dom jalan palei hu tuh bê-tông; dom mblang bein ilamu hu padang tagok palagaih ka mikva Cam kabak me-in, anek naih me-in sambai tuk biar harei mai. Dom darak palei Cam jeng hu ramik ngak pasiam veik saong bak menuac blei, urang pablei,… Tui nan nyu ngak brei ka palei chreih chrai jang saong bak pren diukrai. Min taphia dom siam lagaih, palei pala bahrau bhum Cam jeng daok hu dom tavak tavaiy, abih di nyu nan lac bruk vệ sinh môi trường. Ndom ka bruk ini, ong Đào Văn Lượng - Chủ tịch xã Phan Thanh, huyện Bắc Bình, tỉnh Bình Thuận brei thau: 

Urak ini duk haong bruk di anak meta ye vệ sinh môi trường dalam xã jeng daok hu dom labaih kurang, anak tal xã daok pachreih ba bhap bini khơi thông cống rảnh, pala rilo jang phun hijao piah ngak ka  môi trường dak harei dak hijao, hacih, siam jang)

Bruk klaak hareik tabiak jalan jeng daok hu mboh di dom palei Cam. Hu dom menuac kurang sahneng kuhria daok prah tabiak grauk labik dom kadung ni lon, menuk ada metai, hareik hareim. Dalam tuk nan, radaih pataom mek hareik tok nao pataom mek tui harei saong rilo meng nao pataom mek di dom jalan praong dalam palei. Ini oh lac cuang kandah ngan saong dom xã mek hu bloh angan palei pala bahrau bo nyu daok lac paga pacang dom xã daok mkham merat ngak ka nyu salah dom tiêu chí palei pala bahrau. 

Ông Nguyễn Bá Ky – Bí thư Đảng ủy xã Phú Lạc, huyện Tuy Phong, tỉnh Bình Thuận lac: 

Tỉnh Bình Thuận urak ini hu labaih 35.000 urang Cam, daok pataom gauk di 4 xã harat saong daok prai rai di 9 palei xen ghép. Jien mek tame kuhria rah tapa tui akaok menuac di dom xã bhum Cam urak ini hu labaih 30 triệu đồng sa urang sa thun. Lingiu di bruk pathau khan, jak ba bhap bini sa hatung hatian haong hệ thống chính trị di puk palei ngak siam dom bruk di puk palei, abih di nyu nan lac bruk ba tangin tame “ka puk palei hijao, hacih, mekre”, dom pakat karja, sở ngành jeng njauktacei pato, pambuak pagam, daong ba, palagaih ka bhap bini buh jien tame cakrok patagok bruk ngak mbang, sản xuất. Ong Nguyễn Hữu Phước, Phó Giám đốc Sở ngak nong saong patagok palei pala tỉnh Bình Thuận brei thau: 

Bhum bhap bini bangsa takik ye labik tabiak di padang ngak palei pala bahrau bhian biar. Kayua yau nan ye bo kol dahlak hu ba tabiak dom jalan ngak gam daong gam padang ngak. Dahlau di abih lac pataom tame paglaong raidiuk, patrun baoh sang kathaot, bo khin patrun baoh sang kathaot ye brei pataom tame daong  sản xuất ka bhum bhap bini)

Thau lac padang ngak palei pala bahrau lac sa jalan nao, dom puk palei hu rilo bhap bini Cam daok dalam tỉnh Thuận jeng daok peih ngak rilo bruk, rilo jalan piah khik ramik, piah paglaong chất lượng dom tiêu chí mek hu bloh yaom lac daok rilo kan kandah./.