Meng thun 2015 tal urak ini, ban sit Vũng Tàu hu bayar rjien taneh mek veik di 115 danak dak ngan saong taneh praong abih tih labaih 21 triệu m2; hu labaih 8.350 sang, menuac urang saong labik ngak bruk gaok tal bruk njauk karja mek veik taneh. Kuhria tal bilan 8/2020, ban hu tabiak sarak brei mek veik labaih 2 triệu m2 taneh saong yaom jien bayar abih tih lac labaih 2.000 tỷ đồng. Bruk bayar jien mek veik taneh di ban sit hu taong yaom lac mbuan lagaih, drah samar duk saong dom labik karei.

Piah hu yau nan, ban sit Vũng Tàu taduan hu bruk daong biak praong meng Tỉnh ủy, UB bhap bini tỉnh BR-VT haong dom gah chức năng pambuak tal. Praong di abih lac hu abih hệ thống chính trị di ban sit ba gauk tame bruk, ngak njauk danak dak, gam tui adat gam tui hatai anit nan ye rahra  hu taneh njauk mek veik thei jeng pachreih tui. Pagap yau dom danak dak: Khu công nghiệp dầu khí Long Sơn; pasiam papraong jalan 30/4; Sang iek ruak đa khoa ban sit Vũng Tàu; pasiam papraong jalan roya 51B… taduan hu bruk pachreih tui di bhap bini.

Tui ong Hoàng Vũ Thảnh, Phaok akaok UB bhap bini ban sit Vũng Tàu, lingiu di bruk langyah sarak daong, bayar jien siam lagaih ka urang hu taneh njauk karja mek veik, ban sit daok hu ngak labik daok ka rahra tui hatai caong, khik hu siam mekre bruk mbang ngui daok dang tuk nao daok di labik bharau: “Ban sit daok padang ngak rilo labik daok bharau ka dom urang njauk karja mek veik taneh, yau ye labik tái định cư Tây Bắc A3, labik tái định cư phường Thắng Nhất, phường 10 saong labik tái định cư Long Sơn. Nan lac dom labik daok bharau bo bhap bini mboh hu sahanang hatai. Tuk maong tame dom labik brei ka tái định cư, bhap bini jia lac raidiuk di drei meda hu salih bharau tui jalan siam jang, nan ye urang sahanang hatai.”

Amuk Nguyễn Thị Mỹ Linh, daok di palei 1, xã Long Sơn urak ini daok di labik tái định xã Long Sơn brei thau, hadei di tuk njauk karja mek veik taneh piah ngak Labik công nghiệp dầu khí Long Sơn, sang amuk hu bayar jien biak rilo, hu karja brei 1 lô taneh di labik daok bahrau biak siam, lagaih: “Tuk karja mek veik taneh  piah ngak labik Hóa dầu Long Sơn, sang dahlak biak pachreih tyui. Hu karja daong jien saong taneh piah padang veik sang. Meng tuk tame daok labik bharau, kol dahlak mboh labik ini siam jang, hu jalan praong, hu sang bac. Lac urang hu taneh njauk karja mek veik, dahlak mboh sarak di karja biak siam, biak njauk hatai bhap bini.”

Meda lac, di labik halei jeng yau nan, tuk hu rilo danak dak, bruk mek veik taneh gaok oh takik kan kandah.. Dom tavak tavaiy rilo meng lac kayua bhap bini khin yaom taneh glaong jang, oh njauk hatai haong jalan bayar jien di po đầu tư. Langiu di nan, taneh ka tái định cư saong sang daok xã hội hu takik, ngak ka dom tỉnh, ban gaok kan kandah. Vũng Tàu jeng yau nan. Saong piah lang talaih dom kan kandah nan, ban sit daok pataom tame pasang iek cambaih laih piah hu jalan bayar jien njauk tui adat hukum min oh ngak khat lahik ka dom sang bhap bini.

Ong Hoàng Vũ Thảnh, Phó Chủ tịch UB bhap bini ban sit Vũng Tàu brei thau, ban sit hu khan cambaih tal yaok urang jakar ngak bruk mek veik taneh lac patagok bruk taom gaok bhap bini, sahneng duah jalan langyah ka nyu lagaih min njauk tui adat hukum: “Tuk langyah bruk bayar jien ka taneh hu karja mek veik, urang jakar njauk ba drei tame urang hu taneh njauk karja mek veik piah langyah, oh brei langyah khat lahik ka bhap bini. Dom bruk hukum oh ka brei adat min daok hu sarak daong ye njauk roh duah, pasang iek piah duah jalan daong, piah khik hu siam mekre raidiuk di bhap bini hadei di tuk njauk karja mek veik taneh.”

Ong Quách Tiến Đạo, Phó Ban khik ramik danak dak đầu tư 1, ban sit Vũng Tàu brei thau, urak ini daok hu dom danak dak daok tavak gah mek veik taneh yau ye labik tái định cư Tây Bắc A3, danak dak jalan Ngô Quyền, sang bac Bến Nôm…Mban khik ramik daok pambuak bruk haong dom mban ngành di ban sit duah jalan ngak ka nyu lagaih, oh ngak ka bhap bini njauk khat lahik, ba siam mekre dalam bruk mek veik taneh, langyah siam bruk an sinh xã hội brei ka bhap bini hu taneh njauk karja mek veik: “Yaom lac daok hu dom danak dak daok tavak hasit gah sarak min jalan ngak saong jalan jak ba, ndom biai nao mai haong bhap bini daok hu siam lagaih, tapa nan brei mboh urang jakar daok kham merat piah ngak siam bruk mek veik taneh.”

Ban sit Vũng Tàu urak ini daok hu labaih 10 danak dak daok suai hu padang ngak kayua tavak bruk bayar jien mek veik taneh. Kayua yau nan ye, dalam vaktu anak tal, ban sit brei jhul khang bruk pasang iek dom sarak di Karja ka yaom taneh bayar ka bhap bini. Abih di nyu lac, ban sit VT biak caik hatai sangka duah thau cambaih asal di taneh piah gam khik kajap quyền lợi ka dom baoh sang njauk karja mek veik taneh njauk tui adat hukum, gam langyah hu dom caong khin di bhap bini dalam tukvak samar di abih./.

Urang lang: M.Phuong  3/9/2020