Pathau mikva saong taong abih gauk! Urak ini, langik tasik oh siam ngak ka tapon athur raong, menuk ada mbuan labuh ruak. Ini lac tuk lagaih ka anek ruak tamuh jeng jit ruak. Piah pacang jit ruak saong khik caga tapon athur raong, menuk ada, dom urang nông Chăm daok di tỉnh Đồng Nai hu peih ngak ralo jalan pacang cakak jit ruak. Ha Ni Pha, urang vak di rayo sap ndom Việt Nam, daok di ban raya Hồ Chí Minh hu kadha vak brei thau ka bruk ini.

 Sang saai Salikho daok di tổ 4, xã Xuân Hưng, huyện Xuân Lộc jeng yau ralo baoh sang karei dalam xã, patagok kinh tế meng raong menuk ada saong ngak padai. Urak ini saai daok raong labaih 100 drei menuk, ada saong cim katrau. Piah khik ka tapon menuk ada praong siam, takik jit ruak, yaok thun sang saai jeng sangka pacang cakak jit ruak, puh ramik hacih sa-at vir taom dar var ro ka tapo athur raong. Langiu bruk ramik var ro hacih sa-at, laneng lahei, sang saai bhian pruh jru pametai anek ruak saong klauk vắc xin pacang cakak jit ruak ka tapon athur raong tui tacei pato di urang jakar thú y. Yaok thun, meng bruk raong glang, sang saai laba hu 50 triệu đồng. Saai Salikho brei thau:  

“Kol dahlak bhian klauk jru pacang cakak ruak ka menuk, limo, pabe saong iek glang biak tani tanat….”

Sang saai Châu Mách Ly daok di tổ 5, xã Bình Sơn, huyện Long Thành, tỉnh Đồng Nai daok raong labaih 12 drei limo saong 30 drei pabe. Saai Châu Mách Ly brei thau: piah patrun  patakik di abih ruak kik di bilan hajan, saai bhian pacang var ro klah nyu pasah, khik mepiah pandap mbang ginup ka tapon athur raong dalam bilan hajan, bhian tui iek tapon athur meyah mboh nyu yau khin ruak atau yau hu jit ruak ye khan chip ka urang jakar thú y thau piah hu jalan langyah chip, ngak catang bruk pacang cakak jit, vệ sinh di dom labik hu jit, caga blei cu, jru pametai anek ruak piah pruh ka var ro. Yaok thun kaoh abih phun jien buh tame raong, sang saai hu laba meng bruk raong limo, pabe jaik 100 triệu đồng. Saai Châu Mách Ly brei thau ka jalan pacang cakak ruak di athur raong:

“Dalam sa adit atau meteh bilan brei vệ sinh var ro, pahacih ký sinh trùng ye limo oh hu ruak….”

Amuk Haligiah, urang jakar pachreih nông xã Xuân Hưng, huyện Xuân Lộc, tỉnh Ðồng Nai  brei thau:

 “Yaok thun, tal bilan hajan ia sua ye xã hu peih bruk pahacih var ro, khik mepiah pandap mbang…”

Urak ini, tapon athur raong, menuk ada di mikva Chăm daok di tỉnh Đồng Nai hu labaih 1.500 drei pabe, limo, menuk, ada… Tui jalan pacang cakak ruak lac bruk praong, blai y tế dom xã hu pasang iek, yaok pataom abih tapon athur raong njauk klauk jru saong ngak salah bruk klauk jru pacang mbang 1 ka tapon athur raong.

Langik tasik dalam dom harei tal daok rah tabiak kan kandah. Kayua yau nan ye, bruk pacang cakak ruak ka tapon athur raong, menuk ada dahlau, dalam saong hadei bilan hajan ye langiu bruk kham merat di dom pakat, dom ngành, ye dom baoh sang raong glang brei caga pacang jit ruak di tapon athur raong, gam gam tui iek athur raong saong langyah chip tuk hu jit ruak rah tabiak./.