Bhapbini bui sambai kayua ban raya hu hadah hadai

          Đảng bộ ban raya Hồ Chí Minh tuk halei jeng thau lac, ban raya lac labik nao dahlau di bhum kinh te praong gah meraong nan ye bruk buh jien tame padang ngak co so ha tang duh ka bruk patagok jeng ye pambuak pagam dom puk palei dalam bhum hu sangka. Dom cong trinh ye : tatua Phú Mỹ, hầm tapa kraong Sài Gòn, jalan roya Đông Tây, dom  jalan Nguyễn Văn Linh, Phạm Văn Đồng, Trần Văn Giàu, công trình ramik pasiam kênh Nhiêu Lộc – Thị Nghè, kênh Tân Hóa – Lò Gốm… ngak jeng dom kadha praong dalam bruk patagok di ban raya. Ban raya hu tabiak jalan ngak lac gam ramik pasiam đô thị hu blaoh gam patagok dom khu đô thị barau, ba mai diukrai siam jang ka bhapbini. Ông Dư Phước Tân, daok di jalan Vạn Kiếp, phường 3, quận Bình Thạnh brei thau : Ban raya hu biak rilo bruk salih bahrau. Dahlak mboh lac, dom labikdaok bahrau hu dak padang, peih tabiak jalan piah ban raya patagok khang kajap. Dahlau thiah, kol drei patagok dom labik dân cư daok sit sot, min urak ini kol drei hu quy hoach dom khu dan cu ye : labik dô thị barau Thủ Thiêm, khu đô thị Tây Bắc, khu đô thị cảng Hiệp Phước, blaoh khu đô thị Nam Sài Gòn… .

Ông Lê Văn Thành daok di phường 14, quận 3 njauk hatai saong bruk ba bruk ngak ka jaik 10 trieu bhapbini di karja ban raya : Meyah kol drei oh hu bruk ngak ye oh hu jien mek tame, oh hu jien mek tame ye kathaot. Ban raya ini urang oh hu bruk ngak biak takik. Bhian di nyu, dom ban praong bhian hu rilo menuac oh hu bruk ngak, min di ban ini urang oh hu bruk ngak biak bian, labaih 4%. Kol dahlak mboh lac, sa xa hoi bo thei jeng hu bruk ngak lac biak siam paje. Meng hu bruk ngak saong hu jien mek tame nan, hu daong ka urang di ban ini saong urang meng labik karei tame daok di ban ini diuk rai hu siam.

Kol dahlak gaok saai Phạm Thúy Vi, sa urang daok ranaih umo di ban raya taphia Rup patau Chủ tịch Hồ Chí Minh di Mblang bein jalan nao takai Nguyễn Huệ. Saai biak dah hambaok hu praong tagok gam saong bruk patagok di ban raya. Gam saong dom urang ranaih umo di ban raya, saai daok bac megru, ba abih pren yava di drei piah rik daong tame bruk patagok di palei negar. Saai Thúy Vi ndom lac : Dahlak mboh ban raya di drei salih biak rilo. Meng rilo sarak, jalan ngak di urang dang akaok ban raya ngak ka raidiuk di bhapbini laneng jang, ginup jang; saong daok ba jalan patagok kinh te siam jang. Kol dahlak caong lac, tapa yaok tukvak patagok di taneh ia drei, ban raya kol drei hu dom jalan ngak piah paglaong jang raidiuk di bhapbini ban raya saong dalam taneh ia. Taphia di nan lac dom jalan ngak suai livik piah paglaong jang labik dang di taneh ia drei.

 Piah ka bhapbini hu raidiuk siam jang gam saong bruk ramik pasiam saong patagok đô thị, dak padang dom khu dân cư barau, ba bruk ngak saong jien mek tame ka urang ngak, ban raya HCM daok ba jalan mbuan lagaih ka bhapbini hu bac megru hamiet hamiet, piah anek menuac hu patagok di abih gah, khik ka yaok bhapbini hu mbang tui dom dịch vụ pato megru, y tế, ilimo… Meng jalan sahanneg lac anek menuac lac pasak di bruk patagok, ban raya daok jeng sa labik njauk diukrai di bhapbini. Dalam lingik tasik siam mekre  di sa thun bahrau daok mai bak dom canah jalan, taphia dom chậu bingu mai daok rak bingu, ông Tô Dùng, sa urang daok di phường Đa Kao, quận 1 brei thau : Dahak hu taom gaok rilo mikva di ban raya, rilo urang biak uan tabuan. Harei dahlau nao halei jeng mboh kathaot, kan kandah. Urak ini, libik halei jeng ginup, padai brah, pandap mbang menyum, blaoh jalan nao mai jeng siam jang, praong laneng; blaoh sang danaok prong, siam, jalan mbak mekre, phun kiểng mekre, alam moi truong hacih… nan ye urang biak chreih chrai. 

Patui jalan salih barau, dalam tukvak meng ini tal thun 2020, Đảng bộ ban raya Hồ Chí Minh ba tabiak jalan ngak lac kham merat dak padang ban raya văn minh, hiện đại, bak hatai anit ranam, khik kajap labik dang lac nao dahhlau gah kinh te – xa hoi piah samal jeng sa dalam dom pasak praong gah kinh tế, jien padai, alamu - công nghệ di bhum Đông Nam Á. Peih ngak bruk ini piah pamaong tal raidiuk trei sir, haniem phuan ka bhapbini ban raya./.

Thúy Linh