Jalan tame palei Chăm Hòa Lộc, xã Minh Hòa harei ini hu tuh bê tông saong hệ thống điện padang ngak khang kajap. Dom baoh sang siam hu padang tagok pablak saong sambo hijao di dom bein cao su saong pa-aok blait salih ka dom baoh sang taik tahak dahlau daih. Rilo sang daok blei hu radaih ô tô piah nao mai, radaih tải piah pajeng pandap… Tapa nan brei mboh rai diuk trei sil, kaya meda, bui sambai di bhap bini. Ong Mach Nour, hakim sangmegik Islam xã Minh Hòa, brei thau: labaih 5 thun peih bruk padang ngak palei pala barau, bhap bini  Chăm abih hatai jai pachreih tui, brei labaih 4.000m² taneh bein phun cao su daok kuah katak piah ngak jalan bê tông nao tame palei Hòa Lộc atah jaik 2km.

Sap Chăm

 Paglaong jien mek tame ka bhap bini lac sa dalam dom tanut praong dalam bruk padang ngak palei pala barau. Tukvak tapa, xã Minh Hòa hu padang jalan patagok kinh tế ka bhap bini tapa bruk padang mô hình raong glang, pala drak pandar dom ilamu – kỹ thuật bahrau piah ba mai kein laba glaong. Xã jeng hu daong palagaih ka bruk ngak công, pablei salih saong dịch vụ di xã patagok, rik daong biak praong dalam bruk ba jien mek tame kuhria tui akaok menuac thun 2016 di xã hu 36,4 triệu đồng, tagok 4,4 triệu duk saong thun 2015.

Gam saong nan, ralo bhap bini dalam xã khang hatai salih dom phun pala oh hu kein laba tapa pala phun cao su brei jien mek tame yaok rituh triệu đồng yaok thun. Dalam nan, baoh sang saai Thạch Thị Ngọc bangsa Khmer, daok di palei Hòa Cường, xã Minh Hòa lac sa kreih camin. Meng 1,8 ha taneh tuk camereip, tal urak ini, baoh sang saai hu 39 ha taneh pala phun cao su. Langiu pala phun cao su saai daok hu sa cửa hàng pasei xây dựng, 35 drei limo, 2 ha bein pa-aok blait, 1.000 m² bein pandih phun pajaih, 300 geng amriahkalu… Urak ini jien mek tame di baoh sang saai oh ala 1 tỷ đồng yaok thun. Saai Thạch Thị Ngọc brei thau:

 “Hu yau harei ini, dahlau di abih mai meng tarieng ngak bruk, takre bac megru, hu bruk daong  kỹ thuật di kapul urang nông pabak ilamu tame bruk pala drak njauk ye nyu hu kein lagaih. Taphia di nan tapa yaok mbang ngak drei bac megru ilamu biak glaih glar”.

Tui ong Trịnh Đình Toan, akaok Uỷ ban bhap bini xã Minh Hòa, jak jeng dalam tukvak padang ngak palei pala barau di xã lac bruk patagok pren khang di taong abih bhap bini, meng nan bruk khik kajap saong paglaong chất lượng dom tanut palei pala barau hu khang kajap.

 “Piah khik kajap saong dak harei dak paglaong chất lượng dom tanut palei pala barau, urak ini, xã pataom tame langyah dua bruk jeng biak kan kandah nan lac ba bruk ngak, paglaong jien mek tame ka bhap bini, dak padang baoh sang ilamu piah paglaong rai diuk mbang ngui daok dang ka bhap bini”.

Meng dom kham merat yau nan di karja palei saong bhap bini xã Minh Hòa, dom tanut padang ngak palei pala barau hu khik kajap di bhum taneh ini./.