Bhapnini Cam yam tapa kan kandah raong anek nao bac

Thun bac 2017 -2018 yam tame adit ka 7, taphia bruk bui sambai chreih chrai di dom anek saih dalam thun bac barau jeng daok hu rilo bruk duh hatai di dom urang amaik ame, abih di nyu nan lac dom sang kan kandah di bhum palei pala, bhum bhapnini bangsa takik. Min, meng hatai caong khin anek drei hu bac akhar, dom urang amaik ame kham merat yam tapa dom kan kandah piah ka anek drei hu nao bac. Jasi – urang vak di rayo sap ndom Viet Nam daok di ban raya Ho Chi Minh hu kadha vak “ Yaom lac kan kathaot jeng kham merat brei ka anek nao bac”

-Tame thun bac barau ngan saong dom paok jien blei khan ao barau, tapuk katap, pandap bac da-a, jien bac…di dom urang anek oh lac bruk duh hatai di amaik ame kathaot bo daok lac bruk duh hatai yaok thun di dom urang amaik ame hu anek tal thun nao bac. Diuk pasang saai Thông Thị Ngọc Thúy daok pak palei Bình Thắng, xã Phan Hòa, huyện Bắc Bình, tỉnh Bình Thuận oh hu bruk ngak tani tanat, jien mek tame rilo meng lac pambak tame 2 sào hamu. Yaok bilan pandar cai patak pataom meng ginup ka harei mbang dua var. Piah ka anek hu ginup jien kak ka dom paok jien dalam sang bac, dom bilan tapa, diuk pasang saai Thúy njauk kham merat ngak rilo bruk jang, pasang nao liua pah, daok saai Thúy thei pah hagiayt ngak nan. Yaom lac lan kandah min jeng kham merat duah jien ka anek hu nao bac. Saai Thúy brei thau:

  -Yaom jien 2-3 triệu đồng di dom sang ginup meda “oh lac bruk praong”, min di dom sang kan kathaot lac bruk duh hatai praong. Saai Lư Tôn Hoàng Vương daok pak palei Bình Minh, xã Phan Hòa, huyện Bắc Bình, tỉnh Bình Thuận khan lac: sang dahlak hu dua urang anek kumei daok bac di sang bac Trung học cơ sở Phan Hòa, kuhria dom paok jien njauk nop labaih 2 triệu đồng. Oh ka kuhria dom pandap karei njauk blei ye: tapuk, katap, khan ao, khan ao thể dục, takhaok…dua diuk pasang jeng lac urang jakar, min jeng mbang patak pataom yaok harei, yaok bruk meng ginup jien brei ka anek tame thun bac barau. 

  -Tame thun bac barau, rilo sang kan kandah oh khin ka anek klak bac, nan ye kham merat ngak mbang glaih glan, atau nduac nao nyim, mesraiy jien piah blei dom pandap ka anek nao bac. Oh lac hu sang saai Thúy, saai Vương yau ndom angaok nan, bo rilo sang urang Cam pak ini jeng  duh hatai yau nan. Diuk pasang saai Bá Quốc Tuấn saong saai Táo Thị Mọng Luyến daok pak palei Bình Hòa, xã Phan Hòa luac bilan “dang di pandiak, riak di hajan” jeng tok duah hu 2-3 triệu đồng. Dalam tuk nan sang hu tal 4 pabah mbang saong 3 urang anek tal thun nao bac. Saai brei thau: kham meray blei ka 3 urang anek hu siphau saong mbut, kalam, daok katap caik tapuk lac pandar veik katap klak di thun bac dahlau, daok tapuk giáo khoa, khan ao lac likau di urang randap. Urak ini ngak hu hadom jien lac patak pataom nop jien bac ka dom anek.

-Oh lac hu dom bruk duh hatai di dom urang amaik ame sang kan kandah, bo daok hu rilo bruk, gru pato, sang bac di bhum palei pala bhum bhapnini bangsa takik sangka. Nan lac bruk jak ba anek saih nao bac. Thun bac 2017 – 2018 ini, sang bac Trung học cơ sở Phan Hòa hu 21 tan bac hu labaih  668 anek saih rilo meng lac anek saih Chăm. Min, dalam harei  peih thun bac barau ini hu tal 90 anek saih oh hu mbaok. Yau nan ye, lingiu di bruk pathau khan, jak ba, sang bac jeng pambuak bruk saong dom urang hảo tâm daong tapuk klak, padang angan miễn, giảm jien bac ka dom anek saih sang kan kathaot, jaik si kathaot, anek saih sang sarak…rik daongklah rabha dom bruk duh hatai di rilo amaik ame. 

-Kan kandah yau nan min meng bruk kham merat di yaok urang amaik ame di anek saih gam saong bruk sangka drah samal di gah pato megru, karja puk palei, bruk pato saong bac di anek saih Cam xã Phan Hòa, huyện Bắc Bình, tỉnh Bình Thuận dalam thun bac barau 2017-2018 meda hu siam jang./.