Hadei di 1 thun peih tabiak, tal urak ini, bruk pato caluai di huyện bhum ceik Tánh Linh, tỉnh Bình Thuận daok ba mai rilo siam mekre. Anek saih phổ thông thau caluai, meng nan takik hu bruk mblung ia dalam huyện. Kadha vak hadei ini di Việt Quốc, urang vak di rayo sap ndom Việt Nam daok di ban raya Hồ Chí Minh brei thau ka bruk ini:  

Tuk kol dahlak mai tal sang bac THCS Tân Thành, huyện Tánh Linh jauk di tuk gru Trương Thái Bình daok pato caluai ka labaih 20 anek saih tal bac 6A di sang bac. Dom adei rilo meng lac urang bangsa takik daok di palei Tân Thành, ban sit Lạc Tánh. Bac cauai daam hồ di động praong 72 mét vuông, dom adei mboh biak takre. Adei Nguyễn Văn Thuận, bangsa Raglây, daok bac caluai dalam hồ brei thau:

 “  Sang anek daok di palei Tân Thành, val val sang hu craoh saong hồ dalam. Anek bac caluai sa adit 2 mbang, bac piah thau caluai, klah metai mblung ia”.

Ini lac thun ka 2 sang bac THCS Tân Thành peih pato caluai ia tui jalan ngak di gah pato megru huyện. Thun bac 2016-2017, sang bac njauk pah hồ bơi daok atah di sang bac 6 ki-lô-mét piah pato anek saih caluai. Jalan nao atah, tuk pato caluai sang bac brei gru pato nao tui iek biak glaih glar. Thun bac bahrau ini, meng gru tal anek saih biak chreih chrai kayua sang bac hu ngak sa hồ bơi di động dalam mblang bein di sang bac. Anek saih oh daok nao atah piah bac caluai yau thun dahau. Gru hiệu trưởng Nguyễn Văn Bảo Khanh lac:  

"Tapa 1 thun pato, anek saih randap ye, oh daokhuac hagait. Maik ame biak uan tabuan caong sang bac khik bruk pato ini, pato ginup tuk di Mintri pato megru tacei saong meda pato rilo tuk jang. Lingiu tuk bac, amaik ame jeng hu mai likau sang bac peih pabah mbang hồ bơi brei dom anek kamuan di drei bac caluai ka nyu gheih." 

Dreih yau sang bac THCS Tân Thành, thun bac dahlau, dom sang bac dalam huyện jeng oh ka hu hồ bơi, njauk pambuak bruk haong dom hồ bơi tư nhân gah lingiu sang bac brei dom adei pasram caluai. Thun bac bahrau ini, tui jalan xã hội hóa, jabat pato megru huyện Tánh Linh ngak hu 14 hồ bơi di động di 14 xã, ban sit. Yaok hồ bơi yau an abih 100 triệu đồng, meda pandar hu ka rilo sang bac. Yaok anek saih bac caluai đóng 90.000 đồng sa thun, mbiah haong kadung jien di amaik ame anek saih. Bruk pato caluai dalam dom sang bac di Tánh Linh tukvak tapa hu daong patrun patakik bruk mblung ia kayua menei di danao, menei di craoh, hu dom amaik ame pok meyaom. Ong Hồ Văn Rê, ame di adei Hồ Nhật Duy, anek saih tal 7, sang bac THCS Tân Thành brei thau: 

          “Thun bloh sang bac hu peih pato caluai ia ka anek saih. Anek dahlak thau caluai ye jeng hu sahnang hatai. Caluai gheih lac siam. Di labik ini hu rilo hồ, craoh dalam. Meda lac hu rilo ia. Bilan hajan ia dauk akaok. Urak ini nyu thau caluai ye drei jeng mboh sahanang hatai. Meda tapa hồ, tapa craoh, drei jeng mboh sahanang hatai”.

Tal urak ini, taong abih 48 sang bac dalam huyện Tánh Linh hu peih pato caluai. Labaih  8.300 anek saih tiểu học saong  trung học cơ sở thau caluai bloh, meblah labaih meteh dom anek saih tiểu học saong trung học cơ sở dalam huyện. Kein laba meng bruk ini mboh biak cambaih. Gru Phạm Vi Văn, akaok jabat pato megru huyện Tánh Linh brei thau:

“Thun bac 2017-2018 ini, kol dahlak daok tacei brei peih pato ka taong abih anek saih tiểu học bac caluai, THCS jeng yau nan. Ngak habar brei hu rilo jang anek saih thau caluai di puac thun bac, njauk tui bruk ba tabiak, jeng ye tuk nao glang limo kubao, dom adei oh huac mblung ia”

Thun bac meng bloh, huyện Tánh Linh lac labik hadah di tỉnh Bình Thuận ka bruk peih pato caluai ia. Sở pato megru Bình Thuận daok pachreih dom puk palei karei dalam tỉnh bac megru ilamu di huyện Tánh Linh piah peih ngak siam bruk pato caluai, tapa nan daong patrun patakik bruk mblung ia ka anek saih dalam tỉnh./.