.

        Canah jalan palei Nà Nó, xã Sốp Cộp, huyện Sốp Cộp atah abih tih jaik 1km, bahrau ngak bloh ba mbuan lagaih ka bhap bini nao mai meng palei ini tal palei daih. Lingiu di bruk hu tỉnh daong xi măng, bhap bini dalam palei hu buh pren tame ngak saong yaom jien jaik 600 triệu đồng. Ong Tòng Văn Thiến, palei Nà Nó, xã Sốp Cộp brei thau: 

        Meng “Kadung jien daong cakrok hạ tầng palei pala” huyện Sốp Cộp hu daong padang ngak 8 Sang ilamu ka 8 palei, saong yaom jien daong 1 tỉ 600 triệu đồng. Gam saong nan, bhap bini dom palei hu rik pren tame padang ngak, kuhria tabiak yaom jien labaih 300 triệu đồng. Tal harei ini, sang ilamu palei Pe, xã Sốp Cộp hu ngak bloh saong ba tame pandar, daok veik sang ilamu di 7 palei daok hu padang ngak. Sa-ai Lèo Văn Khiên, akaok palei Huổi Pe, xã Sốp Cộp lac:

        “Hu huyện daong padang ngak sang ilamu ka palei, meng harei ini bhap bini 2 palei hu sang ilamu praong brei ka bhap bini pataom gauk me-in sambai, ginum biai.”

        Yaom lac tỉnh kathaot, min dom bruk padang ngak cơ sở hạ tầng ka bhap bini di palei pala dalam tỉnh Sơn La jeng hu bhap bini pak nan rik pren tame ngak. Mikva dom puk palei hu ginum biai tuk padang ngak dom bruk đầu tư phát triển; hu buh pren yava piah padang ngak dom công trình dân sinh, ilamu… Abih di nyu nan lac, hu biak ralo sang halan hatian brei taneh, phun kayau, njam patam, pandap panda saong jien piah padang ngak palei pala bahrau.

Pagap yau xã Chiềng Khương di huyện Sông Mã, dalam labaih 4 thun tapa, bhap bini rik daong labaih 5 tỷ đồng, labaih 20.000 harei ngak bruk, brei labaih 12.000m2 taneh saong labaih 2.400m3 cuah, patau….piah ngak jalan, ngak sang ilamu... Yau ye sang ong Lò Văn Chum daok di palei Dăm xã Chiềng Mai, huyện Mai Sơn brei labaih 360m2 taneh hamu saong taneh puh piah ngak jalan palei; ong Tòng Văn Ngon xã Mường Giàng, huyện Quỳnh Nhai brei labaih 300m2 taneh piah padang ngak palei pala bahrau. Meng hu yau nan, tal harei ini, yaok xã di Sơn La ngak hu labaih 7 tiêu chí, hu jaik 70 xã ngak hu meng 8 tiêu chí tagok. Ong Nguyễn Anh Hữu, Phó Chánh văn phòng Ban điều phối Danak dak palei pala bahrau tỉnh Sơn La brei thau: 

        “Piah ieu pataom, jak ba padang ngak palei pala bahrau, hoi dong bhap bini tỉnh hu patabiak sarak 115, tabiak yaom daong mengkadung jien karja ka bruk padang ngak palei pala bahrau. Dalam nan tabiak bruk jak ba meng 30 tal 100% ka dom bruk kuhria padang ngak palei pala bahrau.”

        Puac thun ini, tỉnh Sơn La hu 5 xã tra mek hu chuẩn palei pala bahrau, tui nan xã dalam tỉnh mek hu chuẩn abih tih tagok hu 8 xã. Hu yau nan, meng hu bruk pachreih tui, rik daong pren yava, jien padai di abih bhap bini saong mikva puk palei dalam bruk padang ngak palei pala bahrau di tỉnh bhum ceik Sơn La./.